Danieli 11 - Wunta Mempori

¹ Ongkue mbo'u i ndi'ipua, a nta'u amba-ambano poparentaano i Dariusu, to Midia atuu, mokowalio ka imoroso ka dumagaio.”

Mokole i wita Utara ka mokole i wita Selata 11:2-45

² ”Onaemo pu'uno, aku koa pauakomu menteea. Menteeano, otolu mbo'u mokole ta me'umbaako i wita Peresia, ka anu ko'opaa ta lalua kaea lumaluio luwudo. Mansano gagiomo moroso hangano kaeano, ta umoluako ira luwu ka dome'ewaio poparentaa Yunani.

³ Ka i'amba asa mokole anu moroso ka mosia ta me'umbaako ka moparenta saru pabawa anu langkai ka moweweu po'eheno aroano.

⁴ Sine da saraipo ipe'umbaako, poparentaano ta tepeha ka tetia montonda opaa mata angi inso i langi, sine komba a inuleno, ka nahina pabawa kana anu pine'ueno. Hangano, poparentaano ta tedonta ka gagi tiado mia anu susua.

⁵ Mokole i wita Selata ta gagi moroso. Sine, asa mia inso i olodo tadulakono ta gagi morosoopo sekono onae ka mia andio moparenta, ka i'amba pabawano ta gagi pabawa anu langkai.

⁶ Ba'opia nta'u lembuino mia orua andio ira tepo'asa. Ana beineno mokole i wita Selata ta aiwa ndi mokole i wita Utara ka dopoweweu tepo'asa mpau, sine nahi mehasili; inuleno mbo'u nahi pokompekorahako. Ana beineno atuu ta pineweengako, kanatuu koa mbo'u anu mewawao, ana anu pine'anaakono ka mia anu kumombiao.

⁷ I tempo atuu ta tuwu asa tumba anu me'asa haka saru ana beine atuu umeuo. Mia andio ta lumako umewai ira sorodaduno mokole i wita Utara ka mewinsokio benteno. Onae ta lumako umewai ira ka pabawaio.

⁸ Maupo luwuno pinesombai ka tinaha tinawado saru luwuno parewado anu hinao olino inso a nsalaka ka wulaa ta wawao i Masiri gagi pinomuru. Ba'opia nta'u tehineno ta menaa-naa metea umewaio mokole i wita Utara.

⁹ Ka i'amba mokole andio ta mewinsokio poparentaano mokole i wita Selata, sine ta mekule i witano onaeno.

¹⁰ Anano ira mpepatinda mpetea, ka mpowawa sorodadu anu hadio. Asa mia inso ndi ondae atuu ta lumako umewaio, lumimbuo ka umalu ira luwu kana lolowi. Onae wali monsapoi hawe a bentedo iwalino.

¹¹ Tekudaomo mokole i wita Selata, ka i'amba lumako metea umewaio mokole i wita Utara, anu mowawaomo sorodadu hadio ntu'u, sine sorodadu hadio andio ta tedonta a ngkaeno iwalino.

¹² Mansano rumopu ira sorodadu hadio atuu, aroano ta mo'unde. Onae mompepateomo mapasowu-sowu mia, sine nahi ta moroso mpiha.

¹³ Mokole i wita Utara atuu ta wali mowawa sorodadu anu hadio, laluaopo hadio sekono anu amba-ambano. Ba'opia nta'u lembuino, onae ta lumako umewaiakono sorodadu anu hadio ka hadio parewa mpetea.

¹⁴ I tempo atuu hadio mia ta mentade umewaio mokole i wita Selata. Mia anu melambaha inso a tongkumu ira me'ewa, ranta pongkita atuu gagi mengkaa, sine nahi ira mponangi.

¹⁵ Mokole i wita Utara atuu ta aiwa, mowangu pongku pongkadua ka mongko'alao kota anu mebente. Sorodadu i wita Selata nahi ta mokompekorahako, maupo luwuno sorodadu bininikino mbo'u, oo, nahina roso anu mokompekorahako.

¹⁶ Mokole anu sumapoio ta moweweu po'eheno aroano, ka nahina maupo te'asa mia polio umaropio. Onae ta mentorokio Wita Tekosi ka poropua ta kongko a mpabawano.

¹⁷ Onae ta merokuhi aiwa saru luwuno rosono poparentaano ka moweweu tepo'asa mpau saru mokole i wita Selata ka weeakono asa anano beine ka iropuo poparentaa atuu. Sine perokuhino nahi ta mehasili ka nahi me'uraakono.

¹⁸ Ka i'amba ta lumimbao pengkitaano a wiwi ntahi ka mongko'alao hadio wita atuu. Sine, asa tadulako ta mokompenaa-naao pompokongkodeino atuu, tendeano ta mombalo pompokongkodeino atuu ndi onae.

¹⁹ Umarino atuu onae ta lumimbao pengkitaano a luwuno kota bente i witano onaeno, sine ta telendo ka tedonta ka nahi ta hinawe mbo'u.

²⁰ Gagi euno ta me'umbaako asa mia anu tumenao puu mpopumpu sima'ulu ka ikorahakono marambano poparentaa. Sine, nahi tehine lembuino onae ta pinepate, komba i arono mia hadio ke a laro mpeteaa.

²¹ Gagi euno ta me'umbaako asa mia anu tinetewehi, anu nahi pohawe pompelangkai mokole. Nahi kinookoo onae ta aiwa moko'alaakono akala pentoroano mokole.

²² Sorodadu anu aiwa mposapoi ka maupo mbo'u asa mokole Pedandia ta pinolomo inso i arono ka rinopu.

