Danieli 6 - Wunta Mempori

Aano singa 6:1-29

¹ I Dariusu, to Midia, montarima poparentaa tempono tinuwuno nomo pulu ka orua nta'u.

² Ka i'amba i Dariusu mompotoro asa etu ka rua pulu petewawa daera a mpoparentaano. Ondae ira meninaa a luwuno poparentaa;

³ i wawodo pinotoro mbo'u otolu anu langkai potorono, ka i Danieli onaemo asa mia inso i olodo otolu mia atuu. Ndi ondaemo luwuno petewawa daera peweengakono inangga moiko anu asalakono domeweweuo ka si pinokorugi mokole.

⁴ I Danieli lumaloi ira anu langkai potorodo ka petewawa daera atuu, hangano ndi onae hinao penaa anu susua sekono anu mehano. Tinoono mokole numaao a luwuno poparentaano.

⁵ Ka i'amba anu langkai potorodo ka petewawa daera atuudo mpo'ungke pe'empehido ira metuntuo i Danieli mongkona a poparentaa, sine nahi dompohawe pe'empehi maupo hapa ke te'asamo koa salano, hangano onae metenunu ka nahina hinawe anu nahi anggao ke salano.

⁶ Dompotae mia atuudo, ”Nahi kita mpohawe pe'empehi hapamo koa metuntuo i Danieli sangkadio mongkona a songka-Do Ue Alano!”

⁷ Mpopari-pari iramo anu langkai potorodo ka petewawa daera atuudo mpe'aro ndi mokole ka dompotae, ”Oo mokole Dariusu, melai tinuwumiu ueku!

⁸ Luwuno anu langkai potorono a poparentaa andio, luwuno anu pabawa ka petewawa daera, luwuno anu mokowali ira a poparentaa ka bupati ntepo'asa ka ilinuarako asa pompakosido mokole ka ipinolempa asa pepo'onto nine ba isema i larono tolu pulu oleo mompohawe po'ema a asa i olono pinesombai ke mia sangkadio ndi omiu ueku, oo mokole, onae ta pinetadiako a aano singa.

⁹ Onaemo pu'uno, oo mokole, ipoluarakomo pepo'onto atuu ka ipoweweumo wunta parenta anu nahi pinokobali, montonda atorado to Midia ka Peresia, anu nahi ta pinokobuta mbo'u.”

¹⁰ Onaemo pu'uno, mokole Dariusu moweweu wunta parenta pepo'onto atuu.

¹¹ Rumongeo wunta parenta atuu wineweuomo, i Danieli mekule i rahano. A bolongkono i wawono hinao pentangoa anu te'ungkahi te'aro i Yerusale. Pentolu asa oleo ipenggolontu, mekakai saru umunde-unde Ira Ue Alano kana anu wela wineweuno.

¹² Mia atuudo mpopari-pari mpewinso ka domehaweo i Danieli tekonai mekakai ka mo'ema ndi Ondae Ue Alano.

¹³ Ka do'amba mpe'aro ndi mokole ka mpesikenoakono ndi onae mongkona pepo'ontodo mokole, ”Kombake omiu ueku moluarako asa pepo'onto nine sompo mia anu i larono tolu pulu oleo mompohawe po'ema a asa i olono pinesombai ke a mia sangkadio ndi omiu ueku, oo mokole, ta pinetadiako a laro aano singa?” Sumangki mokole, ”Mongkona atuu manasaomo montonda atorado to Midia ka Peresia, anu nahi ta pinokobuta mbo'u.”

¹⁴ Ka do'amba mpotae ndi mokole, ”I Danieli, asa mia i olodo mia mentinadi inso i Yehuda, nahi perio komiu ueku, mokole, ka nahi perioo pepo'onto anu linuarakomiu; pentolu asa oleo ipowuatako pekakai.”

¹⁵ Mansano rumongeo mokole mongkona atuu, onae tedoa mompemasusa. Onae mo'ungke sala ta motolao i Danieli, maupo ranta sumoo oleo, onae da merokuhi ta tumulungio.

¹⁶ Ka do'amba mia atuudo mpopari-pari mpe'aro ndi mokole ka dompotae ndi onae, ”Ito'oriomo, mokole, nine montonda atorado to Midia ka Peresia nahina pepo'onto ke pompakosi anu linuarakono mokole anu ta pinokobali!”

¹⁷ Meparentaomo mokole, ka i'amba i Danieli inala ka pinetadiako a laro aano singa. Mepau mokole ndi Danieli, ”Ondae Ue Alamu anu wela pinesombaimu, po'ineeomo Ondae anu motolako!”

¹⁸ Asa watu winawa ka ninaa a ngangano aa atuu, ka i'amba mokole tumondoniakono sinsi pontondonino, saru mbo'u sinsi pontondonido anu langkai potorono, ka si hina bali maupo hapa ndi Danieli.

¹⁹ Ka i'amba mokole mekule a langkanaeno ka puasa asa wongi. Puu mpontarero nahi poboi ira, ka onae mbo'u nahi pokompoturi.

²⁰ Mo'o-mo'oru ntu'u tempono tebosi towea, mokole mewangu ka mompari-pari lumako a aano singa.

²¹ Mansano hawe umpeda aa atuu, mebooliomo ndi Danieli saru suara mongkoko'undu. Ipotae ndi Danieli, ”Danieli, tetenaa-Do Ue Ala anu tuwu, Ondae Ue Alamu anu wela pinesombaimu, Dopolioke motolako inso a singa atuudo?”

²² Ka i'amba motae i Danieli ndi mokole, ”Oo mokole, melai tinuwumiu!

²³ Ondae Ue Alaku montena Iramo mala'eka-Do mokopuo ngangado singa atuudo onaemo ka nahi domebelai aku, hangano mengkaa nahina salaku i aro-Do; ka ndi omiu mbo'u ueku, mokole, nahi kupoweweu anu mosa'o.”

²⁴ Mokole tedoa mawongko ka onae meparenta ka idinii i Danieli inso a laro aa. I Danieli diniiomo inso a laro aa, ka nahina mobela hapamo koa ndi onae, hangano ipe'ala-ala Ira Ue Alano.

²⁵ Mokole meparenta, ka i'amba mia anu mentulurio i Danieli me'inala ka mempinetadiako a laro aano singa, moiko ondae maupo luwuno ana ka kombiado. Napi domehawe a horono aa atuu, domperangkami iramo singa atuudo, maupo wukudo domempuroo.

²⁶ Ka i'amba mokole Dariusu mo'oliwi wunta a luwuno mia inso a luwuno tongku, suku ka pau, anu mpo'ia i asa wawontolino, ihino, ”Po'ineeomo ka itetiangi manangaimiu!

²⁷ Meronga andio ongkue mompowee parenta nine a luwuno poparentaa anu pinabawaiku, mia asalakono medoito ka mpondende ndi Ondae Ue Alano i Danieli. Hangano, Ondaemo Ue Ala anu tuwu, anu nahina tampulaano; poparentaa-Do nahi ta tampula ka pabawa-Do nahina tompaano.

²⁸ Ondae mompotola ka montulungi, moweweu petondoni ka anu kinohali-haliako i langi ka i tolino. Ondaemo anu motolao i Danieli inso a mpekapodo singa.”

²⁹ Kanatuumo i Danieli hinao pentoroano mantande a poparentaano i Dariusu ka a poparentaano i Koresi, to Peresia atuu.