Ayubi 5 - Wunta Mempori

¹ Peboolimo, hinaoke mia anu sumangkiko? Ndi sema i olodo mia mempori komepetulungi?

² Menteeano, mia benge-benge mateako mahaki aroa, ka mia motea aroa ipepateo kohili.

³ Ongkue isa'a hori mongkita mia benge-benge mehaka, sine tetutu kutotonaao po'iangano.

⁴ Luwuno anano wela nahi tetulungi, ondae melinolanda a mpewowa langkai nahina mia anu motola ira.

⁵ Hapa anu sinowino, pingko domengkaano mia anu mokoninggo, tendeano rinontu inso a ntonga-tongano rui, ka luwuno mia mokoranga memosisiriakono pompolino.

⁶ Hangano marasaia nahi pe'umbaako inso a pampawu ka masusaa nahi tuwu inso a wita.

⁷ Sine, mia moweweuakono masusano koroino onaeno, kana kinsano api mantande ipenae-nae.

⁸ Sine ongkue, manasa aku umungke Ira Ue Ala, ka ndi Ondae Ue Ala aku pohaweo teweweuku.

⁹ Ondae weweuo luwuno wineweu langkai ka nahi pinokohawe laro, saru luwuno anu kinohali-haliako anu nahi pinokopau hadiono.

¹⁰ Ondae mompotii usa i wawontolino ka modontai uwoi a wawo lere.

¹¹ Mia hinao tataano ninaa a mpo'iangado anu pinelangkai, mia mpopemasusa pinoweeako pontulungi.

¹² Nahi Dopokogagio tinoono mia anu pande me'akala, onaemo ka nahina hasilino wineweuno kaedo;

¹³ Ondae morako mia monto'ori anu pande me'akala, patuduno mia me'akala nahi Dopokogagio.

¹⁴ Tempono meene tutuwi ira wongi-wongi, ka tempono ntonga oleo ondae mperare kana tempono wongi.

¹⁵ Sine Ondae mongkadudui mia mongkokolaro inso a pompepaukiakodo, ka inso a ngkaeno mia moroso.

¹⁶ Kanandiomo hinao pomperorohiado mia kodei, ka molengkua mbo'u mekomu.

¹⁷ Menteeano, me'uraomo mia anu Dokuahakono Ue Ala, onaemo pu'uno tarimaomo pompaguru-Do Anu Tedoa Pabawa.

¹⁸ Hangano Ondae anu belaio, sine Ondae koa mbo'u anu waluo; Ondae anu tumunduhio, sine kae-Do koa mbo'u anu mokotompao.

¹⁹ Inso a onoo rupa ma'isoa omue Dopotolako; ka i larono opitu rupa omue nahi konako urasa'o.

²⁰ I tempono mokoninggoa Dopotolako inso a matea, ka i tempono peteaa inso a mpabawano ponai.

²¹ Inso a ponsepino elo omue tekadudui, ka omue siimo doito, tewala hawe tampulaa.

²² Tampulaa ka mokoninggoa komengingisiio ka kondehora mo'ila nahi kodoitoakono.

²³ Hangano i'olomu ka luwuno watu a mpada ta hina pedandia, ka kondehora mo'ila ta mesintuwu saru omue.

²⁴ Omue kotumo'orio nine kemamu nahina anu sumosanggolio, omue paresao pada pompakambiamu ka nahi ta hina tetadimu maupo hapa.

²⁵ Omue kotumo'orio nine inulemu gagi hadio ka ana'uemu kana ewo a wita.

²⁶ I larono tende ntinuwu omue kometii a laro ngkaburu, kana te'uno gandu winawa mewinso ia tempono.

²⁷ Menteeano, luwuno atuu kimemparesaomo, lano kanandiomo teweweuno; rongeomo ka to'oriomo!”