Danieli 9 - Wunta Mempori

Pekakaino i Danieli 9:1-19

¹ A nta'u amba-ambano poparentaano i Dariusu, anano i Ahasiwero, inuledo to Midia, anu gagiomo mokole a poparentaado to Kasidimi,

² a nta'u amba-ambano poparentaano atuu, ongkue, i Danieli, mepenteeo a Wunta Mempori porokono ta'u anu montonda pau-Do i Ue ndi Nabi Yeremia ta gagi a nterawo-rawono Yerusale, hadiono pitu pulu nta'u.

³ Ka ku'amba mo'aroo rupaku ndi Ondae Ue Ala mekakai ka mo'ema, saru mepuasa ka mompokona sawu po'inombo saru awu.

⁴ Ku'emao ndi Ondae Ue Alaku, ka mangakuakono halaku, kanandio, ”Oo Ue, Ue Ala anu tedoa langkai ka mongkokongiri, anu uminio Pedandia, pe'aroa ka pompehohawa ndi ondae anu mehohawa Komiu saru me'ini a parenta-Miu!

⁵ Mpoweweu kamimo hala ka sala, mpoweweu kamimo gau mosa'o ka me'ewa, mepansia kamimo inso a parenta-Miu ka atora-Miu.

⁶ Nahi kimperorongeako ira tetenaa-Miu, luwuno nabi, anu mpepau iramo a nee-Miu a luwuno mokolemami, a luwuno petewawamami, ndi ondae amamami ka a luwuno palili.

⁷ Oo Ue, Omiumo anu mentee, sine tekonaomo kimemokoko'ii kana a oleo andio, omami to Yehuda, palilino kota Yerusale ka luwuno to Isaraeli, ondae anu me'umpeda ka anu olai, a luwuno wita ba isua Itadi ira hangano domehapu Komiu.

⁸ Oo Ue, omami, luwuno mokolemami, luwuno petewawamami ka ondae amamami tekonaomo kimemokoko'ii, hangano mpoweweu kamimo hala ndi Omiu.

⁹ Ndi Ondae i Ue, Ue Alamami, hinao pompehohawa ka po'oninia hala, maupo me'ewa kamimo ndi Ondae,

¹⁰ ka nahi kimperoromgeakono pau-Do i Ue, Ue Alamami, anu tumena kami mentuwu tumondao songka anu Dowee kamimo telalo a luwuno nabi, tetenaa-Do.

¹¹ Luwuno to Isaraeli domelimpaiomo songka-Miu ka mepansia hangano nahi domperorongeakono pau-Miu. Onaemo pu'uno ndi omami inuwuomo pontotonaa ka sumpa, anu teburi a wunta Taurano i Musa, tetenaa-Do Ue Ala, hangano mpoweweu kamimo hala ndi Ondae.

¹² Dopokorosoomo pau anu pinau-Do ndi omami ka mia anu parenta kamimo saru mowawaakami masolaa langkai anu napi hori gagi i totono asa wawo langi, kana i Yerusale.

¹³ Kana anu teburi a wunta Taurano i Musa, luwuno masolaa andio umalu kami, sine nahi kimpo'ema pompehohawa-Do i Ue, Ue Alamami, saru mpepokule inso a nsalamami ka mpenootio mentee-Miu.

¹⁴ Onaemo pu'uno, Ondae i Ue Dopatindaomo masolaa atuu ka motiiakami. Menteeano, Ondae i Ue, Ue Alamami, moleo a luwuno wineweu-Do, sine omami nahi kimperorongeakono pau-Do.

¹⁵ Onaemo pu'uno, oo Ue, Ue Alamami, anu iwawaako iramo kae anu moroso bawaa-Miu mpeluarako inso i wita Masiri ka weweuo nee-Miu telele kana a oleo andio, mpoweweu kamimo hala, mpoweweu kamimo gau mosa'o.

