Ayubi 4 - Wunta Mempori

LAMORO 4–31 PEPAU-PAUNO I AYUBI SARU LUWUNO SAMBE'ENO I Elipasi kumuahakono i Ayubi 4:1–5:27

¹ Mepauomo i Elipasi, to Temani,

² ”Me'o'olekoke, ba dompo'arahako mia mpepauakomu? Sine isemake anu mokompekomu mpiha?

³ Menteeano, hadioomo mia pinagurumu, ka kae anu molema upokorosoomo;

⁴ mia anu tedonta waliomo tinandeako paumu, ka olontuu anu nami moroso upokorosoomo.

⁵ Sine kanandio-andio, koroimu anu inaluno, ka me'o'oleko, koroimu anu kona, ka omue tededengke.

⁶ Kombake doitoako Ira Ue Ala gagi pehondaamu, ka pesombano ntu'u tinuwumu ta gagi pomperorohimu?

⁷ Penootiomo andio: isemake anu mate nahina salano ka isuake domempinepate mia anu moleo?

⁸ Anu kukitaomo onaemo nine mia anu mompadeko mosa'o ka morawo masusaa, onae koa mbo'u sinowino.

⁹ Ondae memate hangano penaa-Do Ue Ala, ka moliu hangano pepuurino enge-Do.

¹⁰ Singa mengaoli, singa meraali, tepuduomo ngisido singa mongura.

¹¹ Singa mate hangano makura kaanga, ka luwuno anano singa waino ntesiarawo.

¹² Asa pe'oliwi pinohaweomo ndi ongkue nahina tumo'orio ka biriku rumongeo petanga-tangano,

¹³ tempono mo'ia mewowoloo mongkona linolaro wongi, tempono mia tesese a laro mpoturino rodo.

¹⁴ Doito ka mondende pabawai aku, ka luwuno wukuku mondidi-ndidi.

¹⁵ Asa penaa lumalo aku, singkaomo wulu rumbaku.

¹⁶ Hinao asa rupa menaa-naa, sine rupano nahi kuto'orio. Asa tadeno koroi kongko i arono mataku, pau metanga-tanga kurongeo:

¹⁷ Gagi koake asa mia mentee i aro-Do Ue Ala, gagi koake asa mia mempori i aro-Do anu Mokogagio?

¹⁸ Kitaomo, tetenaa-Do nahi Dompe'ala-ala ira, maupo mala'eka-Do Dohawe ira mepansia.

¹⁹ Tamoako mbo'u ondae anu mpo'ia a laro laika wita pulu, anu empehino a laro pampawu, anu mate tehidi kana ule-ule!

²⁰ Mompu'u mo'oru hawe ngkiniwia domempinokotampula ka nahi domempinerio memate ranta nahina tampulaano.

²¹ Komba binutake kemado? Ondae mbo'u memate nahina ponto'ori.