Esera 3 - Wunta Mempori

Mpowangua meda pontunua pesomba 3:1-7

¹ Mansano hawe wula ko'opitu, to Isaraeli mpo'ia iramo a luwuno kotado, liu ira ntepumpu luwu i Yerusale.

² Tempo atuu i Yesua anano i Yosada saru luwuno pepaekompono, luwuno sando mpesomba ka i Serubabeli anano i Sealitieli saru luwuno pepaekompono mpowangu meda pontunua pesomba ndi Ondae Ue Alado to Isaraeli ka dompompesombaako pesomba tinunu i wawono, menunu anu teburi a wunta Taurano i Musa, tetenaa-Do Ue Ala.

³ Domewanguo meda pontunua pesomba atuu a mpo'iangano amba-ambano, maupo domedoitoako ira luwuno tongku i wita atuu, ka do'amba pesombaakono i wawono pesomba tinunu tempono mo'oru ka ngkiniwia ndi Ondae i Ue.

⁴ Domeweweuo mbo'u rame-rame oleo langkai Laika Lewe Ngkeu, menunu saru anu teburi, ka sompo oleo mpopesombaako ira pesomba tinunu, montonda hadiono anu pinakosi tiano sompo oleo.

⁵ Mompu'u i tempo atuu, mpopesombaako iramo anu wela pinesombaako, ka pesomba tinunu a pompu'uano wula ka sompo oleo langkai pinokomempori-Do i Ue, saru sompo mia mpopesombaako pesomba moleono aroano ndi Ondae i Ue.

⁶ Mompu'u oleo amba-ambano wula ko'opitu, mpopu'u iramo mpompesombaako pesomba tinunu ndi Ondae i Ue, sine pondasino Raha Mempori-Do i Ue naapo koa mbo'u domeweweuo.

⁷ Ka do'amba mpoweako ira doi puu mpo'angga watu ka keu, ka a nto Sidoni ka to Tirusi, dompoweeako ira kaanga, inua, ka lana, hangano ondae andio mpowawa keu arasi inso i Libano hawe a ntahi umpeda i Yapo, kana anu i'induako iramo i Koresi, mokole i Peresia.

Poweweua pondasino Raha Mempori 3:8-13

⁸ Ko'orua nta'uno, wula ko'orua, umarido mehawe a Raha-Do Ue Ala i Yerusale, i Serubabeli anano i Sealitieli ka i Yesua anano i Yosada pu'uo anggaa atuu saru luwuno pepaekompodo anu susua, onaemo luwuno sando mpesomba ka to Lewi, saru luwuno mia anu mpekule i Yerusale inso a mpo'ianga domentinawa. To Lewi anu tinuwuno rua pulu nta'u ka torea, dotena ira mpodagai anggaano mowangu Raha-Do i Ue.

⁹ Ka i'amba i Yesua saru luwuno anano ka luwuno pepaekompono mbo'u i Kadamieli ka luwuno anano, luwudo to Yehuda, mperonga-ronga dumagai ira puu mpo'angga anu mewanguo Raha-Do Ue Ala. Kanatuu koa mbo'u inuleno i Henadadi, luwuno anano ka pepaekompono, to Lewi atuu.

¹⁰ I tempono pondasino Raha Mempori-Do i Ue domeweweuo mia mpo'angga, luwuno sando mpesomba mpesangkaako sangka sando mpesomba ka mpowawa napiri, saru luwudo to Lewi inso a inuleno i Asapi mpowawa tawa-tawa kodei, umunde-unde Ira i Ue, montonda pontiso inso ndi Daudi, mokoledo to Isaraeli.

¹¹ Ondae mpesangki-sangki mpenaniako penani po'unde-unde ka mawongko ndi Ondae i Ue, ”Hangano moiko Ira! Menteeano pompehohawa-Do a nto Isaraeli ranta nahina tampulaano!” Luwuno bawaa mpeboo-booli meroku umunde-unde Ira i Ue, hangano pondasino Raha-Do i Ue, wineweuomo.

¹² Sine, hadio i olodo sando mpesomba, to Lewi ka petewawa suku, mia memota'u anu hori ira mengkitao raha anu amba-ambano, mpengese ira meroku, tempono i wineweu pondasino raha andio i arodo matado, kontongaado mia hadio mpeboo-booli meroku memawongko ntu'u.

¹³ Mia hadio atuudo, nami teto'ori mbo'u, isua unino pebooli mawongko, ka isua unino pebooli mpengesedo palili, hangano palili mpebooli meroku, ranta unino teronge hawe olai.