Danieli 5 - Wunta Mempori

Binuri a rere 5:1-30

¹ Mokole Belesiasari moweweuako ira mia anu langkai potorodo pelimbua langkai, asa nsowu mia hadiono. I arodo asa nsowu mia atuu onae mo'inu-inu anggoro.

² Kontongaano molanguako anggoro, i Belesiasari montena mia wawao parewa wulaa ka salaka anu inalano i Nebukanesa, amano, inso a laro Raha Mempori i Yerusale, ka dompo'inuario mokole ka anu langkai potorodo a poparentaano, luwuno kombiano ka samburueno.

³ Onaemo ka iwinawa parewa wulaa ka salaka atuu, anu inala inso a laro Raha Mempori, Raha-Do Ue Ala i Yerusale, ka i'amba mokole ka anu langkai potorodo, luwuno kombiado ka samburuedo mpo'inuario.

⁴ Ondae mpo'inu ka me'unde-undeo pinesombaido inso a wulaa ka salaka, mala, labu, keu ka watu.

⁵ I tempo koa mbo'u atuu tengkitaomo wunga ngkaeno mia moburi a rere langkanaeno mokole anu kinapuru, i arono karuno hulu, ka kae anu tekonai moburi atuu ikitao mokole.

⁶ Mokole gagiomo momite ka luwuno pinewowolono mokodanggarao. Lodi-lodi puu mpa'ano gagi molema ka olontuuno tepopangku.

⁷ Ka do'amba mokole mebooli meroku ka domewinawa mpe'aro mia anu pande mpobasa-basa, luwuno Kasidimi ka anu mpompau anu nahi manasa ta gagi. Mokole motaeako ira mia anu pande mposongka i Babeli atuu, ”Sompo mia anu mokobasao binuri andio ka ipauakune pengkonaano, ndi onae ta pinokonaako sangka inso a nsawu wungo, a we'uno ta pinopo'enuako rante wulaa, ka a mpoparentaaku onae ta hinao pabawano gagi mia ko'otolu.”

⁸ Sine luwuno mia pande mosongka inso ndi mokole, anu mehawe iramo mpe'aro, nahi dompokobasao binuri atuu ka nahi domempolio mempauakono mokole pengkonaano.

⁹ Umarino atuu mokole Belesiasari tedoa danggara ka rupano gagi momite; anu langkai potorodo a poparentaano mebulalingo ira koa mbo'u.

¹⁰ Hangano pauno mokole ka mia anu langkai potorodo atuu kombiado mokole mewinso a laro bolongko pelimbua ka ipotae, ”Oo mokole, melai tinuwumiu ueku! Siimo ipokodanggara komiu pinewowolomiu ka siimo igagi momite.

¹¹ Hangano a mpoparentaamiu ueku hinao asa mia anu bukeako penaado pinesombai anu mempori! I tempono poparentaado amamiu mia atuu tino'ori tedoa pande, pinewowolono molino ka ponto'orino kana ponto'orido pinesombai. Onae dopotoroomo mokole Nebukanesa, amamiu ueku gagi petewawado anu pande mpebali-bali mata, anu pande mobasa-basa, luwuno to Kasidimi ka luwuno anu mompau nahi manasa ta gagi.

¹² Hangano penaa nahi kana anu mehano, ponto'ori ka pinewowolo molino anu mokopauo pengkonaano mo'ipi, mosabao luwuakoano anu tewuni, ka mompokomoiko teweweu anu silolonga koongko a mia atuu; onae atuu i Danieli anu doneeakono mokole i Beletasasari. Laluopo kanandio-andio ipinoboi i Danieli ka onae ta pauo pengkonaano!”

¹³ Ka i'amba i Danieli winawa me'aro ndi ondae mokole. Mesikenoomo mokole ndi Danieli, ”Omueke i Danieli atuu, asa mia i olodo mia mentinadi anu winawado mokole, amaku, inso i wita Yehuda?

¹⁴ Kurongeomo mongkona omue, nine omue bukeako penaado pinesombai, ka nine ndi omue hinao pompokomengkaa, pinewowolo molino ka ponto'ori mentee anu nahi kana mehano.

