Ayubi 41 - Wunta Mempori

¹ Maupo mia anu me'upuako nahi ta mosia mokotesingkao tekudano. Isemake anu polio me'aro ndi Ongkue

² Isemake anu umaropi Aku Kupo'ineeo kongko tuwu? Hapa anu kongko i totono langi luwuno Ongkue me'ueo.

³ Nahi Aku komino mongkona parewa ngkoroino, mongkona moroso ka mosiano ka tinadeno anu tekosi.

⁴ Isema mokolohuo sangkano i bungkuno? Lemba labuno anu orua api, isema mokolompahio?

⁵ Isema moko'ungkahio pewowa ngusuno? Limbu ngisino hinao mongkokongiria.

⁶ Wawo bungkuno onaemo petuda-tudado kanta, tepotako moroso kana pontondoni.

⁷ Asa ka anu susua tedoa pore, ranta nahi pokompewinsokio angi,

⁸ anu asa metako a anu susua, menggoe nahi teponsia mbo'u.

⁹ Morinano mopansari wanta, matano kana tebosino towea.

¹⁰ Inso a ngangano meluarako pompokomewanta, ka bunga api ntesiarawo.

¹¹ Inso a laro engeno membombo laho kana inso a ngkuro anu rede ka ihino monggenggelento.

¹² Penaano mompokomelanga waro, ka langano api meluarako inso a ngangano.

¹³ A ngkeu we'uno hinao roso; doitoa mpelonso-lonso i arono.

¹⁴ Pelupino bauno modato metako moroso ndi onae, nahi telelu.

¹⁵ Aroano motea kana watu, motea kana watu pogili i totono.

¹⁶ Tewala onae mentade, luwuno anu pabawa gagi mpondende, gagi bulalingo hangano doito.

¹⁷ Sinapoiako ponai, nahi mobela, kanatuu koa mbo'u kansai, pana ka pando.

¹⁸ Labu potaeno kana seami, mala kana keu mowuru.

¹⁹ Onae nahi pokosaario ana mpana, watu pokembi kana mebali ndi onae gagi dodono pae.

²⁰ Tarasulu potaeno dodono pae ka tiino pando ipengingisiio.

²¹ I totono hinao siba tami montaso; onae mepanee a wawo rege kana pehahiano ponsesa.

²² Ondaloano iweweuo lulua kana kuro, tahi ipokogagio ponahuano rampa-rampa.

²³ Onae mobinta wure anu mewanta, ranta tahi malua hinala wuu mopute.

²⁴ Nahina pengkenano i wawontolino, onaemo anu hinao penaano nahi ponto'ori doito.

²⁵ Luwuno anu ondau doito ndi onae; onaemo mokole a luwuno kondehora lambaha.”