Ayubi 36 - Wunta Mempori

Tinoono marasai onaemo tepidia 36:1-33

¹ Ka i'amba motae i Elihu,

² ”Sabaramo sarai, aku koa paguruko, hangano da hinao anu aku pauo anee-Do Ue Ala.

³ Aku koa humaweo ponto'oriku inso olai ka mokomentee Ira Anu Weweu aku.

⁴ Hangano, menteeano komba pegaupi pinauku, asa mia anu sompo ponto'orino umaropiko.

⁵ To'oriomo, Ondae Ue Ala atuu mosia sine nahi Dopokongkodeio maupo isema, moroso Ira ka mosia a laro pompewowolo anu molino.

⁶ Mia mosa'o gauno nahi Dopo'ineeo tuwu, sine moweeakono moleoa a mia marasai,

⁷ Nahi Dolimbao pengkitano mata-Do inso a mia mentee, sine numaa ira ranta nahina tampulaano i horido luwuno mokole a wawo ngkadera poparentaa, onaemo ka domempinelangkai.

⁸ Tewala ondae mempinonguako rante, kona rako a laro ngkoloro marasaia,

⁹ onaemo ka Dopopoto'oriako ira wineweudo, ka mongkona salado, hangano ondae mpompelangka-langkai,

¹⁰ ka Do'ungkahiako ira birido a pompaguru, saru tumena ira mpepokule inso a wineweu mosa'o.

¹¹ Tewala mpomperorongeako ira ka mpesomba, ira mentuwu a laro me'uraa hawe a mpoko'ariano luwuno oleo ntumuwudo ka a laro manangaia hawe tampulaano luwuno ta'u tumuwudo.

¹² Sine, tewala nahi domperorongeakono, ira memateako pando, ka memate a laro pe'ulu watudo.

¹³ Mia anu aroano mosa'o monaa tekudaa; nahi dompebooli mpepetulungi, tempono Dopongu ira.

¹⁴ Ondae memate tempono mongura, ka poko'ariano tuwudo a laro mokoko'ii.

¹⁵ Ondae kumadudui ira mia memarasai a laro marasaiado, ka birido inungkahiako pompokonsii.

¹⁶ Omue mbo'u Dopopandeiko meluarako inso a laro masukaraa, a mpo'ianga anu malua nahina pinemobea, a meda pongkaangamu anu nahina mososanggoli ka buke taba.

¹⁷ Sine, omue bukeomo upohawe pohuku kana hukudo mia mosa'o gaudo, omue pabawaiko pohuku ka moleoa.

¹⁸ Siimo po'ineeo mokula aroa weweuko mompasinggiri, siimo po'ineeo langkaino pontolosi onae mokotesaako.

¹⁹ Polioke peboolimu motolako inso a masukaraa, ke luwuno rosono pe'iseimu?

²⁰ Siimo kekewoio wongi, tempono tongku melako inso a mpo'iangado.

²¹ Dagaiomo koroimu, si pansia a wineweu mosa'o, hangano onaemo pu'uno ka i'arahakomu marasai.

²² Menteeano, Ondae Ue Ala atuu maramba a laro mpabawa-Do; isemake guru kana Ondae?

²³ Isema ta tumantuio sala-Do, ka isema mosia mepau: Moweweu Komiumo molengku?

²⁴ Pewowoloomo nine omue asalakono melangkaio wineweu-Do, anu dowela mpenaniako mia.

²⁵ Luwuno mia mengkitao, inso olai domengkitao mia.

²⁶ Menteeano, Ondae Ue Ala atuu langkai pabawa-Do, nahi tompokohawe laroo, porokono ta'u-Do nahina mokoparesao.

²⁷ Dowuatakono te'i'itino uwoi i wawono, ka mokomokapao gawu gagi usa,

²⁸ anu inuwuno domu, ka siniwuiako a hadio mia.

²⁹ Isema mokonto'orio porawoa seru, ka unino rurundu a mpo'ianga-Do?

³⁰ Menteeano, mewine-Do Dorawoo lumimbu Ira, ka borungio totono tahi.

³¹ Hangano saru luwuno atuu Dobitara ira tongku, ka moweeako ira kaanga anu hadio ntu'u.

³² Orua kae-Do Doborungiakono kolikino berese ka tumenao montiu pontiiano.

³³ Hio peteaa-Do mopoto'orio hawe-Do, molengkua Do'ewaiakono tekuda-Do anu tensila.”