Danieli 4 - Wunta Mempori

I Nebukanesa mompelangka-langkai ka tinotoako 4:1-37

¹ Inso ndi mokole Nebukanesa a mia inso a luwuno tongku, suku ka pau, anu mpo'ia i asa wawontolino, ”Po'ineeomo ka itetiangi manangaimiu!

² Kupemoikoo paleleo luwuno petondoni ka anu kinohali-haliako wineweu-Do Ue Ala anu pabawa ndi ongkue.

³ Langkai ntu'u petondoni-Do ka mongkokongiri ntu'u wineweu-Do anu kinohali-haliako! Poparentaa-Do onaemo poparentaa anu nahina tampulaano ka poparenta-Do hawe mapa'api-api inule!

⁴ Ongkue, i Nebukanesa, mo'ia rodo a laro rahaku ka hadio ntu'u arataaku a laro langkanaeku.

⁵ Ka ku'amba mohawe mo'ipi anu mokontededengke aku; kolaro-laroku a mpoturiaku ka luwuno pongkita anu kinitaku mokonsalalaro aku.

⁶ Moluarako akumo parenta a luwuno mia anu pande mosongka i Babeli ka domewinawa mpe'aro ndi ongkue, ka domempauakune pengkonaano mo'ipi atuu.

⁷ Ka i'amba luwuno anu pande mpebali-bali mata, anu pande mpobasa-basa, luwudo to Kasidimi, ka anu mpopau nahi manasa ta gagi me'aiwa mpe'aro. Kututuluako ira mo'ipi atuu, sine nahi domempolio pauakune pengkonaano.

⁸ Poko'ariano i Danieli aiwa me'aro ndi ongkue, i Danieli anu nineeako i Beletasasari montonda neeno pinesombaiku ka anu bukeako penaado pinesombai anu mempori. Ka ku'amba tumutuluakono mo'ipi atuu:

⁹ Hei Beletasasari, petewawado anu pande mpebali-bali mata! Kuto'orio nine omue bukeako penaado pinesombai anu mempori, ka nine nahina rahasia pinemotungkomu! Onaemo pu'uno, ndiomo tutuluno pongkitano mo'ipi anu hinaweku; tutuluakunemo pengkonaano.

¹⁰ Ndio pongkita anu hinaweku a mpoturiaku atuu: i tonga-tongano tolino hinao asa keu anu tedoa ondau.

¹¹ Keu atuu tetiangi langkai ka moroso, ondauno hawe i langi, ka tengkita hawe i tompano asa wawontolino.

¹² Leweno ntekokosi, wuano hadio ntu'u, ndi onae hinao kaangado luwuno anu mentuwu. I totono kondehora a mpada mpo'ungke pe'engoa, a sampa-sampano manu-manu i laro meene mpeseno, ka inso ndi onae luwuno anu tuwu mpohawe kaangado.

¹³ Ka i'amba a laro pongkita anu hinaweku a mpoturiaku atuu tengkita asa mia puu mpodagai, asa mia mempori, metii inso i langi.

¹⁴ Onae mebooli meroku, ipotae: Tuehiomo keu atuu ka poleomo luwuno sampano, rontahiomo leweno ka rawoomo wuano! Po'ineeomo luwuno kondehora mpolai inso i totono ka manu-manu inso a sampa-sampano!

¹⁵ Sine bintaomo tu'ono a laro wita, tetanggoako rante labu ka mala a ewo mongura i tongampada. Po'ineeomo ka ibahoo tontoru inso i langi ka saru luwuno kondehora mpohawe tiado inso a ewo i tolino!

¹⁶ Po'ineeomo aroa miano ka ibali ka iwineeako aroa kondehora. Kanatuumo gagiano ndi onae hawe opitu tempo telalo.

¹⁷ Parenta andio domempaleleo puu mpodagai ka mongkona andio montonda pomputusido mia mempori, ka domento'orio mia mentuwu, nine Anu Tedoa Mantande pabawa a poparentaano mia ka meweengakono ndi sema anu inehe-Do, maupo mia anu tetotoako Dopokotandeo tiano pentoroa atuu.

¹⁸ Onaemo mo'ipi anu hinaweku, ongkue, mokole Nebukanesa. Kanandio-andio omue Beletasasari, pauakunemo pengkonaano, hangano luwuno mia anu pande mosongka inso a poparentaaku nahi domempolio pauakune pengkonaano. Sine omuemo anu polio, hangano omue bukeako penaado pinesombai anu mempori!”

¹⁹ Ka i'amba mentadeomo i Danieli anu neeno i Beletasasari, tekonto sarai, ka luwuno pinewowolono mokodanggarao. Mepauomo mokole, ”Beletasasari, siimo ipokodanggarako mo'ipi ka pengkonaano atuu!” Sumangki i Beletasasari, ”Ueku, po'ineeomo mo'ipi atuu tiado iwalimiu ka pengkonaano tiado pe'u'uamiu ueku!

