Ayubi 40 - Wunta Mempori

Ondae i Ue umaropio i Ayubi 40:1-9

¹ Ka i'amba inso a laro angi mokora Ondae i Ue sumangkio i Ayubi,

² ”Omue pepatindamo kana tama, Aku sumikenoko, ka upaua-Kune.

³ Nde nahi kotumondaoke pobitara-Ku, mokonsala Aku ka mokomenteeo koroimu?

⁴ Nde tokiamuke kana tokia-Do Ue Ala, ka kopolioke merunduako suara kana Ondae?

⁵ Koroimu ramba-rambaakonomo telelea ka marambaa, pokonaomo sangka pompelangkai ka mewanta!

⁶ Luarakonomo bombano tekudamu; poposoo sompo mia anu mompelangka-langkai ka pokongkodeiomo!

⁷ Poposoo sompo mia anu mompelangka-langkai, pokompetuunduomo, ka pokotampulaomo mia mosa'o gauno a mpo'iangano!

⁸ Tano iramo mperonga-ronga a laro pampawu, uko iramo a mpo'ianga anu tewuni.

⁹ Ka aku mbo'u umunde-undeko, tewala kae ngkoanamu moweeko ponangia.”

Gambarano mongkona ngara nili 40:10-19

¹⁰ ”Poposoomo ngara nili, anu Kuweweuomo kana koa mbo'u omue. Onae mongkaa ewo kana sapi.

¹¹ Poposoomo roso a ntongano, roso a luwuno ia kompono!

¹² Ipontadeo ikino kana keu arasi, ihi mpa'ano mpe'ena-ena.

¹³ Luwuno wukuno kana pipa mala, rangka wukuno kana watano labu.

¹⁴ Onae amba-ambano Doweweuo Ue Ala, anu hinao penaano Dopoweeakono parewa mpeteano ponai;

¹⁵ oo, luwuno pongku moluarako hasili tiano, luwuno kondehora mo'ila mpepalindo i ra'ai.

¹⁶ Onae mepombole a ntoto pinopaho teratai, tewuni a laro ewo gelaga ka epe.

¹⁷ Onae meneo a eo-eono pinopaho tabo-tabo, ilimbuo keu gandarusa.

¹⁸ Menteeano, maupo mansolo korono, nahi mondende; onae nahi danggara, maupo lulua Koro Yarade hawe a ngangano.

¹⁹ Ira mpokorakoo miake onae inso i arono, mengkalo'engeakono koloro sama?”

Gambara mongkona lewiata 40:20–41:25

²⁰ ”Komokodiiakono pomekake lewiata, ke dumiiakono koloro elono?

²¹ Kopolioke mompokonaakono koloro lauro a engeno, dumuhuakono kai a aseno?

²² Nde ta hadioke ipompau po'emano mepepehohawa ndi omue, ke mepau molusa-lusa ndi omue?

²³ Nde ta moweweu pedandia ke saru omue, onaemo ka u'alao gagi ata ranta nahina tampulaano?

²⁴ Kopolioke memae-maeakono kana manu-manu, ka tumanggoo tiado anamu beine?

²⁵ Nde ira me'asao puu mporako bouke onae, ke mentia-tiaako ira i olodo puu mpebalu-balu?

²⁶ Kopolioke meduhuakono sarampa a ngkulino, ka saru kansai a uluno?

²⁷ Naaomo kaemu i wawono! Pewowoloomo peteano! Nahi koweweuo mbo'u!

²⁸ Menteeano, pomperorohimu mooa! Da'iaopo ikinita, mia tebangkuomo.