Ayubi 42 - Wunta Mempori

I Ayubi mokuleo pauno ka me'o'ole 42:1-6

¹ Ka i'amba sumangki i Ayubi ndi Ondae i Ue,

² ”Kuto'orio nine Omiu polio weweuo luwuakoano, ka nahina tinoo-Miu anu nahi gagi.

³ Omiu mesikeno, ’Isemake onae anu tumutuwio pomputusi nahina ponto'ori?’ Onaemo pu'uno, nahina ponto'ori kutumutuluomo mongkona luwuakoano anu tedoa kukohali-haliakono ka anu nahi kuto'orio.

⁴ Pau-Miu, ”Rongeomo, Ongkuemo anu mepau; Aku sumikenoko, ka upaua-Kune.”

⁵ Butu koa pau inso a mia kurongeo mongkona Omiu, sine kanandio-andio mataku isa'a kumita Komiu.

⁶ Onaemo pu'uno kumokoko'iiakono pauku ongkueku ka saru me'o'ole ongkue mentoro a laro pampawu ka awu.”

Teweweuno i Ayubi pinokomoiko 42:7-17

⁷ Mansano Dopohaweo i Ue mongkona atuu ndi Ayubi, Ondae i Ue mepau ndi Elipasi, to Temani, ”Tekuda-Ku tensila ndi omue ka a orua ira sambe'emu, hangano nahi mentee impepau mongkona Ongkue kana tetenaa-Ku i Ayubi.

⁸ Onaemo pu'uno, alaomo opitu sapi lakino ka opitu bimba lakino. Lakomo a ntetenaa-Ku i Ayubi ka pesombaakonomo luwuno atuu gagi pesomba tinunu tiano koroimiu. Tetenaa-Ku i Ayubi ta mekakaiakomiu hangano po'emano anu Aku tumarimao. Bakanatuu nahi Aku weweu komiu menunu saru benge-bengemiu, hangano nahi mpepau mentee mongkona Ongkue kana tetenaa-Ku i Ayubi.”

⁹ Ka i'amba i Elipasi, to Temani, i Bilidadi, to Suahi, ka i Sopari, to Na'ama melako meweweuo kana hapa anu pinau-Do i Ue ndi ondae. Ondae mbo'u i Ue tumarimao po'emano i Ayubi.

¹⁰ Ondae i Ue mokomoikoo teweweuno i Ayubi mansano mekakaiako ira sambe'eno. Ondae i Ue weeakono i Ayubi luwuno pine'ueno i ndi'ipua hawe meluka mpendua.

¹¹ Ka i'amba luwuno pepaekompono tama ka beine saru luwuno tepoto'orino i ndi'ipua me'aiwa ndi onae ka mpongkaa meronga saru onae i rahano. Mpetonda ira mpompemasusa ka mentareroo hangano luwuno urasa'o anu Dopokonaakono i Ue ndi onae. Ondae singge mpoweeakono doi asa kesita ka asa sinsi wulaa.

¹² Ondae i Ue rumonsoo i Ayubi a laro ntumuwuno lembuino laluaopo sekono tuwuno anu i ndi'ipua. Onae mohawe hopulu ka opaa nsowu bembe bimba, nomo nsowu unta, asa nsowu pasa sapi, ka asa nsowu kalide waino.

¹³ Onae mohawe mbo'u opitu ana ntama ka otolu anano beine.

¹⁴ Anano beine amba-ambano ineeakono i Yemina, anu ko'orua i Kesia, ka anu ko'otolu i Kerenehapu.

¹⁵ I asa wawo wita nahina hinawe beine kana tekosido anano i Ayubi. Ondae ipoweeako ira amado tia pusaka meronga saru luwuno pepaekompodo tama.

¹⁶ Umarino atuu i Ayubi da tuwu asa etu ka pato pulu nta'u tehineno. Ikita ira anano ka ana'ueno hawe a inule ko'opaa.

¹⁷ I Ayubi mate tempono mota'uomo ka tende ntinuwu.