Ayubi 38 - Wunta Mempori

LAMORO 38–42 SANGKI-DO i Ue NDI AYUBI Pabawa-Do i i asa wawontolino 38:1–39:33

¹ Ka i'amba inso a laro angi mokora Ondae i Ue sumangkio i Ayubi,

² ”Isemake onae anu weweuo nahi mengkaa pontiso molalo luwuno pau anu nahina ponto'orino?

³ Omue pepatindamo kana tama! Aku mesikeno ndi omue ka omue asalakono paua-Kune.

⁴ Isuake omue tempono Kunaao empehino tolino? Tutuluomo, tewala hinao ponto'orimu!

⁵ Isemake anu pakosiomo songkano? Komba omueke tumo'orio? Ke isemake anu padindiomo koloro posongka ndi onae?

⁶ A wawo hapake tinandapako lodi-lodino, ka isemake anu pasao watu pondasino

⁷ i tempono anano wula umpeda meene mpeboo-booli mperonga-ronga, ka luwuno ana-Do Ue Ala mpebooli mawongko?

⁸ Isema buntoo tahi mompake tondo tempono ipewurusi meluarako inso a laro mpe'anakaa?

⁹ Tempono Kuweweuo seru gagi sangkano ka wongi-wongia gagi sawu pehawusino,

¹⁰ tidano Kupakosio, ka mompasa lansono ka tondo.

¹¹ Ka Ku'amba mepau: Hawe i ndi'ai moiko u'aiwa, si lalo, i ndi'aimo luwuno bombamu anu mompelangka-langkai ta pinenanaako!

¹² Horioke a laro ntumuwumu tumenao umpeda meene ka i'aiwa ke towea upontisoakono po'iangano

¹³ ka i'inio luwuno tompano tolino, ranta mia mosa'o gauno itapisio inso ndi onae?

¹⁴ Tolino atuu bali kana wita pulu anu tinondoni, luwuakoano mesora kana sawu.

¹⁵ Mia mosa'o gauno rinontu mewineno, ka tokia anu moroso pinudu.

¹⁶ Omueke anu metii hawe a insoano tahi, ke melempa-lempa i totono tahi malua?

¹⁷ Nde te'ungkahike pewowa langkaino matea ndi omue, ke horikoke kumitao pewowa langkai worikidi?

¹⁸ Nde upokonto'orioke maluano tolino? Pokomengkaaomo, tewala uto'orio luwuno atuu.

¹⁹ Isuake sala lumako a mpo'ianga mewine, ka isuake po'ianga wongi-wongia,

²⁰ ranta ka upokoteoo i witano, ka tumo'orio luwu sala lumako a rahano?

²¹ Manasa omue tumo'orio, hadio hangano tempo atuu hinakomo, ka porokono oleo ntumuwumu hadioomo!

²² Nde mewinsokomoke hawe a ponaapa seru baku ke kumitao ponaapa usa uwoi baku,

²³ anu ninaa-Ku tiano tempo masukaraa, tiano tempo peteaa ka pe'iwalia?

²⁴ Isuake sala lumako a mpo'ianga tesiarawoano mewine, a mpo'iangano angi sabaano oleo tesiarawo i wawontolino?

²⁵ Isemake anu mongkeke waaano usa marombo ka pesalano koliki rundu,

²⁶ ka ipoweeakono usa a wawo wita ba isua nahina mia, a wawo mpada londa ba isua nahina mia

²⁷ ka ipokomowohio pada one ka maluaano ntu'u, ka motuwu ira tumba ewo mongura?

²⁸ Nde hinaoke amano usa atuu? Ke hangano isemake ka ipine'anaako te'itino tontoru?

²⁹ Inso a mpe'anakaano isemake peluarakono uwoi baku, ka tontoru baku i langi, isemake anu me'anaakono?

³⁰ Uwoi baku kana watu, ka wawo ntahi malua gagi motea.

³¹ Upolioke botoo wutuno anano wula Karatika, ka lumolohio ponguno anano wula Belanti?

³² Upolioke mosabao asa howu anano wula gagi petondoni a tempono, ka metewawa a anano wula Bidu saru luwuno anu tumondao?

³³ Nde uto'orioke luwuno songka i langi? Ke pakosio poparentaano i wawontolino?

³⁴ Upolioke wuatakono suaramu hawe a laro nseru, ka isampuko mbo'u mowo?

³⁵ Kopolioke mompotola koliki ranta ka dompesosawu, saru motae ndi omue: omamimo andio?

³⁶ Isema monaa ponto'ori a laro nseru ke isema moweeakono ponto'ori a mpebotono domu?

³⁷ Isema mokodoao seru mompake ponto'ori, ka isema polio umuwuo luwuno kusi i langi,

³⁸ tempono pampawu baku gagi labu tinawa, ka batuno wita ntepotako?