EPESU 2 - Wunta Mempori

Luwuno onaemo pompehohawa 2:1-10

¹ I ndi'upua memate komiumo hangano luwuno polimpaimiu songka ka luwuno halamiu.

² Mentuwu komiu i larono, hangano imentondao salano wawontolino andio, hangano impetenunuio anu pabawa a poparentaa i laro meene, onaemo penaa anu kanandio-andio kontongaano mo'angga i olodo mia anu umewai Ira Ue Ala.

³ Menteeano i ndi'upua luwumami tewinso koa mbo'u i olodo, tempono kimentuwu a po'eheno aroa ka mentondao po'eheno koroi ka pinewowolomami anu mosa'o. Menteeano omami onaemo mia anu asalakono mentinekudaako, mengkena kana ondae anu mehano.

⁴ Sine Ondae Ue Ala anu kaeaako pompowee, hangano pompehohawa-Do anu langkai, anu Dowee kita,

⁵ motuwu kitamo meronga saru Ondae i Kerisituu, maupo tomematemo hangano luwuno salato – hangano pompehohawa mengkinadudui komiu –

⁶ ka ndi Ondae i Kerisituu Yesu Dowangu kitamo mbo'u ka mowee kita po'ianga meronga saru Ondae i suruga,

⁷ ka Dotisoakita a tempo anu ta hawe kaeano pompehohawa-Do anu hadio ntu'u menunu saru moiko-Do ndi ontae ndi Ondae i Kerisituu Yesu.

⁸ Nde hangano pe'aroa ka imengkinaduduiako pompe'ala-ala; atuu komba hasilino usahamiu, sine pompowee-Do Ue Ala,

⁹ atuu komba hasilino inanggamiu: si hina mia anu mompelang-kalangkai.

¹⁰ Hangano ontae andio wineweu-Do Ue Ala, pinokogagi ndi Ondae i Kerisituu Yesu ka tomeweweuo anggaa moiko, anu pinatinda-Do Ue Ala se'eluno. Inehe-Do ka tomentuwu i larono.

Pino'asa ndi Ondae i Kerisituu 2:11-22

¹¹ Onaemo pu'uno impewowoloomo, nine i ndi'upua omiu – anu komba to Yahudi montonda koroi, ondae anu meneeakono koroido ”tindi” meneeakomiu mia nahi mpetindi, onaemo petindi ngkoroi anu inanggano kaeno mia, –

¹² nine tempo atuu nahi imento'ori Ira i Kerisituu, nahi ntewinso to Isaraeli ka nahi mpohawe tia a luwuno pompakosi anu dinandi, nahina pomperorohia ka nahina Ue Ala i wawontolino.

¹³ Sine kanandio-andio omiu a ntepo'asaa saru Ondae i Kerisituu Yesu, anu i ndi'upua ”me'olai”, gagiomo ”umpeda” hangano rea-Do i Kerisituu.

¹⁴ Hangano Ondaemo rodoato, anu mo'asa iramo orua ntia ka anu mobangkuomo rere watu po'oloti, onaemo teposisalaa,

¹⁵ hangano mate-Do kana mia Do'oniniomo songka Taura saru luwuno petena ka pompakosino, ka iwineweu oruano gagi asa mia wo'ohu a ngkoroi-Do, ka hangano atuu mompokohina rodoa,

¹⁶ ka dosintuwu oruano, i laro aasa ngkoroi, saru Ondae Ue Ala hangano keu pinotamba, saru mokotampulao teposisalaa atuu a ngkeu pinotamba atuu.

¹⁷ Hawe Ira ka paleleo rodoa ndi omiu anu ”me'olai” ka rodoa ndi ondae anu ”me'umpeda”,

¹⁸ Nde hangano Ondae ontae anu orua ntia a laro aasa Penaa mpohawe pesalaa mewinso ndi Ondae i Ama.

¹⁹ Kanandiomo omiu komba mia susua mbo'u ka mia hawe, tendeano mpe'asa komiumo saru mia memempori ka ihino raha-Do Ue Ala,

²⁰ anu winangu me'empehiako luwuno tinena ka luwuno nabi, ka Ondae i Yesu Kerisituu gagi watu empehino a nsiuno.

²¹ Ndi Ondae tuwu luwuno winangu, tepotuda moiko, gagi raha-Do Ue Ala anu mempori, ndi Ondae i Ue.

²² Ndi Ondae mewinangu komiu koa mbo'u gagi po'ianga-Do Ue Ala, a laro Mpenaa.