EPESU 5 - Wunta Mempori

Tuwu kana anano mewine 5:1-21

¹ Onaemo pu'uno imegagimo anu metonda Ira Ue Ala, kana nana'ote anu pinehohawa

² ka imentuwumo a pompehohawa, kana Ondae mbo'u i Kerisituu Yesu Dopehohawa komiumo ka Dopeweengakonomo koroi-Do hangano ontae gagi pompowee ka pesomba anu mana mo'ahi ndi Ondae Ue Ala.

³ Sine pebelesua ka mperupa-rupa mokoburua ke modoko maupo pinewua i olomiu osi'i, kana pototodo mia memempori.

⁴ Kanatuu koa mbo'u pau anu mokoburu, anu nahina tuduno ke anu mondeenomo koa – hangano mongkona luwuno andio nahi tekona – sine tendeano impontarimakasimo.

⁵ Hangano impewowoloomo andio temoiko: nahina mia belesu, mia anu mokoburu ke mia modoko, pengkonaano anu mesomba a lahumoa, anu mohawe tia a Poparentaa-Do i Kerisituu ka Ondae Ue Ala.

⁶ Omiu si ntepopo'ooako luwuno paudo mia anu nahina tuduno, hangano mongkona anu kanandio mokontekuda Ira Ue Ala a luwuno mia lambaha.

⁷ Onaemo pu'uno si mpewali-waliako ira.

⁸ Lano i ndi'upua mewongi-wongi komiu, sine kanandio-andio memewine komiu ndi Ondae i Ue. Onaemo pu'uno imentuwumo gagi anano mewine,

⁹ Hangano mewine butu mewuaako moikoa ka moleoa ka menteea,

¹⁰ ka impepenteeo hapa anu pinemoiko-Do i Ue.

¹¹ Si mpompokowali a luwuno wineweu wongi-wongi anu nahi pewuaako hapa-hapa, sine tendeano imposabaomo luwuno wineweu atuu.

¹² Hangano maupo mewuaomo koa hapa anu mewineweudo a po'ianga anu tewuni mompokoko'ii.

¹³ Sine luwuakoano anu iposabaomo mewine atuu gagi tengkita, hangano luwuno anu tengkita onaemo mewine.

¹⁴ Onaemo pu'uno ka ipinau, ”Impewangumo, hei omiu anu mpoturi ka impewangumo inso i olodo mia mate ka Ondae i Kerisituu Ira wantahi komiu.”

¹⁵ Onaemo pu'uno, impekokoongakono temoiko, ba kana'umpe imentuwu, si mengkana mia monge-monge, sine kana mia pande,

¹⁶ ka imempakeomo tempo anu hina, hangano luwuno oleo andio mosa'o.

¹⁷ Onaemo pu'uno si mebenge-benge, sine impeteahakomo ka imento'orio po'ehe-Do i Ue.

¹⁸ Ka si memolanguako anggoro, hangano anggoro mompokohina po'eheno koroi, sine po'ineeomo ka imebukeako Penaa,

¹⁹ ka impepau-pauakomo po'unde-unde pada omiu, penani pompelangkai ka penani rohani. Impenanimo ka impeboolimo ndi Ondae i Ue tompaano aroamiu.

²⁰ Impotarima kasimo mpiha a luwuakoano a nee-Do Ueto i Yesu Kerisituu ndi Ondae Ue Ala ka Amato

²¹ ka imemambe pe'urumako hangano doitoako Ira i Kerisituu.

Pompehohawa-Do i Kerisituu onaemo pu'uno tuwudo mia mekokombia 5:22-33

²² Hei beine, petuudumo a ntamamu kana ndi Ondae i Ue,

²³ Hangano tama onaemo uluno beine mengkena kana Ondae i Kerisituu uluno bawaa. Ondaemo anu kumaduduio koroi.

²⁴ Onaemo pu'uno kana petuundudo bawaa ndi Ondae i Kerisituu, kanandiomo mbo'u beine a ntamano a laro luwuakoano.

²⁵ Hei tama, pehohawaomo beinemu kana Ondae i Kerisituu Dopehohawa iramo bawaa ka Dopeweengakonomo koroi-Do hangano Ondae

²⁶ ka Dopokomemporio, umari-Do mokomempori ira bahoako ira uwoi ka pau-Do,

²⁷ ka ikanandio bawaa Donaao i aro-Do ka imaramba nahina tataano ke tengkuru ke pengkenano, sine ka imempori bawaa ka nahina tataano.

²⁸ Kanandio koa mbo'u tama asalakono ka ipehohawao beineno mengkena kana koroino onaeno: Isema anu mehohawao beineno ipehohawao koroino onaeno.

²⁹ Hangano mia nahi hori umo'aliaakono koroino onaeno, sine ipotuwuo ka ipekakaakono, mengkena kana Ondae i Kerisituu a bawaa,

³⁰ hangano ontae onaemo parewa ngkoroi-Do.

³¹ Onaemo pu'uno tama ta bintao amano ka ineno ka ipe'asaakono beineno, ranta orua ira atuu gagi me'asa ngkoroi.

³² Rahasia andio langkai, sine anu tinooku onaemo penggoea-Do i Kerisituu ka bawaa.

³³ Maupo kana'umpe, singge mia ndi omiu asalakono: pehohawaomo beinemu kana koroimu omuemu ka beine ka ipelangkaio tamano.