Ayubi 34 - Wunta Mempori

Ondae Ue Ala nahi Dopoweweu molengku

¹ Ka i'amba mepauomo i Elihu,

² ”Rongeomo pinauku, omiu mia mponto'ori, imenta'oomo birimiu ndi ongkue, omiu mia memolino pinewowolomiu.

³ Hangano biri umarahakono luwuno pau, kana langira mompenami kaanga.

⁴ Po'ineeomo tomemputusio ontaeto hapa anu moleo, metantuio mperonga-ronga hapa anu moiko.

⁵ Hangano i Ayubi motae: Ongkue mentee, sine Ondae Ue Ala umalao tiaku;

⁶ Maupo hinao tiaku, ongkue pinotaeako megaupi, maupo nahina sala wineweuku, mobelaku nahi pokotompa.

⁷ Isemake kana i Ayubi, anu mo'oso pompepaukiako kana uwoi,

⁸ anu lumako tepo'asaako ira mia anu mpoweweu mosa'o ka mewali-waliako ira mia mosa'o gaudo?

⁹ Hangano motaeomo: Nahi mentudu a mia, tewala onae Dopekonoo Ue Ala.

¹⁰ Onaemo pu'uno, omiu mia anu molino pinewowolomiu, ronge akumo: Ondae Ue Ala nahi Ira moweweu anu mosa'o, ka Anu Tedoa Pabawa moweweu molengku.

¹¹ Tendeano, Ondae mohuku mia menunu wineweuno, ka weweuo mia menunu peleluno.

¹² Mentee ntu'u, Ondae Ue Ala nahi Dopoweweu molengku, Anu Tedoa Pabawa nahi Dopokomolengkuo moleoa.

¹³ Isema me'ala-alaakono tolino ndi Ondae? Isema mopotembioako Ira asa wawontolino?

¹⁴ Tewala Ondae montoo i laro aroa-Do, wali umalao Penaa mempori-Do ka penaa-Do,

¹⁵ ka luwuno anu tuwu mate mperonga-ronga, ka mia mekule a pampawu.

¹⁶ Tewala molino pinewowolomu, rongeomo andio, ta'oomo birimu a mpinauku.

¹⁷ Polioke anu umo'aliaakono moleoa mo'ini pabawa, ka inehemuke komokonsala Ira anu moleo ka mosia,

¹⁸ Ondae anu mepau a mokole: Hei, mia moweweu mosa'o, a luwuno inuleno mokole: Hei mia mosa'o gauno;

¹⁹ Ondae nahi Dope'alaako a luwuno anu langkai potorono, ka nahi Dopokonse'elu ira mia pinemota'u sekonopo mia kodei, hangano luwudo onaemo wineweuno kae-Do?

²⁰ I larono asa mpiniro ondae memate, oo, ia ntonga wongi mia pinodengke ka mate, ondae anu memosia pinokotampula komba hangano kaeno mia.

²¹ Hangano mata-Do dumagaio sala ntumuwuno mia, ka Dokitao luwuno pelempano;

²² nahina wongi-wongia ke maupo worikidi, pokompewuniado mia anu moweweu mosa'o.

²³ Hangano nahi Dotantuiakono mia tempono ka i'aiwa me'aro ndi Ondae Ue Ala ka ibinitara,

²⁴ mia mosia Dopokotampulao nahi pinaresa, ka mia susua Dopotoroo umeu ira.

²⁵ Gagi, Doto'orio wineweudo, ka lumundi ira i tempono wongi, ranta ka domeropu.

²⁶ Ondae tumampele ira hangano mosa'o gaudo, ka domengkita ira mia hadio,

²⁷ hangano dompebungkui Ira, ka nahi domperioo maupo te'asa inso a luwuno sala-Do,

²⁸ ranta hangano ondae, peraalikido mia mongkokolaro mewuatako i aro-Do, ka peraalikido mia marasai Dorongeo.

²⁹ Tewala Ondae merodo-rodo, isema ta mohuku? Tewala Dowunio rupa-Do, isema ta kumita Ira? Ondae umatorao aasa tongku maupo nte'o'asa mia

³⁰ kasi dompoweweu po'ehedo mia mosa'o gaudo ka igagi ohodo mia hadio.

³¹ Sine, tewala aasa mia mepau ndi Ondae Ue Ala: Mompelangka-langkai akumo, sine nahi aku moweweu mosa'o mbo'u;

³² hapa anu nahi kupokonto'orio, paguruakunemo; tewala moweweu akumo molengku, nahi aku weweuo mbo'u.

³³ Montonda pohawemu nde asalakonoke Ondae Ue Ala moweweu pombaloa hangano nahi utarimao? Gagi, omuemo anu asalakono putusio, komba ongkue; pauomo hapa anu tino'orimu!

³⁴ Mia anu molino pinewowolono mepau ndi ongkue, kanatuu koa mbo'u mia monto'ori anu merorongeakune:

³⁵ I Ayubi mepau nahina ponto'orino, ka pinauno nahina pengkonaano.

³⁶ Ha, po'ineeomo i Ayubi ka i'inarahako mpiha, hangano onae sumangki kana mia mosa'o wineweuno!

³⁷ Hangano onae tumiangiakono sala a halano, ipokungkuakami kae i olomami ka hadio mpau ndi Ondae Ue Ala.”