Esera 10 - Wunta Mempori

Po'atorano i Esera a mpekombia mpesalo 10:1-44

¹ Kontongaano i Esera menggolontu mekakai ka ipengese mangakuakono hala i arono Raha-Do Ue Ala, tepumpuomo bawaa to Isaraeli hadio ira ntu'u umpeda ndi onae, tama, beine, ka nana'ote. Mia atuudo mpengese meroku ntu'u.

² Mepauomo i Sekania anano i Yehieli, inso a inuleno i Elami, ipotaeakono i Esera, ”Omami nahi kimpetenunu ndi Ondae Ue Alato, hangano mpekombiaako kamimo beinedo tongku susua i wita andio. Sine, kanandio-andio da hinao pomperorohiado to Isaraeli.

³ Kanandio-andio, aiwamo ka tompowutu pedandia saru Ondae Ue Ala, nine kita mentena ira luwu melako beine atuudo saru nana'ote anu pine'anaakodo, tumondao patudumiu ka luwuno mia anu medoito a parenta-Do Ue Alato. Po'ineeomo luwuno atuu iwineweu montonda songka hopulu.

⁴ Pentademo, hangano atuu anggaamu; kami koa menteahakomu. Pokorosoo aroamiu ka weweuomo!”

⁵ Mentadeomo i Esera ka itena ira petewawa sando mpesomba, to Lewi, ka luwudo to Isaraeli mpesumpa, nine ira meweweuo luwuno anu pinau atuu; umarino atuu mpesumpa iramo.

⁶ Ka i'amba i Esera lumako inso i arono raha-Do Ue Ala, mewinso a bolongkono i Yohanani anano i Eliasibi, ka i ra'aimo iperato, nahi pongkaa roti ka nahi po'inu uwoi, hangano mia mentinadi atuu nahi dompetenunu onaemo ka ipompemasusa.

⁷ Ka i'amba pinaleleomo pepopoto'ori i Yehuda ka i Yerusale a luwuno mia anu mpekule inso a mpontadia nine ondae asalakono mpepumpu i Yerusale.

⁸ Isemamo koa anu nahi hawe i larono otolu oleo, asalakono montonda pomputusido luwuno petewawa ka mia pinemota'u, luwuno arataano ta inala ka ta pinonsia inso a bawaa anu mpekule inso a mpo'ianga domentinadi.

⁹ Ka i'amba mpepumpu iramo luwuno tama to Yehuda ka to Benami i Yerusale i larono otolu oleo atuu, onaemo a wula ko'osio tanggala rua pulu wula atuu. Luwuno palili mpentoro a kintalano raha-Do Ue Ala, saru mebiibi hangano mongkona atuu ka hangano usa marombo.

¹⁰ Mentadeomo sando mpesomba i Esera, ka ipotaeako ira, ”Omiu nahi mpetenunu, hangano mpokombia komiu beinedo mia mehawe, ka hangano kanatuu imentiangiomo salado to Isaraeli.

¹¹ Sine kanandio-andio, ime'akuiomo i aro-Do i Ue, Ue Alado uempu'umiu, impoweweumo hapa anu pinemoiko-Do impeliahako inso luwuno tongku i wita andio, ka luwuno beinedo mia mehawe atuudo.”

¹² Ka do'amba mesangki bawaa, mpebooli meroku, ”Moiko, lano asalakono kami meweweuo kana pinaumiu atuu.

¹³ Sine mia andiodo mehadio ira ka ndio tempono usa, ranta nahina mia anu polio mentade i bungkuno. Anggaa andio, komba poko'umaria asa ke orua oleo, hangano anu kanatuu hadioomo pe'ewa wineweu mami.

¹⁴ Moikoano, luwudo petewawa mami, sumaru ngkoroi ira luwuno bawaa, ka moikoano sompo mia i luwuno kota po'ianga mami anu mpekombiaako beinedo mia mehawe, aiwa mpe'aro a tempo anu tinantui, ka mperonga ondae saru luwuno mia pinemota'u ka luwuno puu mpobitara i sompo kota, ranta tekuda-Do Ue Ala mami anu tensila hangano wineweu andio pinoko'olai inso ndi omami.”

