Danieli 8 - Wunta Mempori

Bimba lakino ka bembe lakino 8:1-27

¹ A nta'u ko'otolu poparentaano mokole Belesiasari, tengkitaomo ndi ongkue, i Danieli, asa pongkita umarino anu tengkita ndi ongkue se'eluno atuu.

² Kukitao a laro pongkita atuu, ka tekonai aku mengkita, ongkue kongko a Bente Susani i wita Elami. Kukitao mbo'u a laro pongkita atuu ongkue kongko a wiwi ngkoro Ulai.

³ Kutandeo rupaku ka mengkita, tengkita asa bimba lakino mentade i arono korono atuu; tanduno orua. Orua tanduno atuu mantande, sine anu asa lalu mantande sekono anu susua, ka anu mantande atuu tuwu pokotompa.

⁴ Kukitao bimba lakino atuu metandu te'aro i sumooano oleo, i utara ka i selata. Nahina maupo te'asa kondehora anu moko'aropio, ka nahina anu polio mepotola inso a mpabawano; onae moweweu po'eheno aroano ka mompelangka-langkai.

⁵ Kontongaaku mekokoongakono, tengkita asa bembe lakino aiwa inso i sumooano oleo mepoleio asa wawontolino nahi polanda wita. Bembe lakino atuu hinao tanduno asa anu telanso i olono orua matano.

⁶ Onae aiwa a bimba lakino metandu orua anu kukitao mentade i arono korono atuu, ka i'amba sumapoiakono lambahano anu mongkokongiri.

⁷ Kukitao i'umpedaakono bimba lakino atuu. Onae tekuda, ka i'amba tumanduo bimba lakino atuu, saru puduakono orua tanduno. Bimba lakino atuu nahi polio umaropio; onae ipepasiakono i tolino ka ilolandao, ka nahina anu motolao bimba lakino atuu inso a mpabawano.

⁸ Bembe lakino atuu tedoa mompelangka-langkai. Sine mansano hawe a tompaano pabawano, tandu anu langkai atuu tepudu, ka i'amba a mpo'iangano tuwu opaa tandu anu telanso, medede saru opaa mata angi i langi.

⁹ Ka i'amba inso i olono asa tandu atuu me'umbaako tandu kodei anu gagi tedoa langkai te'aro i selata, te'aro i sabaano oleo, ka te'aro i Wita Tekosi.

¹⁰ Onae gagi langkai hawe a anano wula i langi. Inso a nsorodadu ilangi atuu, onaemo anano wula atuu, idontaio ba'opia i tolino, ka ilolandao.

¹¹ Maupo a ntadulakodo sorodadu atuu mbo'u onae mompelangka-langkai, ka inso ndi Ondae i'alao pesomba pinesombaako sompo oleo, ka mobangkuo po'ianga mempori-Do.

¹² Pesombaa anu mentee wineweu montonda gau mosa'o umeuo pesomba sompo oleo, menteea ipepasiakono i tolino, ka maupo hapa wineweuno luwuno mehasili.

¹³ Ka i'amba kurongeo asa mia mempori mepau, ka asa mia mempori susua motaeakono anu mepau atuu, ”Hawe opia tempono igagi pongkita mongkona pesomba sompo oleo ka gau mosa'o anu mompepate, mongkona po'ianga mempori anu pineweengako ka sorodadu i langi anu melinolanda?”

¹⁴ Isangkio, ”Hawe ka itelalo rua nsowu ka tolu etu ngkiniwia ka mo'oru, ka i'amba pinomule po'ianga mempori atuu.”

¹⁵ Kontongaaku, ongkue i Danieli kumitao pongkita atuu ka merokuhi tumo'orio, tengkitaomo mentade i aroku asa mia anu rupano kana tama.

¹⁶ Kurongeo inso a ntongano Koro Ulai atuu suarano mia anu mebooli, ”Gabarieli, weweuomo mia andio ka ito'orio pongkita atuu!”

¹⁷ Ka i'amba aiwaomo a mpo'iangaku mentade. Mansano aiwa, ongkue tededengke ka tebangku tepo'opo. Ipotae ndi ongkue, ”To'oriomo, anano mia, nine pongkita atuu mongkona tampulaano tempo!”

¹⁸ Kontongaano mepau saru ongkue, tebangku akumo tepo'opo a wita te'onto penaa. Ka i'amba tumengku aku ka weweu aku wali mentade.

¹⁹ Mepauomo, ”Kupauakomu hapa anu ta gagi i tompano tekuda andio, hangano mongkona atuu onaemo mongkona tampulaano wawontolino.

²⁰ Bimba lakino metandu orua anu kinitamu atuu onaemo luwuno mokoledo to Midia ka Peresia.

²¹ Bembe lakino anu mewulu molaba atuu mokole i wita Yunani, ka tandu langkai i olono orua matano atuu mokole anu amba-ambano.

²² Tandu atuu tepudu ka i'amba ineuako opaa tandu, pengkonaano opaa poparentaa ta me'umbaako inso a tongku atuu, sine nahi pengkena morosono anu se'elu.

²³ A mpoko'ariano poparentaado, tewala gau mosa'o tedoaomo lansara, ta me'umbaako asa mokole rupano masii ka pande mompopo'oo.

²⁴ Rosono ta tedoa langkai, sine nahi pengkena rosono anu se'elu, ka onae ta mowawa matea anu mongkokongiri, ka hapa anu wineweuno ta mehasili. Mia mempabawa ta mepate ira, saru mbo'u bawaado mia mempori.

²⁵ Hangano akalano, pompopo'oo anu wineweuno ta mehasili. Onae ta mompelangka-langkai i laro aroano, ka nahi kinookoo hadio mia ta pinepateno. Onae mbo'u ta mentade umewaio Mokoleno luwuno mokole, sine komba hangano poweweuno kaeno mia, onae ta rinawo-rawo.

²⁶ Ndio mbo'u pongkita mongkona ngkiniwia ka mo'oru atuu, hapa anu pinau atuu mentee. Sine omue, naaomo ilaro aroamu pongkita atuu, hangano pongkita atuu mongkona oleo lembuino anu da olai.”

²⁷ Ongkue, i Danieli, mokendo ka gagi mahaki ba'opia oleo tehineno. Ka ku'amba mewangu mo'anggaako ira mokole. Tekokodoho aku hangano pongkita atuu, sine nahi kupokonto'orio.