Ayubi 39 - Wunta Mempori

¹ Kopolioke morako kaangano singa waino, ka domentende mpongkaa singa mongura,

² tewala mpompora ira a laro nsenodo, mpontowoki a ntoto ewo mokapa?

³ Isemake mompatindaakono kaangano manu-manu paa-paa, tewala mpokao-kao ira anano ndi Ondae Ue Ala, mpolio-lio hangano nahina kaanga?

⁴ Nde uto'orioke tempo pe'anaado bembe a ntorukuno, ke poposoo rusa tempono mahaki me'ana?

⁵ Kopolioke dumoao opia tehineno hawe ka isompo wulano, ka tumo'orio tempono me'ana?

⁶ Saru lumongkuo olontuu ka dompe'anaakono anado, ka meluarakono ihino pe'anakaado.

⁷ Luwuno anado gagi memoroso ka langkai i tongampada, ondae melako ka nahi dompekule mbo'u ndi onae.

⁸ Isemake anu mo'ineeo kaitola kalide mo'ila, ke isemake anu kumaleo koloro petanggoano kalide melakopi?

⁹ Ndi onae Kuweeakonomo pada malua gagi po'iangano ka pada mopa'i gagi po'iangano.

¹⁰ Ipengingisiio maroano kota, nahi perorongeakono peboolido anu monsaari.

¹¹ Isompoo luwuno torukuno gagi pada pongkuriano, ka mo'ungke hapamo koa anu molowulu.

¹² Nde umehe koake onua metenunu ndi omue, ke mewongi umpeda a dula mpinotuwumu?

¹³ Kopolioke dumadaio onua tumondao salano padeko mompake koloro sama, ke onae ta mongkambuke a wita lembo tumondako?

¹⁴ Kome'ala-alaoke hangano rosono tedoa langkai? Ke komeweengakonoke anggaamu anu mobea ndi onae?

¹⁵ Nde kome'ala-alaakonoke wawao mekule hasilino witamu, ka pumpuo a mponsesaamu?

¹⁶ Saru mawongko panino manu-manu unta mongkapi-kapi, sine hinao koake pompehohawa a panino ka wuluno?

¹⁷ Hangano onae bintao su'uluino a wita, ka mo'ineeo ka imokula a laro one;

¹⁸ ikolupeo nine su'ului atuu ta pinokolanda, ka domelolandao kondehora mo'ila.

¹⁹ Igau ira anano nahina pompehohawa kana komba anano; nahi perioo maupo pe'iseino tetadi mpena,

²⁰ hangano Ondae Ue Ala nahi Dopoweeakono ponto'ori, ka nahi pinontiaako ponto'ori ndi onae.

²¹ Tempono onae moroso mokapio panino ka ipolai, ipengingisiio ngara ka anu mesawikio.

²² Omueke moweeakono roso a ngara? Omueke mompokonaakono wulu a ngkeu we'uno?

²³ Omueke anu weweuo ka ipelonso kana kosume? Pekiilino anu meroku mongkokongiri.

²⁴ Saru mawongko onae mongkaru wita lembo, saru roso onae lumako umaropio parewa mpetea.

²⁵ Ipengingisiio mongkokongiria ka nahi hori doito, upalino monsuka mo'aropi ponai;

²⁶ I wawono kadu mpana kekele, kansai ka pando ntesosangkilo;

²⁷ saru tekuda ka mosia isila'eo wita, ka ipebunde tempono irongeo unino tawuwua;

²⁸ onae mekiili sompo ipinuuri tawuwua; ka inso olai iwoomo peteaa, pompokodoitodo tadulako ka pohio mpeteaa.

²⁹ Hangano ponto'orimuke ka ipenee manu-manu singko, wileo panino te'aro i selata?

³⁰ Omueke parentao rajawali ka ipenee olai kontahane, ka moweweu senono a mantandeano?

³¹ Onae mo'ia ka meseno a pongku watu, a punsuno pongku watu ka a ntorukuno anu motungko ihinawe.

³² Inso i ra'ai ipompensiroi mo'ungke kaanga, inso olai matano mompoposoo;

³³ anano mpo'oso rea, ka isua hinao anu mate i tu'aimo onae.”

I Ayubi me'urumako i aro-Do Ue Ala 39:34-38

³⁴ Ka Do'amba i Ue mepau mbo'u ndi Ayubi,

³⁵ ”Nde anu montata ta mengengeako Ira Anu Tedoa Pabawa? Po'ineeomo anu tumata Ira Ue Ala sumangki!”

³⁶ Sumangki i Ayubi ndi Ondae i Ue,

³⁷ ”Menteeano, ongkue andio tedoa mokoburu, sangki hapake anu aku mokoweea-Komiu? Ngangaku kutompoakono kae.

³⁸ Pohona umari akumo mepau, sine nahi aku walio; tamoako pendua, nahi aku motilaloakono.”