¹⁵ Ndi ongkue mewinawa iramo mia mponto'ori, anu pande mobasa-basa atuu ka domebasao binuri andio ka mempauakune pengkonaano, sine nahi domempolio pauo pengkonaano pau atuu.

¹⁶ Sine, kurongeomo mongkona omue nine omue polio mompau pengkonaano mo'ipi ka polio mompoko'umari anu nahi silolonga. Onaemo pu'uno, tewala upokobasao binuri atuu ka mokopauakune pengkonaano, ndi omue ta pinokona sangka inso a nsawu wungo ka a we'umu ta pinopo'enuako rante wulaa, ka a mpoparentaaku andio omue ta hina pabawamu gagi mia ko'otolu.”

¹⁷ Ka i'amba i Danieli sumangki ira mokole, ”Inaaomo pompoweemiu ke iweeakono mia susua pompelangkaimiu ueku! Maupo kanatuu, aku koa basaakomiu binuri atuu ka pauakomiu pengkonaano.

¹⁸ Oo ueku mokole! Ondae Ue Ala Anu Tedoa Mantande meweengakonomo pabawa gagi mokole, pompelangkai, marambaa ka mantandea ndi Nebukanesa, amamiu.

¹⁹ Hangano pompelangkai anu Doweeakonomo atuu, mia inso a luwuno tongku medoito ka mpondende ndi onae. Onae mompepate isema anu ineheno ka mo'ineeo tuwu isema anu ineheno, melangkaio isema anu ineheno ka me'uru-uruo isema anu ineheno.

²⁰ Sine, tempono igagi mompelangka-langkai ka motea ulu ranta ka ipelelu tedoa mompelangka-langkai, onae dinontai inso a ngkadera poparentaano ka marambano inala inso ndi onae.

²¹ Onae sinaari inso i olodo mia ka aroano mengkena kana aroano kondehora, ka po'iangano kongko i olodo kalide ntobu; onae pinakaako ewo kana sapi, ka koroino mobahoako tontoru inso i langi, ranta ka imangaku nine Ondae Ue Ala, Anu Tedoa Mantande, pabawa a mpoparentaano mia ka motoroo isema anu inehe-Do.

²² Sine ueku i Belesiasari, anano, nahi pe'urumako maupo ito'orio luwuno andio.

²³ Omiu ueku mompelangka-langkai ndi Ondae Anu Pabawa i suruga. Parewa inso a Raha-Do domewawao mia ndi omiu, ka i'amba omiu ueku saru anu langkai potorono a poparentaamiu, luwuno kombiamiu ka samburuemiu mpo'inu anggoro inso a mparewa atuu; omiu ueku umunde-unde ira pinesombai inso a nsalaka ka wulaa, inso a mala, labu, keu ka watu, anu nahi pongkita, moronge ke monto'ori. Omiu ueku nahi pelangkai Ira Ue Ala, anu kumungkuo penaamiu ka tumantuio luwuno pesalaamiu ueku.

²⁴ Onaemo pu'uno ka Dotenao kae atuu ka binuriomo binuri andio.

²⁵ Ndiomo binuri anu teburi atuu: Mene, mene, tekel ufarsin.

²⁶ Ndiomo pengkonaano pau atuu: Mene, tempo poparentaamiu ueku Dodoao Ue Ala ka tompamo i ndi'ai;

²⁷ Tekel, omiu ueku tinimbaako pontimba ka hinawe monongko lahi;

²⁸ Peres, poparentaamiu ueku pineha ka wineeako a nto Midia ka Peresia.”

²⁹ Ka i'amba a mpetenano i Belesiasari sangka inso a nsawu wungo pinokonaako i Danieli ka rante wulaa pimopo'enuako a we'uno, ka pinaleleomo mongkona onae nine onae ta hinao pabawano gagi mia ko'otolu a mpoparentaa.

³⁰ Ia wongi koa mbo'u atuu i Belesiasari, mokoledo to Kasidimi atuu pinepate.