Danieli 10 - Wunta Mempori

Pongkitano i Danieli a wiwi ngkoro Tigirisi 10:1–11:1

¹ A nta'u ko'otolu poparentaano i Koresi, mokoledo to Peresia, asa pau pinokomengkaa ndi Danieli anu nineeako i Beletasasari. Pau atuu mentee ka mongkona petea anu langkai. Onae mokonto'orio pau atuu ka ponto'orino atuu ihaweo a laro pongkita atuu.

² I tempo atuu ongkue, i Danieli, mo'inombo i larono otolu minggu.

³ Nahi kupongkaa kaanga mo'ahi, bau ka anggoro nahi pewinso a laro ngangaku ka nahi kupompake lana hawe ka isompo otolu minggu.

⁴ A oleo koruapulu ka opaa wula amba-ambano, tempono ongkue kongko a wiwi ngkorono langkai, koro Tigirisi,

⁵ kutandeo pengkitaku ka mengkita, tengkitaomo asa mia mesangka sawu lena ka meboo ntongaako wulaa inso i Upasi.

⁶ Koroino kana paramata Tarasisi ka rupano kana wantano koliki, Matano kana pansona anu melanga, tokiano ka karuno kana tesangkilono mala anu hinahi mangkilo ka unino pepauno kana unino rundu.

⁷ Butu ongkue, i Danieli, kumitao pongkita atuu, sekono luwuno mia anu perongaku, nahi domengkitao. Sine, i'alu ira doitoa langkai onaemo ka dompolai mpewuni.

⁸ Kanatuumo kupo'ia asa-asaku. Tempono kukitao pongkita anu langkai atuu, tetadi rosoku, rupaku gagi tedoa momite, ka nahina mbo'u rosoku.

⁹ Ka ku'amba rumongeo unino pepauno, ka mansano kurongeo unino pepauno atuu, ongkue tebangku tepo'opo te'onto penaa rupaku a wita.

¹⁰ Sine hinao asa kae tumengku aku ka weweu aku mondidi-ndidi a olontuu ka kaeku.

¹¹ Ipotaeakune, ”Danieli, omue mia anu pinehohawa, pe'ihilaroomo pau anu kupauakomu, ka pentademo, hangano kanandio-andio ongkue tinena aiwa ndi omue.” Mansano pauakune mongkona atuu, mentade akumo saru mondidi-ndidi.

¹² Ka i'amba motaeakune, ”Siimo doito, Danieli, hangano mompu'u oleo amba-ambano upontoo ka upohawe ponto'ori ka kome'urumako i aro-Do Ue Alamu rinongeomo pinaumu. Ongkue aiwa hangano pinaumu atuu.

¹³ Petewawano poparentaado to Peresia mentade umewai aku rua pulu ka asa oleo tehineno. Ka i'amba i Mikaeli asa mia inso i olodo petewawa anu pinemota'u, aiwa tumulungi aku, ka onae kubintao i ra'ai tepo'aroako ira mokoledo to Peresia.

¹⁴ Ongkue aiwa weweuko ka upokonto'orio hapa anu ta gagi a tongkumu a oleo anu pokotompa; hangano pongkita mbo'u andio mongkona luwuno oleo atuu.”

¹⁵ Tempono ipauakune mongkona atuu, kupetuunduakono rupaku a wita ka nahi kupokompepau.

¹⁶ Sine hinao asa anu kana mia tumengkuo wiwiku. Ongkue mbo'u mompu'u mepau, kupotaeakono anu mentade i aroku atuu, ”Ueku, hangano pongkita atuu i'alu aku pompemahaki ka nahina mbo'u rosoku.

¹⁷ Nde kana'umpe ka igagi ongkue, tetenaamiu andio ueku ka ipokompepau saru omiu? Kombake nahina mbo'u rosoku ka nahina mbo'u toreano penaaku?”

¹⁸ Ka i'amba anu rupano kana mia atuu tumengku aku mbo'u ka moweeakune roso.

¹⁹ Ipotae, ”Hei omue anu pinehohawa, siimo doito! Manangaikomo, gagimo moroso, oo, gagimo moroso!” Kontongaano mepau saru ongkue, mompemoroso akumo mbo'u ka kupotae, ”Po'ineeomo ka Ipepau Ueku, hangano Ipowee akumo roso.”

²⁰ Ka i'amba mepau, ”Nde uto'orio koake tembio ka ku'aiwa ndi omue? Nahi tehine mbo'u aku mekule metea umewai ira petewawado to Peresia, ka mansaku umari saru onae, petewawado to Yunani ta aiwa.

²¹ Sine, aku koa pauakomu hapa anu teburi a Wunta Menteea. Nahina maupo te'asa anu me'alaako ndi ongkue umewai ira, sangkadio i Mikaeli, petewawamu atuu.