²⁰ Keu anu kinitamiu atuu ueku, anu tetiangi langkai ka moroso, anu ondauno hawe i langi ka tengkita hawe i asa wawontolino,

²¹ anu leweno ntekokosi ka wuano hadio ntu'u ka ndi onae hinao kaangado luwuno anu mentuwu, anu i totono hinao kondehora i tongampada ka a sampa-sampano mpeseno manu-manu i laro meene,

²² omiumo atuu ueku, oo mokole. Omiu ueku tetiangiomo langkai ka moroso, marambamiu ueku tetiangi hawe i langi, ka pabawamiu hawe i tompano tolino!

²³ Mongkona asa mia puu mpodagai anu kinitamiu ueku mokole, asa mia mempori anu metii inso i langi ka mepau: Tuehiomo keu andio ka pepateomo, sine bintaomo tu'ono a laro wita, tetanggoako rante labu ka mala a ewo mongura a mpada. Po'ineeomo ka imobahoako tontoru inso i langi ka ipohawe tiano meronga saru kondehora a mpada, ranta anu kanandio gagi ndi onae i larono opitu tempo.

²⁴ Ndiomo pengkonaano, oo mokole, ka ndiomo pomputusi-Do Anu Tedoa Mantande mongkona omiu ueku mokole:

²⁵ omiu ueku komiu sinaari inso i olodo mia ka po'iangamiu ueku ta kongko i olodo kondehora a mpada. Ndi omiu ueku pinoweeako kaanga ewo kana sapi, ka komiu mobahoako tontoru inso i langi. Kanatuumo ta gagi ndi omiu ueku i larono opitu tempo, ranta ka imangaku nine Ondae Anu Tedoa Mantande pabawa a poparentaano mia ka meweengakono ndi sema anu inehe-Do.

²⁶ Parenta ka ipino'inee tu'ono keu atuu pengkonaano poparentaamiu ueku komiu ronga wali uminio umarino imangakuakono nine surugamo anu hinao pabawano.

²⁷ Gagi, oo mokole, po'ineeomo patuduku andio ipemoikoo i aroamiu ueku: ipoweweumo moleoa ka itepotolamo koroimiu inso a hala, ka ipopokitaomo pompehohawa a mia anu tepokonsii. Ba kanatuu me'uraamiu ueku ta motilalo!”

²⁸ Luwuno gagi ndi mokole Nebukanesa.

²⁹ Hopulu ka orua wula lembuino, tempono onae tekonai melempa-lempa i tambino langkanaeno mokole i Babeli,

³⁰ mepauomo mokole, ”Kombake Babeli andio anu langkai, anu saru rosono pabawaku ka tiano marambano potoroku kuwanguomo gagi kota poparentaa?”

³¹ Napi umari dopepau Mokole teronge asa suara inso i langi, ”Ndi omue pinokomengkaa, oo mokole Nebukanesa, nine poparentaa melimbaomo inso ndi omue.

³² Omue kosinaari inso i olodo mia ka po'iangamu ta kongko i olodo kondehora a mpada; omue kopinakaako ewo kana sapi. Kanatuumo ta gagi ndi omue hawe ka itelalo opitu tempo, ranta ka umangaku nine Anu Tedoa Mantande pabawa a poparentaano mia ka meweengakono ndi sema anu inehe-Do!”

³³ I tempo koa mbo'u atuu hapa anu pinau mongkona i Nebukanesa gagi mengkaa. Onae sinaari inso i olodo mia ka mongkaa ewo kana sapi; koroino mobahoako tontoru inso i langi ranta wuuno gagi ondau kana wuluno manu-manu rajawali ka kukuno kana kukuno manu-manu.

³⁴ Sine, mansano laloomo tempo anu pinakosi, ongkue, i Nebukanesa, mentombu i langi, ka pinewowolo molinoku mepokule ndi ongkue. Ka ku'amba umunde-unde Ira Anu Tedoa mantande, melangkai Ira Anu Tuwu nahina tampulaano atuu hangano pabawa-Do pabawa anu nahina tampulaano ka poparentaa-Do hawe a mapa'api-apino inule.

³⁵ Luwuno palilino tolino pine'uru-uru; Ondae moweweu montonda po'ehe-Do a nsorodadu i langi ka palilino tolino. Nahina maupo te'asa mia polio umontoo kae-Do saru motae ndi Ondae, ”Hapa wineweu-Miu?”

³⁶ I tempono pinewowolo molinoku mepokule ndi ongkue, mepokule mbo'u ndi ongkue potoro ka marambaku tiano teleleno poparentaaku. Luwuno anu mokowali ira mokole a poparentaa ka anu langkai potorodo me'ungke aku; ongkue pinokule a poparentaaku, tendeano marambaa anu lalu langkai sekono i ndi'ipua wineeako ndi ongkue.

³⁷ Gagi kanandio-andio ongkue, i Nebukanesa, mo'unde-unde, ka melangkai Ira Mokole i suruga, hangano luwuno wineweu-Do mentee ka luwuno sala-Do moleo, ka Ondae polio tumotoako ira anu mpompelangka-langkai.