Danieli 12 - Wunta Mempori

Pokotompaano tempo 12:1-13

¹ ”A tempo mbo'u atuu ta hawe i Mikaeli, petewawa langkai atuu, anu ta mokowali ira anado tongkumu. Ta hinao asa tempo masukaraa anu langkai kana anu napi hori gagi mompu'u ka ihina luwuno tongku hawe a tempo atuu. Sine a tempo atuu tongkumu, sompo mia anu hinawe neeno teburi a Wunta atuu, ta tola.

² Hadio inso i olodo mia anu mpoturi iramo a laro pampawu, ira mpewangu, asa ntia ka ipohawe tuwua nahina tampulaano, asa ntia mbo'u ka ipembasaio pontetewehi ka mongkokongiria anu nahina tampulaano.

³ Luwuno mia anu pande mposongka ira memewanta kana wantano longkuno langi, ka anu montaateomo hadio mia a menteea kana anano wula, kongko mpiha ranta nahina tampulaano.

⁴ Sine omue, Danieli, naao i aroamu luwuno pau atuu, ka tondoniomo Wunta atuu hawe pokotompaano tempo. Hadio mia ta mepenteeo, ka ponto'ori ta tetiangi.”

⁵ Ka i'amba ongkue, i Danieli, mengkita ka tengkita orua mia susua mentade, asa mia a wiwi ngkorono i asambali i ndi'ai ka asa mia mbo'u a wiwino i asambalino raane.

⁶ Asa mia i olodo mesikeno a mia anu mesangka sawu lena ka anu kongko a wawo uwoi korono atuu, ”Te'ipiake pokotompaano luwuno anu kinohali-haliako andio?”

⁷ Mia anu mesangka sawu lena ka kongko a wawo uwoi korono atuu tumandeo kae ngkoanano ka kae manggalino kontahane i langi, ka kurongeo mia atuu mesumpa me'empehiako Ondae anu tuwu nahina tampulaano, ”Asa tempo ka orua tempo ka entonga tempo. Mansano tampulaomo pabawano ponsolangi tongku anu mempori atuu, mongkona luwuno andio ta inihii!”

⁸ Lano kurongeo mongkona atuu, sine nahi kupokonto'orio. Ka ku'amba mesikeno, ”Ueku, hapake poko'ariano mongkona luwuno andio?”

⁹ Isangki aku, ”Lakomo, Danieli, hangano pau andio ta winuni mpiha ka tetondoni hawe a mpokotompaano tempo.

¹⁰ Hadio mia ta pinokomempori, pinokomolino ka inara-arahako. Sine, mia mosa'o gaudo ira mpogau mosa'o. Nahina maupo te'asa mia inso a mia mosa'o gaudo atuu ta mokonto'orio, sine luwuno mia anu pande mosongka ta mento'orio.

¹¹ Mompu'u ipinenaa-naaako pesomba sompo oleo ka luwuno pinesombai mokoburu anu mompepate atuu tineahako, hinao asa nsowu ka rua etu ka sio pulu oleo.

¹² Me'uraomo mia anu kongko mesikori ka haweako asa nsowu tolu etu ka tolu pulu ka olima oleo.

¹³ Sine omue, lakomo ranta ka ihawe pokotompaano tempo. Omue komenaa-naa ka ko mewangu ka uhaweo tiamu a mpokoariano tempo.”