Ayubi 9 - Wunta Mempori

I Ayubi mokonto'orio nine onae nahi poko'ewai Ira Ue Ala 9:1-35

¹ Sine sumangki i Ayubi,

² ”Mentee ntu'u, kuto'orio, nine kanandiomo teweweuno, sine kana'umpe mia ka imentee i aro-Do Ue Ala?

³ Tewala onae ineheno mekara-karaako Ira Ue Ala, asa inso asa nsowu mpali onae nahi pokosangki Ira.

⁴ Ondae Ue Ala atuu tedoa monto'ori ka tedoa moroso, isemake anu mokompeteahako umewai Ira, ka kongko tekadudui?

⁵ Ondaemo anu lumimba ira torukuno nahi domento'orio mia, anu wowangunsuleo a laro ntekuda-Do;

⁶ anu paheo tolino inso a mpo'iangano, ranta karuno melelu-lelu;

⁷ anu parentao mata oleo ka nahi saba, ka tumutuwiakono pontondoni anano wula;

⁸ anu asa-asa-Do wileo langi, ka melempa a wawo bomba-bombano tahi;

⁹ anu mokogagio anano wula Bidu, anano wula Belanti, anano wula Karatika, ka luwuno pehowuno anano wula Rua Selata;

¹⁰ anu weweuo luwuno wineweu langkai anu nahi kinookoo, ka luwuno anu kinohali-haliako anu nahi pinokopau hadiono.

¹¹ Tewala Dolalo aku, nahi kukita Ira, Ondae telalo, nahi kuto'ori Ira.

¹² Tewala Ondae morontu, isema ta umonsoi Ira? Isema ta kumuahako Ira: Hapa wineweu-Miu?

¹³ Ondae Ue Ala nahi Doponaa-naa tekuda-Do, i totono pabawa-Do luwuno anu mpokowalio i Rahabi mpe'odo.

¹⁴ Tamoako mbo'u ongkue, kana'umpe aku moko'ewai Ira, mobiniki pepauku ndi Ondae?

¹⁵ Maupo ongkue mentee, komba aku umewai Ira, tendeano ongkue asalakono mo'ema pompehohawa ndi Ondae anu tumuntu aku.

¹⁶ Tewala mebooli aku, Dosangki aku; nahi kupokompe'ala-alao nine Ira behe rumongeo pepauku.

¹⁷ Ondaemo anu rumawo-rawo aku a laro angi mokora, anu mokohadioo mobelaku montonda po'ehe-Do,

¹⁸ anu nahi po'inee aku menaa, sine mokomowohiakune mopa'ia.

¹⁹ Tewala mongkona roso, Ondaemo anu lalu moroso! Tewala mongkona moleoa, isema moko'ewai Ira?

²⁰ Maupo mentee aku, ngangaku ongkueku ta pauo ongkue nahi mentee; maupo nahina salaku, Ira koa pauo ongkue sala.

²¹ Nahina salaku! Nahi kuperioo koroiku, kute'osaakono tuwuku!

²² Luwuno mengkena koa, onaemo pu'uno ka kupotae: anu mentee ka anu sala, oruano Dopokotampulao.

²³ Tewala mepobingko ponsepi mompepate, Ondae pasinggirio nahina pompe'osaiano mia anu nahina salano.

²⁴ Tolino pineweengakoomo a ngkaedo mia mosa'o gaudo, ka matado puu mpobitarano Dotutuwiomo; tewala komba Ondae, isema mbo'u?

²⁵ Oleo ntumuwuku telalo magasiopo sekono asa mia puu mpelulu, moliu nahi pongkita me'uraa,

²⁶ mepowulu telalo kana bangka gelaga, kana rajawali anu montiu kaangano.

²⁷ Tewala kupewowoloo: Aku mingki kumolupeo pompemasusaku, balio uwoi mataku, ka mawongko,

²⁸ onaemo ka kudoitoakono luwuno masusaku; kuto'orio nine nahi Komiu motae nahina salaku.

²⁹ Pinauomo ongkue sala, tembio ka kupokomasusao koroiku nahina tuduno?

³⁰ Maupo kuwo'ohiakono seru baku koroiku ka kuwo'ohiakono sabo kaeku,

³¹ Komiu motondu aku a laro rege, ranta maupo sangkaku imokoburuakune.

³² Hangano Ondae komba mia kana ongkue, onaemo ka nahi kupokosangki Ira: Aiwa toperonga-ronga lumako a mpebitaraa.

³³ Nahina po'oloti i olomami, anu mokonaao kaeno a wawo mami orua kami!

³⁴ Po'ineeomo Doliahakono tarasulu-Do inso ndi ongkue, kasi alu aku mondende i aro-Do.

³⁵ Ka nami kudoito mepau ndi Ondae, hangano nahi kupokonto'orio salaku.”