EPESU 4 - Wunta Mempori

Tepo'asaado bawaa ka pompowee anu mpesingge-singge 4:1-16

¹ Onaemo pu'uno ku'emao ntu'u ndi omiu, ongkue, mia anu tinorungku hangano Ondae i Ue, ka imentuwu gagi mia anu mempinoboi komiumo menunu saru pepoboi atuu.

² Iwela koa mpekoko'unduako, memauru, ka sabara. Impopokitaomo pompehohawamiu a laro mongkona mambe tulungi.

³ Ka impeteahakomo mpekakaakono tepo'asano Penaa hangano te'onggoako rodoa:

⁴ aasa koroi, ka aasa Penaa, ba kana'umpe imempinoboi a aasa pomperorohia anu tewinso a mpoboimiu,

⁵ aasa Ue, aasa pompe'ala-ala, aasa pebaho,

⁶ aasa Ue Ala ka Amado luwuno, Ondae Ue Ala anu i wawono luwuno ka hangano luwuno ka i larono luwuno.

⁷ Sine ndi ontae singge mia mempinoweeako kitamo pompehohawa montonda sa'uno pompowee-Do i Kerisituu.

⁸ Onaemo pu'uno ka ipinau a Wunta Mempori, ”Tempono Dopewuatako a mpo'ianga mantande, Dowawa ira mia mentinawa; Dopoweeako ira mia hadio pompowee.”

⁹ Kombake ”mewuatako Iramo” pengkonaano, nine metii Iramo mbo'u i tolino anu lalu i totono?

¹⁰ Ondae anu metii Iramo, Ondae koa mbo'u anu mewuatako Iramo olaiopo lalu mantande sekonopo luwuno langi, mokobukeo luwuakoano.

¹¹ Ka Ondaemo anu moweeako ira moiko luwuno tinena maupo luwuno nabi, moiko luwuno anu mompalele Lele Mawongkoa maupo luwuno puu pompakambi ka luwuno anu mompaguru,

¹² ka dopatinda ira mia memempori a mpo'anggaa mompekakaako, a mpowangua koroi-Do i Kerisituu,

¹³ ranta ka tontepo'asamo luwu a pompe'ala-ala ka ponto'ori anu mentee mongkona Ana-Do Ue Ala, sompoomo tinuwu, ka tuwuno anu menunu saru bobotoli-Do i Kerisituu,

¹⁴ ranta komba menana'ote kita mbo'u, anu ngkoraane-ngkoramai hangano mperupa-rupa angi pompaguru, hangano pepalindodo mia anu nahi mentee a mpe'akalado anu mompopo'oo,

¹⁵ sine temoroso tompe'ini a menteea a laro pompehohawa ka tomentuwu a luwuakoano te'aro ndi Ondae, i Kerisituu, anu ondaemo Tadulako.

¹⁶ Insomo ndi Ondae asa ngkoroi, – anu tepotuda moiko ka inonggo gagi aasa hangano pompekakaakono luwuno parewa ngkoroi, menunu saru pinoko'anggano sompo-sompo parewa ngkoroi – montarima tuwuno ka wanguo koroino a laro pompehohawa.

Mia wo'ohu 4:17-32

¹⁷ Onaemo pu'uno ka kupauo ka kupokomanasaakomiu andio ndi Ondae i Ue: Si mentuwu mbo'u mengkena kana mia anu nahi domento'ori Ira Ue Ala saru pinewowolodo anu nahina tuduno

¹⁸ ka ponto'orido anu wongi-wongi, olai inso a ntuwu tepo'asaa saru Ondae Ue Ala, hangano benge-bengea anu kongko i larodo ka hangano moteano aroado.

¹⁹ Nami hina mokoko'iido, onaemo ka dompeweengakono koroido a mpo'eheno aroado ka saru me'alu. Meweweuo mperupa-rupa mokoburua.

²⁰ Sine omiu komba kanandio. Mpepaguru komiumo tumo'ori Ira i Kerisituu.

²¹ Hangano imerongeomo mongkona Ondae ka mentarimao pompaguru ndi Ondae montonda menteea anu mengkaa ndi Ondae i Yesu,

²² onaemo nine omiu, hangano tuwumiu anu i ndi'upua, asalakono imelolohio mia laano, anu mohawe mateano hangano po'eheno aroano anu mompopo'oo,

²³ ka imempinokowo'ohu a laro mpenaa ka pinewowolomiu,

²⁴ ka impokonao mia wo'ohu, anu pinokogagiomo montonda po'ehe-Do Ue Ala a menteea ka memporia anu menteeano.

²⁵ Onaemo pu'uno imentadiomo pegaupi ka isinggemo mpepau mentee a mpe'asa miamiu, hangano pada kitamo parewa ngkoroi.

²⁶ Tewala gagi komiu ntekuda, si mpoweweu hala: si mentekuda hawe ka isumoo oleo

²⁷ ka si mpoweeakono tempo i Mosa'o.

²⁸ Mia anu monako, siimo mbo'u iponako, sine moikoopo ipo'angga ntu'u ka i'anggaakono kaeno onaeno anggaa anu moiko ka ihina koa ipokompontiaako ira mia memakura.

²⁹ Si hina pau anu mokoburu inso a wiwimiu, sine impepauakomo pau anu moiko anu mompokoroso, ba isua ikinere, ka dompohawe pompehohawa mia anu merongeo.

³⁰ Ka si mpokomasusa Ira Penaa Mempori-Do Ue Ala, anu tumondoni komiumo a haweano oleo pongkaduduia.

³¹ Luwuno mahaki aroa, bamburua, tekudaa, teposisalaa ka pomposebe asalakono imentadio inso i olomiu, kanatuu koa mbo'u luwuno wineweu mosa'o.

³² Sine po'ineeomo ka imemambe pe'aroaako, buke pompehohawa ka mambe'ampuni, kana Ondae Ue Ala Do'ampunikomiumo ndi Ondae i Kerisituu.