¹⁶ Oo Ue, menunu saru luwuno moleo-Miu, po'ineeomo tekuda ka bamburu-Miu moliu inso i Yerusale, kota-Miu, torukuno-Miu anu mempori. Hangano halamami ka salado uempu'umami weweuo Yerusale ka bawaa-Miu gagi tataado luwuno mia i horimami.

¹⁷ Oo Ue Alamami, kanandio-andio, Irongeomo pekakaino ka po'emano tetenaa-Miu andio. Iwantahiakonomo rupa-Miu po'ianga mempori-Miu anu terawoomo andio, me'empehiako Omiu Ue.

¹⁸ Oo Ue Alaku, po'aroomo biri-Miu ka Irongeomo. Wileomo mata-Miu ka Ikitaomo terawomami ka kota anu pinauako nee-Miu, hangano omami mpohaweo pekakai po'emamami i aro-Miu nahi kimpe'empehiako menteemami, sine me'empehiako pompehohawa-Miu anu hadio ntu'u.

¹⁹ Oo Ue, Irongeomo! Oo Ue, I'oniniomo halamami! Oo Ue, Ipensiroiomo ka Ipokogagiomo, siimo Ipotuluo, me'empehiako Omiu, oo Ue Alaku, hangano kota-Miu ka bawaa-Miu pinauako nee-Miu!”

Pitu pulu meluka opitu tempo 9:20-27

²⁰ Kontongaaku mepau, mekakai ka mangakuakono halaku ka halado tongkuku, tongku Isaraeli, ka mohaweo po'emaku i aro-Do i Ue, Ue Alaku tiano torukuno mempori-Do Ue Alaku,

²¹ da kontongaaku mepau a laro mpekakai, i Gabarieli anu kukitaomo a laro pongkita se'eluno i tempono mpopesombaako pesomba ngkiniwia, magasi ipenee te'aro ndi ongkue.

²² Ka i'amba paguru aku ka mepauakune, ”Danieli, kanandio-andio ongkue aiwa moweeakomu pompokonto'ori ka ponto'ori.

²³ Tempono upompu'u mohaweo po'emamu, meluarakoomo asa pau ka ongkue aiwa pauakomu, hangano omue tedoa pinehohawa. Gagi, pe'ihilaroomo pau atuu ka pekokoongakonomo pongkita atuu!

²⁴ Pinakosiomo pitu pulu meluka opitu tempo a tongkumu ka a ngkotamu anu mempori, mokotampulao gau mosa'o, mokompenaa-naao hala, pahihio sala, ka ihawe moleoa anu nahina tampulaano, umihiio pongkita ka pinau anu ta gagi, umurapio anu tedoa mempori.

²⁵ To'oriomo ka pokonto'oriomo: inso a tempo ipeluarako pau atuu, tempono ta pinomule Yerusale ka wali winangu, ranta haweno asa mokole, asa mia anu inurapi, hinao opitu meluka opitu tempo. Ka i'amba i larono nomo pulu ka orua meluka opitu tempo tehineno kota atuu ta wali winangu saru tana lapa ka pangkorono, sine a tempo masukara.

²⁶ Umarino nomo pulu ka orua meluka opitu tempo atuu asa mia anu inurapiomo ta tinadi, kahinaano nahina salano. Palilino asa mokole anu ta hawe, ta mokotampulao kota ka po'ianga mempori atuu, sine mokole atuu ta mate a laro lolowi. Hawe a tampulaano wawontolino ta hina peteaa ka poropua kana anu pinakosiomo.

²⁷ Mokole atuu ta weweuo pedandia atuu gagi dompemobeao hadio mia asa meluka opitu tempo tehineno. A entongano opitu tempo atuu onae ta mokompenaa-naaao pesomba sinumbele ka pesomba kaanga; ka i wawono pani mokoburua ta hawe anu mompepate, hawe a mporopua anu pinakosiomo umaluo anu mompepate atuu.”