EPESU 1 - Wunta Mempori

Tabea 1:1-2

¹ Inso ndi Paulu, tinena-Do i Kerisituu Yesu hangano po'ehe-Do Ue Ala, a luwuno mia mempori i Epesu, mia mpompe'ala-ala ndi Ondae i Kerisituu Yesu.

² Pompehohawa ka rodoa inso ndi Ondae Ue Ala, Amato ka inso ndi Ondae Ue Yesu Kerisituu kumongkomi komiu.

Kaeado mia anu tebiniki 1:3-14

³ Inunde-unde Iramo Ue Ala ka Ama-Do Ueto i Yesu Kerisituu anu ndi Ondae i Kerisituu Dopowee kitamo ronso rohani i laro nsuruga.

⁴ Hangano ndi Ondae Dobiniki kitamo Ue Ala se'eluno napi pinokogagi wawontolino, ka tomemempori ka nahina tataato i aro-Do.

⁵ A laro pompehohawa Dopakosi kitamo inso a pompu'uano hangano Ondae i Yesu Kerisituu ka tomegagi ana-Do, menunu saru po'ehe-Do Ondae-Do,

⁶ ka i'unde-undeomo pompehohawa-Do anu maramba, anu Doweeakita ndi Ondae, anu pinehohawa-Do.

⁷ Hangano ndi Ondae ka hangano rea-Do ka tompohawe tetolosia, onaemo po'ampunia hala, montonda kaeano pompehohawa-Do,

⁸ anu hadio ntu'u Doweeakita a luwuno ponto'ori ka pohaweno aroa.

⁹ Hangano Dopokomengkaaomo rahasiano po'ehe-Do ndi ontae, menunu saru tinoo-Do Ondae-Do, onaemo tinoo-Do Ondae-Do anu inso amba-ambano Dopakosiomo ndi Ondae i Kerisituu

¹⁰ gagi pepatinda haweno tempo ka ipino'asa ndi Ondae i Kerisituu gagi Tadulakono luwuakoano, moiko anu i suruga maupo anu i tolino.

¹¹ Kupauo ”ndi Ondae i Kerisituu”, hangano ndi Ondae kimpohawe tia anu dinandi – omami anu inso amba-ambano pinakosi ka kimentarimao tia atuu menunu saru tinoo-Do Ue Ala, anu i larono luwuakoano mo'angga montonda pompakosino po'ehe-Do –

¹² ka omami, anu se'eluno mpomperorohi kamimo ndi Ondae i Kerisituu, moiko gagi unde-undeno maramba-Do.

¹³ Ndi Ondae omiu mbo'u – hangano imerongeomo pau menteea, onaemo Lele Mawongkoa tekaduduiamiu – ndi Ondae omiu mbo'u, tempono impompe'ala-ala, mentinondoniako Penaa Mempori, anu dinandi-Do atuu.

¹⁴ Ka Penaa Mempori atuu onaemo pe'inia ndi ontae ranta ka tomehaweo luwuno, onaemo tetolosia anu mokogagi kita mia-Do Ue Ala, ka tome'unde-undeo maramba-Do.

Pekakai tiano pohaweno aroa mongkona maramba-Do i Kerisituu 1:15-23

¹⁵ Onaemo pu'uno, mansaku rumongeo mongkona pompe'ala-alamiu ndi Ondae Ue Yesu ka mongkona pompehohawamiu a luwuno mia mempori,

¹⁶ nahi kupenaa-naa montarimakasi Ira Ue Ala hangano omiu. Ka kuwela rumambe komiu a laro mpekakaiku,

¹⁷ ka umemao ndi Ondae Ue Ala Ueto i Yesu Kerisituu, Ondaemo Ama anu maramba atuu, ka Dopoweeakomiu Penaa ponto'ori anu mentee ka mengkaa ka imento'ori Ira a menteeano.

¹⁸ Ka Dopokomewineo matano aroamiu, ka impokonto'orio pomperorohia anu kana'umpeke a laro mpepoboi-Do: kaeaako ntu'u marambaa tia anu Dopakosiako ira mia mempori,

¹⁹ ka tedoa langkai pabawa-Do ndi ontae anu mpompe'ala-ala, menunu saru rosono pabawa-Do,

²⁰ anu inangga-Do ndi Ondae i Kerisituu saru wangu Ira inso i olodo mia mate ka montoro Ira i koana-Do i suruga,

²¹ olai lalu mantande inso a luwuno anu mpeparenta ka anu mempabawa ka pabawa ka poparentaa ka sompo nee anu pinokopau, komba butu i wawontolino andio, tendeano i wawontolino koa mbo'u anu ta hawe.

²² Ka luwuakoano Donaaomo a toto ngkaru-Do i Kerisituu ka Ondae Doweeako iramo bawaa gagi Tadulako inso a luwuno anu hina.

²³ Bawaa anu onaemo koroi-Do, onaemo bobotolia-Do, anu buketio luwu ka luwuakoano.