EPESU 6 - Wunta Mempori

Pomperorongeako ka pompehohawa 6:1-9

¹ Hei nana'ote, impomperorongeako a mia mota'umiu ndi Ondae i Ue, hangano asalakono ka ikanandio.

² Pelangkai iramo amamiu ka inemiu – onaemo andio aasa songka anu polalua, kana anu mengkaa inso a dandi andio:

³ ka imeme'ura koa ka melai tinuwumiu i tolino.

⁴ Ka omiu, luwuno ama, si mpokontekuda ira anamiu, sine imempaguru iramo a pompaguru ka patudu-Do i Ue.

⁵ Hei luwuno ata, impomperorongeakomo a uemiu anu i wawontolino saru medoito ka mpondidi-ndidi, ka temoleo aroamiu mengkena kana impomperorongeako ndi Ondae i Kerisituu,

⁶ si komba butu i arodo ka isanaa aroado mia, sine kana tetenaa-Do i Kerisituu anu meweweuo po'ehe-Do Ue Ala tompaano aroado,

⁷ ka anu moleo aroa molempao pompekakaakono kana luwuno mia anu mo'anggaako Ira i Ue ka komba mia.

⁸ Imento'orio, nine sompo mia, moiko ata, maupo mia maradeka, tewala hinaomo wineweuno anu moiko, onae ta montarima sulono inso ndi Ondae i Ue.

⁹ Ka omiu anu pe'uea, imeweweuomo mbo'u kanandio ndi ondae ka impoko'olaio pompokodoito. Impewowoloo, nine Uedo ka Uemiu kongko Ira i suruga ka nahi Dopongkita rupano mia.

Parewa rohani 6:10-20

¹⁰ Poko'ariano, imemorosomo ndi Ondae i Ue, a morosono pabawa-Do.

¹¹ Impokonaomo luwuno parewa mpetea-Do Ue Ala, ka impokompekorahako umewaio pompopo'oono i Mosa'o;

¹² hangano peteahakoto komba mo'ewai rea ka ihi, sine umewai ira anu mpeparenta, umewai ira anu mempabawa, umewai ira petewawa wawontolino anu wongi-wongi andio, umewai ira onitu nsa'o i laro meene.

¹³ Onaemo pu'uno ime'alaomo luwuno parewa mpetea-Do Ue Ala, ka impokompe'ewa koa a oleo anu mosa'o atuu ka kongko mpentade, umarino impoko'umario luwuakoano.

¹⁴ Gaagi impentademo temoroso, ka impeboo ntongaako menteea ka mpelemba labuako moleoa,

¹⁵ karu mpesapatuako moleono aroa ka imempaleleo Lele Mawongkoa anu mowawa rodoa;

¹⁶ a luwuno teweweu impekantaakomo pompe'ala-ala, hangano saru kanta atuu komiu mpokompepateo luwuno panano i Mosa'o anu me'api,

¹⁷ ka imentarimaomo songko tekaduduia ka ponai-Do Penaa, onaemo pau-Do Ue Ala,

¹⁸ a luwuno pekakai ka po'ema. Impekakaimo sompo tempo a Mpenaa ka impetangkoromo a laro mpekakaimiu atuu saru nahi otu-otu impo'emaako ira luwuno mia mempori,

¹⁹ saru mbo'u ongkue, nde tewala ku'ungkahio ngangaku, ka kupinoweeako pau anu mentee, ka kumosia paleleo rahasiano Lele Mawongkoa,

²⁰ anu inanggaku gagi tinena anu tinorungku. Impekakaimo ka kumosia koa mokomengkaao, kana anu tekona kupauo.

Pompoto'oari - Tabea 6:21-24

²¹ Ka imento'orio koa mbo'u teweweu ka mongkona inanggaku, ka i Titiku, pepaekompoto anu kinekewoi ka puu pompekakako anu metenunu ndi Ondae i Ue, ka pauakomiu luwuno.

²² Saru tinoomo andio onae kutenao ndi omiu, onaemo ka imento'orio mongkona inanggamami ka itareroo aroamiu.

²³ Rodoa ka pompehohawa saru pompe'ala-ala inso ndi Ondae Ue Ala, Ama ka inso ndi Ondae Ue Yesu Kerisituu kumongkomi komiu luwu pepaekompo.

²⁴ Pe'aroaa kumongkomi ira luwu mia anu mehohawaako ira pompehohawa anu nahi tampula Ondae Ueto i Yesu Kerisituu.