Ayubi 6 - Wunta Mempori

I Ayubi me'o'ole a nsambe'eno 6:1-30

¹ Ka i'amba sumangki i Ayubi,

² ”Ha, bakanaano itinimba makatialino aroaku, ka urasa'oku ninaa meronga a wawo pontimbaa!

³ Mobeano manasa ta lumaloio one a ntahi; onaemo pu'uno madaraomo pauku.

⁴ Hangano, ana mpana inso ndi Ondae Anu Tedoa Pabawa tepaho a ngkoroiku, ka rasuno i'osoo sumangaku; langkaino pabawa-Do Ue Ala tinena umewai aku.

⁵ Mekiilike kalide mo'ila umpeda ewo mongura? Me'ongelike sapi umpeda kaangano?

⁶ Ta kinaake kaanga motewe anu nahi pe'ohia ke hinao naminoke a moputeno su'ului manu?

⁷ Nahi kubehe umanggao, luwuno atuu kaanga anu mokonte'u'ue aku.

⁸ Ha, po'ineeomo ka ite'ihii po'emaku ka Doweeakune Ue Ala hapa pine'osaiku!

⁹ Po'ineeomo ka Dopemoikoo Ue Ala pirego aku, po'ineeomo Dopotiio kae-Do ka mepate aku.

¹⁰ Onaemo anu da gagi tareroku, tendeano aku melonso mo'unde i tempono pompemahakiku anu nahina pompehohawano, hangano nahi kuhori humapuo pau-Do Anu Tedoa Mempori.

¹¹ Hapake rosoku, ranta kupolio mompetea, hapake tuwuaku lembuiano, asalakono ranta ka kusabara?

¹² Hapake rosoku kana rosono watu? Hapake koroiku inso a mala?

¹³ Kombake nami hina mbo'u pontulungi ndi ongkue, ka tekaduduia olai inso ndi ongkue?

¹⁴ Isema umontoo pompehohawa a mpe'asa miano, nahi doitoako Ira Anu Tedoa Pabawa.

¹⁵ Luwuno pepaekompoku nahi domempine'ala-ala kana korono mo'are, kana empehino korono mo'are anu waa moliu;

¹⁶ uwoino mowewu hangano baku, i larono tewuni seru baku,

¹⁷ anu tempae i tempono motu'i-tu'i, ka mokari a mpo'iangano tempono i'aluo mokula;

¹⁸ melengku-lengkuako pelempano solono, waa a mpada londa, ka i'amba moliu.

¹⁹ Bawaano mia mpebalu-balu inso i Tema mpo'ungke uwoi ka pebawaa inso i Sieba mperorohiakono,

²⁰ sine mokoko'iido hangano pompe'ala-alado atuu, sahawedo i ra'ai mpe'o'ole ira.

²¹ Kanandio-andio kanatuumo omiu ndi ongkue, mansano imengkitao anu mongkokongiri, medoitokomiu.

²² Hori akuke mepau, ’Impoweeakune hapa-hapa, ke impoweeakune doi anu nahi pototono inso a arataamiu,

²³ ke impotola aku inso a ngkaedo iwali, ke imentolosi akumo inso a ngkaeno mia lambaha?’

²⁴ Paguru akumo, asalakono aku menoro-noro; ka tisoakune mongkona hapa kutesaa.

²⁵ Tedoa mompokomahaki luwuno pau anu moleo! Sine hapake tinoono pontata inso ndi omiu atuu?

²⁶ Hapake tinoomiu mentatao pinauku? Hapake pinauno mia anu nami hina pompe'osaiano butu kana angi telalo?

²⁷ Maupo a nana'ote nahina amano mpotende komiu undi, ka sambe'emiu imeweweuo kana balu-balu.

²⁸ Kanandio-andio, impewolilimo ndi ongkue; nahi aku megaupi i aromiu.

²⁹ Impepokulemo, siimo ihina gagi poweweu molengku, impepokulemo, manasa ongkue mentee.

³⁰ Hinaoke molengku a eloku? Nde langirano ngangaku nahi polioke mosisinggeo masolaa?”