²³ Mompu'u iwineweu tepo'asaa saru onae, onae ta moweweu molengku. Onae ta lumako ka pabawa, maupo miano tedei.

²⁴ Nahi kinookoo onae ta mewinsoki ira wita anu mewalo ntu'u i wita atuu, ka moweweu hapa anu napi hori domeweweuo luwuno ama ka uempu'uno. Onae ta merawoakono rinontu, pinomuru ka arataa i olodo miano, moweweu mbo'u akala a luwuno po'ianga anu mebente, sine butu sarai koa.

²⁵ Onae ta mopumpu roso ka mosiano ta umewaiakono sorodadu anu hadio mokole i wita Selata. Maupo mokole i wita Selata ta mepatinda meteaakono sorodadu anu tedoa hadio ka moroso, nahi ta polio mekorahako, hangano ta inatora akala umaropio.

²⁶ Mia anu mpongkaa inso a ngkaangano ira meropuo. Sorodaduno ira memolomo ka hadio miano mate pinepate.

²⁷ Orua mokole atuu mosa'o tinoodo, ka tempono dope'asa mentoro a asa meda, ira mambe gaupi. Sine, mongkona atuu nahi ta mehasili, hangano tampulaano wawontolino atuu napi haweako tempo anu pinakosi.

²⁸ Mokole i wita Utara atuu ta mekule i witano saru arataa anu hadio. Sine aroano montoo ta umewaio Pedandia Mempori, ka tinoo atuu iweweuo ka i'amba mekule i witano.

²⁹ A tempo anu pinakosi onae ta mewinsokio mbo'u wita Selata, sine pohona andio nahi ta mengkena saru anu amba-ambano.

³⁰ Hangano, kapalado to Kitimi ira mehawe me'ewaio onaemo ka itetadi mosiano. Ka i'amba mekule saru monaa aroa a Mpedandia Mempori, ka tinoo atuu iweweuo. Onae ta mekule ka ipopokitao pe'aroano ndi ondae anu mebintao Pedandia Mempori.

³¹ Sorodaduno ira mehawe, mengkokoburutio po'ianga mempori ka bente atuu, mempahihio pesomba sompo oleo. Domenteahakono wineweu mokoburu anu mompepate.

³² Mia anu mosa'o gaudo a Mpedandia ira mempopandeiakono pau pompopo'oo ranta ka dompebungkuio. Sine, bawaa anu tumo'ori Ira Ue Alano ta moroso mpiha ka meweweuo.

³³ Mia anu pande mosongka i olodo bawaa atuu ira meweweuo hadio mia mento'orio sine ba'opia tempo tehineno ira mentenangiako ponai ke api, ke hangano tinawa ke rinontu.

³⁴ Tempono domentenagi, ira mpohawe tedei pontulungi, ka hadio mia ta mo'onde-onde mpe'asaako ira.

³⁵ Asa ntia inso a mia pande mposongka atuu ira mentenangi, ka hangano kanandio ira me'inara-arahako, pinokomolino, ka pinokomempori hawe a tampulaano wawontolino. Hangano tampulaano wawontolino atuu napi haweako tempo anu pinakosi.

³⁶ Mokole atuu ta moweweu po'eheno aroano. Onae ta mompelangka-langkai a sompo pinesombai. Ndi Ondae mbo'u Ue Ala anu mewawoio luwuno pinesombai onae ta mepauako pau anu nahi pototono, ka onae ta mehasili hawe tompaano tekuda atuu, hangano hapa anu pinakosiomo ta gagi.

³⁷ Luwuno mbo'u pinesombaido uempu'uno nahi ta merioo. Inunde-undedo beine ke pesombaa isuamo koa nahi ta merioo, hangano a luwuno atuu ta mompelangka-langkai.

³⁸ Gagi euno luwuno atuu onae ta melangkaio pinesombai a luwuno bente. Pinesombai anu nahi domento'orio uempu'uno ta melangkaiakono wulaa ka salaka, paramata ka luwuno parewa anu masuli olino.

³⁹ Onae ta moweweu a luwuno bente anu ipokorosoakono pontulungino pinesombaido mia mehawe atuu. Isema anu umakuio pesombaa andio ta wineeako hadio pompelangkai; onae ta weweu ira gagi mempabawa a hadio mia ka ndi ondae ta montiaako ira wita gagi tambo.

⁴⁰ A tampulaano wawontolino mokole i wita Selata ta metea umewaio mokole i wita Utara anu ta sumapoiakono kareta ka mia mpengara, saru hadio kapala. Mokole andio ta mewinsoki ira wita sumompoo ka uma'eo luwu kana lolowi.

⁴¹ Onae ta mewinsokio mbo'u Wita Tekosi ka hadio mia ta tedonta. Sine, wita Edomi, wita Moabi ka mia anu hinao polaluano inso a inuleno i Amoni ta tola inso a ngkaeno.

⁴² Onae ta humawe ira wita, ka wita Masiri nahi ta tola.

⁴³ Onae ta pabawaio arataa wulaa ka salaka, saru mbo'u luwuno parewa masuli olino i wita Masiri. To Libia ka to Etiopia ira mentondao.

⁴⁴ Sine lele inso i sabaano oleo ka i utara ta mokontededengkeo aroano, ranta onae ta meluarako saru tekudano anu langkai ta moropu ka mompepate hadio mia.

⁴⁵ Onae ta mompontade kema langkaino pabawano i olono tahi ka Torukuno Tekosi anu mempori atuu. Sine ta humaweo mateano ka nahina maupo te'asa mia tumulungio.”