Esera 5 - Wunta Mempori

Powangua Raha Mpesomba pinu'u mbo'u a mpeinduno mokole Dariusu 5:1–6:5

¹ Sine nabi Hagai ka i Sakaria inuleno i Ido, orua nabi atuu, mompau anu ta gagi a nto Yahudi anu mpo'ia i Yehuda ka i Yerusale a nee-Do Ue Alado to Isaraeli, anu kumongkomi ira.

² I tempo atuu i Serubabeli anano i Sealitieli ka i Yesua anano i Yosada mompu'u iramo mbo'u wanguo Raha-Do Ue Ala i Yerusale. Luwuno nabi-Do Ue Ala pompokowali ka tumulungi ira.

³ Sine, i tempo koa mbo'u atuu i Tatinai, bupati wita i sumooano oleo Koro Eparata meronga saru i Setari-Bosinai ka wali-walido, me'aiwa potaeako ira, kanandio, ”Isemake anu moluarako parenta ndi omiu ka imewanguo raha andio ka mpoko'umari rere watuno?”

⁴ Dompotaeako ira mbo'u, ”Isemake needo mia anu wanguo raha andio?”

⁵ Sine mata-Do Ue Ala tetutu a luwuno mia pinemota'u to Yahudi, onaemo mia atuudo nahi dodadasi ira mpenaa-naa ranta ka ihina lele anu tinarimano i Dariusu ka i'amba hinao sangkino wuntado mongkona atuu.

⁶ Ndiomo polimbano wunta ndi mokole Dariusu anu inoliwino i Tatinai, bupati wita i sumooano oleo Koro Eparata, saru to poparenta onaemo i Setari-Bosinai saru luwuno wali-walino.

⁷ Ondae mpo'oliwi wunta ndi onae, kanandio unino, ”Ndi ondae mokole Dariusu. Tabea mawongko!

⁸ Moiko ito'orio mokole, nine omami me'aiwa i wita Yehuda, a Raha-Do Ue Ala anu tedoa langkai. Raha atuu kontongaano winanguako watu melolangkai, ka a rereno pinotakoako keu. Anggaa atuu dome'anggao tedoa moiko ka magasi a ngkaedo.

⁹ Ka ki'amba mensikeno ira mia mpinemota'u ka motaeako ira kanandio, ’Isemake anu tumena komiu mewanguo raha andio ka mpoko'umario rere watuno?’

¹⁰ Ndi ondae kimpesikenoakono mbo'u needo, ranta ka kimpokoburio needo luwuno mia anu petewawado mpo'angga, ka kimempauakomiu ueku.

¹¹ Ndiomo sangkido ndi omami, ’Omami andio, tetenaa-Do Ue Ala anu me'ueo langi ka wawontolino, ka wali kami mewanguo raha, anu winanguomo mapata'u-ta'u telalo, anu winanguomo ka ipoko'umario asa mokole langkai i Isaraeli.

¹² Sine, umarido uempu'u mami mokontekuda Ira Ue Ala, Ueno asa wawolangi, ondae Dopeweengako ira a ngkaeno i Nebukanesa, mokole i Babeli, to Kasidimi anu mensolangio raha andio ka wawao tongku andio a pontadia i Babeli.

¹³ Sine, a nta'u amba-ambano poparentaano i Koresi, mokole i Babeli, linuarakoomo parentano mokole Koresi ka iwinangu Raha-Do Ue Ala andio.

¹⁴ Kanatuu koa mbo'u parewa wulaa ka salaka inso a Raha-Do Ue Ala, anu inalano i Nebukanesa inso a Raha Mempori i Yerusale ka iwawao a raha mpelahumoaa i Babeli, i'alao mbo'u mokole Koresi inso a raha mpelahumoaa anu i Babeli atuu, ka ipeweengakono ndi asa mia anu meneeako i Sesibasari anu ipotoroomo gagi bupati.

¹⁵ Dopotae mokole ndi onae: Alaomo parewa andio, lakomo ka naaomo atuu i larono Raha Mempori i Yerusale, ka asalakono Raha-Do Ue Ala winangu a mpo'iangaano se'elu.

¹⁶ Ka i'amba haweomo i Sesibasari weweuo pondasino Raha-Do Ue Ala i Yerusale, ka mompu'u i tempo atuu hawe kanandio-andio powangua atuu melempa mpiha, sine napi umari.’

¹⁷ Onaemo pu'uno, tewala ipemoikoo mokole, asalakono ka ipinaresa i larono raha ponaapa arataado mokole i Babeli, ke horio hina parentado mokole Koresi ka iwali winangu Raha-Do Ue Ala i Yerusale. Ka i'amba pomputusido mokole mongkona atuu, moiko ka i inoliwi ndi omami.”