Ayubi 37 - Wunta Mempori

Maramba-Do Ue Ala i asa wawontolino 37:1-24

¹ ”Mentee ntu'u, onaemo pu'uno aroaku mondende ka melonso inso a mpo'iangano.

² Rongeo, rongeomo pohohono suara-Do, unino rundu anu meluarako inso a nganga-Do.

³ Dopotolao a luwuno totono langi, ka berese-Do a sompo tompano tolino.

⁴ Ka i'amba suara-Do u'uru, Ondae merunduako suara-Do anu langkai; Ondae nahi Do'ontoo maupo hapa, tempono suara-Do teronge.

⁵ Ondae Ue Ala merunduako suara-Do anu tinengiriako; Ondae moweweu luwuno wineweu langkai anu nahi tompokonto'orio;

⁶ hangano a nseru baku Ondae mepau: Tedontamo i tolino, kanatuu koa mbo'u a usa marombo ka usa anu mongkokongiri.

⁷ Ondae monaakono tondonino a ngkaeno sompo mia ka domento'orio luwuno mia wineweu-Do.

⁸ Kondehora mo'ila mewinso a mpewuniano ka mo'ia a laro nsenono.

⁹ Angi mokora meluarako inso a bolongkono, ka angi morini inso i utara.

¹⁰ Inso a mpenaa-Do Ue Ala gagiomo uwoi baku, ka wawo uwoi malua gagi baku.

¹¹ Seru mokapa mbo'u Dopo'ulaakono uwoi, ka seru sumiarawoo koliki-Do,

¹² ka i'amba koliki-Do tesosangkilo a luwuno siuno montonda petewawa-Do ka domeweweuo luwuno anu Dopeparentaako i wawontolino.

¹³ Doweweuo ka ihaweo tinoono, moiko ka igagi pontunduhi a ihino tolino-Do maupo ka ipinokomengkaa petenunu mompehohawa.

¹⁴ Ta'oomo biri a luwuno atuu, hei Ayubi, pomperodomo, ka pekokoongakonomo luwuno wineweu-Do Ue Ala anu kinohali-haliako.

¹⁵ Nde uto'orio koake, kana'umpe Ondae Ue Ala moweeakono anggaa, ka mompansari wanta inso a nseru-Do?

¹⁶ Nde uto'orio koake mongkona penae-naeno luwuno seru, mongkona luwuno wineweu anu kinohali-haliako inso ndi Ondae Anu Tedoa Tumo'orio,

¹⁷ hei omue, anu sangkano gagi mokula, tempono tolino momperodo hangano mokulano angi selata?

¹⁸ Nde upolioke kana Ondae motudao seru gagi laro langi, motea kana tami tinawa?

¹⁹ Pauakamimo hapa anu asalakono kami mempauo ndi Ondae; nahina anu kami mpokopopauo hangano wongi-wongia.

²⁰ Nde Ira pinauakoke nine aku mepau? Hori irake mia mpotae nine onae ineheno pinepate?

²¹ Kanandio-andio mewine nahi tengkita, hangano ipokowongi-wongio domu; ka i'amba mepuuri angi, ka kolingaaomo laro meene.

²² Inso i utara me'umbaako wanta kana wulaa; Ondae Ue Ala itutuwi Ira maramba-Do anu mongkokongiri.

²³ Anu Tedoa Pabawa, anu nahi topokonto'ori Ira, langkai pabawa ka moleo-Do; maupo mompoliako menteea nahi Dopompokonsii.

²⁴ Onaemo pu'uno mia medoito ndi Ondae; sompo mia anu motae onae hinao ponto'orino, nahi Doperioo.”