Ayubi 7 - Wunta Mempori

Tuwu atuu mobea 7:1-21

¹ ”Kombake mia asalakono memate-mateako i tolino, ka luwuno oleono kana oleono mia tinambo?

² Kana asa ata anu mongkekewoi pe'engoa, ke mia tinambo anu monsisikori tambono,

³ kanandiomo kuwineeako luwuno wula anu nahina tuduno, ka kutinantuiako luwuno wongi masusaa.

⁴ Tewala lumako aku moturi, kupewowoloo: Te'ipiake kupewangu? Sine wongi tehina ntu'u, ka ongkue ipabawai aku salalaro hawe umpeda meene.

⁵ Wingo ka awu tumutuwio koroiku, kuliku gagi motea, ka i'amba tepeha.

⁶ Oleo ntumuwuku magasiopo itelalo sekonopo pongkalulua bana hinoru, ka metompaako nahina pompe'osaia.

⁷ Impewowoloomo, nine tuwuku butu pepuurino penaa; mataku nahi ta mongkita mbo'u anu moiko.

⁸ Mia anu kumita aku nahi ta kumita aku mbo'u, tempono I'ungke aku, nahi kukongko mbo'u.

⁹ Kana'umpe moliuno seru ka menae-nae tetadi, kanatuu koa mbo'u mia anu metii a mpo'iangado mia mate nahi ta wali me'umbaako.

¹⁰ Onae nahi pekule mbo'u i rahano, ka onae, nahi to'orio mbo'u po'iangano.

¹¹ Onaemo pu'uno ongkue mbo'u nahi aku mo'ineeo ngangaku, aku mepau a laro ma'isono sumangaku, me'anaiki a laro masusano aroaku.

¹² Nde tahike ongkue andio ke naga, ranta ka Iponaakune puu mpodagai?

¹³ Tewala kupewowoloo: Poturiaku ta moweeakune pontarero, ka pepomboleaku ta mokomonongkoo pompemasusaku,

¹⁴ onaemo ka Ipodengkeakune ipiku ka modengkeakune linolaro.

¹⁵ Ongkue mbo'u inehekupo tinolonggeo ka mate sekonopo tumembio masusaku.

¹⁶ Te'osa aku, nahi kubehe tuwu ranta nahina tampulaano. Po'inee akumo asa-asaku, hangano oleo ntumuwuku butu kana pepuurino penaa.

¹⁷ Nde hapake mia, ranta onae Ipelangkai ka Iperioo,

¹⁸ ka Itepohaweakono sompo mo'oru ka I'arahakono sompo tempo?

¹⁹ Hawe te'ipia mbo'u tempono Omiu nahi limbao pengkita-Miu inso ndi ongkue, ka nahi po'inee aku asa-asaku ka kutengko'ala montele onuiku?

²⁰ Tewala moweweu aku hala, hapake anu kuweweuomo ndi Omiu, Puu mpodagai mia? Tembio ka Ipokogagi aku tiiano kae-Miu, ranta ka kugagi tembiano koroiku?

²¹ Tembio nahi I'ampunio halaku, ka nahi pahihiakune salaku? Hangano, kanandio-andio tepombole aku a laro pampawu, ka I'amba umungke aku, sine nahi kukongko mbo'u.”