Esera 4 - Wunta Mempori

Powangua Raha Mpesombaa tesosanggoli 4:1-24

¹ Terongeomo a iwalido to Yehuda ka to Benami, nine luwudo mia anu mpekule inso a pontadia atuu kontongaado mpowangu Raha Mempori-Do i Ue, Ue Alado to Isaraeli.

² Onaemo ka domelako ntepohaweakono i Serubabeli saru luwuno petewawa suku, dompotaeako ira, ”Po'ineeomo ka kimpokowali komiu mpowangu, hangano omami mbo'u mpesomba ndi Ondae Ue Alamiu kana omiu. Omami mbo'u wela mpopesombaako pesomba ndi Ondae, mompu'u i tempo poparentaano i Esari-Hadoni, mokoledo to Asuri, anu lumimba kami i ndi'ai.”

³ Sine, i Serubabeli, i Yesua ka luwuno petewawa sukudo to Isaraeli anu susua potaeako ira, ”Nahina pabawamiu a mpowangua Raha-Do Ue Ala mami, hangano butukoa omami anu mpowanguako Ira i Ue, Ue Ala to Isaraeli, kana parentano i Koresi, mokoledo to Peresia, ndi omami.”

⁴ Palili i wita atuu, mpokomolusao aroado to Yehuda, ka weweu ira medoito mpowangu.

⁵ Tendeano, i tempo poparentaano i Koresi, mokole i Peresia, hawe i tempo poparentaano i Dariusu, mokole i Perisia, dompopandei ira puu mpompatudu umewai ira to Yehuda, ka sumosanggolio tinoodo.

Powangua bente i Yerusale te'onto

⁶ I tempo poparentaano i Ahasiwero, a pompu'uano poparentaano, mpoburi ira wunta pontuluri a mpalili i Yehuda ka i Yerusale.

⁷ Ka i'amba i tempo poparentaano i Aritahasasita, i Bisiami mbo'u, i Mitireda ka i Tabe'eli saru wali-walino anu susua, moburi wunta ndi Aritahasasita, mokole i Perisia. Wunta atuu binuri montonda poburido to Arami, saru pengkonaano. Binuri lembuino a mpaudo to Arami:

⁸ I Rehumi, bupati ka i Simisai, puu mpoburi, moburi mbo'u wunta umewaio Yerusale ndi mokole Aritahasasita, anu ihino, kanandio:

⁹ Anu mpoburi onaemo i Rehumi, bupati ka i Simisai, puu mpoburi, saru wali-walido anu mehano, luwuno puu mpobitara, anu mpoparenta, ka pegawai, saru to Perisia, luwuno mia inso i Ereki, mia inso i Babeli, saru to Elami inso i Susani

¹⁰ ka luwuno tongku susua, anu linimbano i Asinapari mia langkai pabawano ka maramba atuu, ka itena ira mpo'ia i kota Samaria ka i wita susua i sumooano oleo Koro Eparata.

¹¹ Ndiomo wunta anu wali binuri anu inoliwido ndi onae, ”Ndi ondae mokole Aritahasasita, inso a luwuno atamiu, ueku, luwuno mia i wita sumooano oleo Koro Eparata.

¹² Moikoano kai to'orio mokole, nine luwudo to Yahudi, anu mpelungka inso a mpo'iangamiu ueku aiwa a mpo'ianga mami, mehawe iramo i Yerusale. Ondae kontongaado wali mpowangu kota anu inehedo mpe'ewa ka mosa'o gaudo atuu. Ondae kontongaado mpopoko'umari powangua rere watu ka mpokomoikoo pondasino.

¹³ Gagi, moiko ito'orio mokole, tewala umariomo winangu kota atuu, ka luwuno rere watuno umariomo, mia nami dompo'owahi mbo'u sima'ulu, peki'ue ke owahia susua, poko'ariano kota atuu mokorugio mokole.

¹⁴ Kanandio-andio, hangano omami hinao pengoamami saru mokole, nahi pototono kami kumitakomiu mokole pinokoko'ii, onaemo ka kimpotena mia aiwa pauo anu gagi andio ndi omiu mokole,

¹⁵ ka ihina pomparesaa a wunta teweweudo uempu'umiu, ueku. I larono wunta teweweu atuu, komiu humaweo ka tumo'orio ueku, nine kota atuu, kota anu ineheno umewa, anu wela mokorugi ira mokole ka luwuno wita, ka nine mia wela me'ewa i larono mompu'u ndi'ipua. Onaemo pu'uno kota atuu ka ikinale-kale.

¹⁶ Kipaukomiu mokole, tewala kota atuu waliomo winangu ka luwuno rere watu umariomo, gagi nahi ta hina mbo'u tiamiu ueku, i wita i sumooano oleo Koro Eparata.”

¹⁷ Ondae mokole mo'oliwi wunta sangkino, ”Ndi Rehumi, bupati ka ndi Simisai, puu mpoburi, saru wali-walido anu susua, anu mpo'ia i Samaria ka i wita anu susua i asa towano Koro Eparata. Tabea!

¹⁸ Kanandio-andio, wunta anu inoliwimiu, binasaomo mengkaa i aroku.

¹⁹ Ka i'amba ia parentaku hinaomo poparesaa, ka hinawe, nine mompu'u i ndi'ipua kota atuu wela umewai ira luwu mokole ka i larono wela gagi peteaa ka pe'ewa.

²⁰ Ka i ndi'ipua hinao ba'opia ira mokole anu pabawa i Yerusale, anu parentao luwuno wita i asatowano Koro Eparata, ka ndi ondae inowahi sima'ulu, peki'ue ka owahia susua.

²¹ Onaemo pu'uno, ipoluarakomo parenta mokompenaa-naa ira mia atuudo, kasi dowali mewanguo kota atuu, ba napi kupoluarako parenta.

²² Impewowoloo temoi-moiko kasi memanguleleakono. Hapa tuduno masolaa tetiangi langkai, ranta mokorugi ira luwu mokole?”

²³ Mansano polimbano wuntano mokole Aritahasasita binasa ndi i Rehumi, ka i Simisai, puu mpoburi, mpompari-pari iramo mpelungka melako i Yerusale tepohaweako ira to Yahudi ka mokompenaa-naaako ira parewa mpetea.

²⁴ I tempo atuu anggaano powangua Raha-Do Ue Ala i Yerusale atuu te'onto ka kongkono te'onto hawe ta'u ko'orua poparentaano i Dariusu, mokole i Perisia.