¹⁵ Butu i Yonata anano i Asaeli, ka i Yahasea anano i Tikiwa umewaio mongkona atuu, iteahakaono i Mesulami ka i Sabetai, to Lewi atuu.

¹⁶ Sine, ondae anu mpekule inso a mpo'ianga domentinadi, kongkodo meweweuo. Ka i'amba sando mpesomba Esera mobiniki ba opia mia, petewawado anu mpepe'etu, sompo mia montonda pepe'etuano, ka luwuno binuri neeno. I oleo amba-ambano wula kohopulu, menteriso ira memparesao kara-kara atuu.

¹⁷ Dompoko'umario luwuno teweweudo mia anu mpokombia beinedo mia mehawe atuu, i oleo amba-ambano wula ko'asa.

¹⁸ I olodo sando mpesomba anu mpokombia beinedo mia mehawe, onaemo inso a inuleno i Yesua anano i Yosada ka luwuno pepaekompono: i Ma'asea, i Eliese, i Yaribi ka i Gedalia.

¹⁹ Domentaangakono kaedo gagi dandi, tumena ira kombiado melako. Ka do'amba mpopesombaako asa bimba lakino inso a asa bawaa bembe bimba gagi pesomba pontolosi salado.

²⁰ Umarino atuu, inso a inuleno i Imere: i Hanani ka i Sebadia;

²¹ ka inso a inuleno i Harimi: i Ma'asea, i Elia, i Semaia, i Yehieli ka i Usia;

²² ka inso a inuleno i Pasuri: i Elio'enai, i Ma'asea, i Isumaeli, i Netane'eli, i Yosabadi ka i Elasa.

²³ Inso a nto Lewi: i Yosabadi, i Simei, i Kelaia onaemo i Kelita, i Petahia, i Yehuda ka i Eliese.

²⁴ Inso a luwuno puu mpenani: i Eliasibi. Inso a luwuno puu mpodagai pewowa langkai: i Salumi, i Telemi ka i Uri.

²⁵ Inso i olodo to Isaraeli anu susua, onaemo inso a inuleno i Parosi: i Ramia, i Yesia, i Malikia, i Miami, i Eleasa, i Milikia ka i Benaia;

²⁶ inso a inuleno i Elami: i Matania, i Sakaria, i Yehieli, i Abidi, i Yeremoti ka i Elia;

²⁷ inso a inuleno i Satu: i Elio'enai, i Eliasibi, i Matania, i Yeremoti, i Sabadi ka i Asisa;

²⁸ inso inuleno i Bebai: i Yohana, i Hanania, i Sabai ka i Alitai;

²⁹ inso a inuleno i Bani: i Mesulami, i Maluki, i Adaia, i Yasubi, i Seali ka i Yeramoti;

³⁰ inso a inuleno i Pahati-Moabi: i Adina ka i Kelali, i Benaia, i Maaseia, i Matania, i Besaleeli, i Binuya ka i Manasia;

³¹ inso a inuleno i Harimi: i Eliese, i Yisia, i Malikia, i Semaia, i Simeo,

³² i Nenami, i Maluki, ka i Semaria;

³³ inso a inuleno i Hasumu: i Matinai, i Matata, i Sabadi, i Elipeleti, i Yeremai, i Manasie, ka i Simei;

³⁴ inso a inuleno i Bani: i Ma'adai, i Amirami, i Ueli,

³⁵ i Benaia, i Bedeia, i Keluhu,

³⁶ i Wania, i Meremoti, i Eliasibi,

³⁷ i Matania, i Matinai, i Ya'asai;

³⁸ inso a inuleno i Binui: i Simei,

³⁹ i Selemia, i Natani, i Adaia,

⁴⁰ i Makinadabai, i Sasai, i Sarai,

⁴¹ i Asare'eli, i Selemia, i Semaria,

⁴² i Salumi, i Amaria ka i Yusupu;

⁴³ inso a inuleno i Nebo: i Yeieli, i Matitia, i Sabadi, i Sebina, i Yadai, i Yo'eli ka i Benaia.

⁴⁴ Luwudo mpokombia beinedo mia mehawe; onaemo ka domentera ira luwuno beinedo atuu melako saru luwuno anado.