Esera 7 - Wunta Mempori

I Esera mekule i Yerusale 7:1-10

¹ Tehine umarino atuu, i tempo poparentaano Aritahasasita, mokole i Peresia, melungkaomo i Esera anano i Seraya anano i Hilikia,

² anano i Salumi anano i Sadoki anano i Ahitubi

³ anano i Amaria anano i Asaria anano i Merayoti

⁴ anano i Serahia anano i Usi anano i Buki

⁵ anano i Abisua anano i Pinehasi anano i Eleasa anano i Haruni, sando mpesomba langkai atuu.

⁶ I Esera andio mekule inso i Babeli. Onae asa mia anu tedoa pande a wunta ka sompo ponto'orino mongkona Taurano i Musa anu Doweeakono i Ue, Ue Alado to Isaraeli. Luwuakoano anu inemano, doweeakono mokole, hangano kae-Do Ue Alano kumongkomio.

⁷ Ta'u ko'opitu tempo poparentaano i mokole Aritahasasita mekuleomo mbo'u nada i Yerusale kana to Isaraeli ka sando mpesomba, to Lewi, puu mpenani, puu mpodagai pewowa langkai ka puu pompekakaako i Raha-Do Ue Ala.

⁸ Wula ko'olima ta'u ko'opitu tempo poparentaano mokole atuu, i Esera haweomo i Yerusale.

⁹ Tepakosiomo pelungkaano inso i Babeli tanggala asa wula ko'asa ka hangano moikono pokongkomino kae-Do Ue Alano, onae hawe i Yerusale tanggala asa wula ko'olima.

¹⁰ Hangano i Esera montooomo ta mepaguruakono ntu'u Taura-Do i Ue ka weweuo a laro ntumuwuno saru paguruako ira to Isaraeli pompakosi ka atora-Do.

Wunta parentano mokole Aritahasasita 7:11-26

¹¹ Ndiomo polimbano wunta anu iweeakono mokole Aritahasasita ndi Esera, sando mpesomba ka anu tedoa pande a wunta atuu, anu tedoa pande a parenta ka pompakosi-Do i Ue a nto Isaraeli,

¹² ”I Aritahasasita, mokoleno luwuakoano mokole, hawe ndi Esera, sando mpesomba ka tedoa pande a Taura-Do Ue Alano asa wawolangi, ka anu nahina tampulaano. Kanandio-andio,

¹³ moluarako akumo parenta, nine luwuno mia ilarono poparentaaku anu tewinso palili to Isaraeli, sando mpesomba, ke to Lewi ka anu ineheno lumako i Yerusale, moiko domelako saru omue.

¹⁴ Hangano omue dotenako mokole saru opitu ira puu mpopatuduno kau lako paresao mongkona Yehuda ka Yerusale, menunu songka-Do Ue Alamu, gagi pe'iniamu.

¹⁵ Omue mbo'u asalakono mowawa salaka ka wulaa pompoweedo mokole saru luwuno puu mpopatuduno, gagi pesomba a moleono aroa ndi Ondae Ue Alado to Isaraeli anu po'ianga-Do i Yerusale,

¹⁶ saru luwuno salaka ka wulaa anu komohawe inso a luwuno poropinsi Babeli, ka mbo'u pesomba a moleono aroado palili ka luwuno sando mpesomba, tiano Raha-Do Ue Alado i Yerusale.

¹⁷ Onaemo pu'uno, asalakono doi andio pakeo temoiko po'oliako sapi lakino, bimba lakino, ka ana bimba saru pesomba kaanga ka pesomba tinawa. Luwuno atuu, asalakono pesombaakono a wawo meda pontunua pesomba i Raha-Do Ue Alamu i Yerusale.

¹⁸ Umarino atuu, weweuomo hapa anu pinemoikomu ka luwuno pepaekompomu saru salaka ka wulaa anu susuano, menunu po'ehe-Do e Alamu.

¹⁹ Sekono luwuno parewa anu pineweengako ndi omue pakea mpesomba i Raha-Do Ue Alamu, peweengakono luwu i aro-Do Ue Ala i Yerusale.

²⁰ Anu kinere susuano tiano Raha-Do Ue Alamu, anu gagi owahiamu, moiko u'owahio inso a mponaapa arataa poparentaa.

²¹ Ongkue, mokole Aritahasasita, moluarako akumo parenta a luwuno anu mompekaria arataa poparentaa i asa towano Koro Eparata, kanandio, ’Luwuno anu inso ndi omiu, inemano sando mpesomba Esera anu tedoa pande a Taura-Do Ue Alano asa wawolangi, asalakono imeweweuo temoiko,

²² mompake salaka hawe asa etu talenta, gandu hawe asa etu kor, anggoro hawe asa etu bati, lana hawe asa etu bati, ka ohia nahi tetidahi.

²³ Luwuakoano anu mongkona parenta-Do Ue Alano asa wawolangi, asalakono iweweuo tementee ntu'u tiano Raha-Do Ue Alano asa wawolangi, kasi alu ira tekuda-Do a mpoparentaano mokole ka luwuno anano.

²⁴ Kimempauakomiu mbo'u nine si mpo'ema sima'ulu, peki'ue ke owahia susua a luwuno sando mpesomba, to Lewi, puu mpenani, puu mpodagai pewowa langkai, puu pompekakaako ke ata susuano i Raha-Do Ue Ala.’

²⁵ Omue Esera, pakeomo ponto'orimu inso ndi Ondae Ue Alamu anu Doweeko, kau potoro ira petewawa, puu mpobitara, ka domebitara ira luwuno palili anu mpo'ia i asa towano Koro Eparata, onaemo luwuno mia anu mponto'ori songka-Do Ue Alamu ka mia anu napi to'orio, asalakono paguruako ira.

²⁶ Sompo mia anu nahi tondao songka-Do Ue Alamu ka songkano mokole, asalakono hinuku menunu saru wineweuno, moiko hinuku mate ke tinadi, moiko pohuku dinenda ke tinorungku.”

I Esera umunde-unde Ira i Ue

²⁷ Inunde-unde Iramo i Ue, Ue Alado uempu'uto anu lumeluomo aroado mokole kai gagi kanandio, ranta kai tekosi doweweuo raha-Do i Ue i Yerusale,

^28a ka weweu aku ka dopemoikoo mokole ka luwuno puu pompatuduno saru luwuno anu langkai potorono a poparentaano mokole ka anu pabawa!

Pepatinda a pelempaa

^28b Ongkue mbo'u kupokomorosoo aroaku, hangano kae-Do i Ue, Ue Alaku kumongkomi aku. Kupumpu ira ba opia petewawa inso i olodo to Isaraeli mpekule saru ongkue.