Esera 1 - Wunta Mempori

I Koresi umindu ira mia mentinawa mpekule wali mpowangu Raha Mpesombaa

¹ A nta'u amba-ambano poparentaano i Koresi, mokole i Peresia, Ondae i Ue lumeluo aroano i Koresi, mokole Peresia atuu, ka ite'ihii pau-Do iUe anu pinauno i Yeremia. Onaemo ka ipinalele pepopoto'ori andio a luwuno poparentaa, pinau ka binuri, kanandio,

² ”Kanandiomo songkado i Koresi, mokole i Peresia: Luwuno poparentaa i wawontolino, Dowee akumo i Ue, Ue Alano asa wawontolino pabawaio. Ondae tumena aku mowangu Raha Mpesombaa i Yerusale, i wita Yehuda.

³ Isema ndi omiu anu tewinso bawaa-Do, po'ineeomo ka Dokongkomio Ue Alano, ka ipepokule i Yerusale, i wita Yehuda, ka iwanguo Raha-Do i Ue, Ue Alado to Isaraeli, Ondae Ue Ala anu mo'ia i Yerusale.

⁴ Sompo mia anu da tebinta maupo isua ipo'ia kana mia hawe, asalakono palili i tu'ai mpoweeakono salaka, wulaa, arataa ka pinotuwu, saru pesomba a moleono aroado, tiano powangu Raha-Do Ue Ala i Yerusale.”

⁵ Onaemo ka dompepatinda petewawado suku Yehuda ka to Benami saru luwudo sando mpesomba ka to Lewi, sompo mia anu aroano Doleluo Ue Ala ka ipekule mowangu Raha-Do i Ue i Yerusale.

⁶ Luwuno mia petengi-tengido mpopokowali mpompowee sangka salaka, wulaa, arataa ka pinotuwu, saru pompowee anu mentudu, naapo mbo'u luwuakoano anu dompesombaakono a moleono aroado.

⁷ Mokole Koresi metena mbo'u lumuarakono parewano Raha-Do i Ue anu winawano i Nebukanesa inso i Yerusale ka inaao a laro raha pesombaa susua.

⁸ I Koresi, mokole i Peresia, metena kai linuarako luwu ka idagaio i Metireda, puu pompekaria arataano mokole, onae anu dumoaakono luwu i Sesibasari, petewawado to Yehuda.

⁹ Ndiomo burino; tolu pulu loea kodei wulaa, asa nsowu loea kodei salaka, rua pulu ka osio piso,

¹⁰ tolu pulu piala wulaa mekaru, hinao mbo'u pato etu ka hopulu piala salaka mekaru, asa nsowu sangka susua.

¹¹ Luwuno parewa wulaa ka salaka atuu, porokono lima nsowu ka pato etu. Luwuno atuu iwawao i Sesibasari i Yerusale, tempono dompekule mia mentinawa atuu inso i wita Babeli.