Ayubi 33 - Wunta Mempori

Pepaudo Ue Ala a mia mperupa-rupa 33:1-33

¹ ”Sine kanandio-andio, hei Ayubi, rongeomo luwuno pauku, ka ta'oomo birimu a luwuno pinauku.

² To'oriomo, ngangaku ku'ungkahiomo, eloku i totono langiraku mepau.

³ Pinauku meluarako inso a aroaku anu moleo, ka wiwiku mokomengkaao nahina tewuni hapa anu tino'ori.

⁴ Ongkue Dopokogagi akumo Penaa-Do Ue Ala ka penaa-Do Anu Tedoa Pabawa weweu aku tuwu.

⁵ Tewala upolio, sangki akumo, pepatindamo aropi aku, korahakonomo koroimu.

⁶ Menteeano, ndi Ondae Ue Ala ongkue mengkena saru omue ongkue mbo'u wineweu inso a wita pulu.

⁷ Gagi omue siimo i'aluko pondendea ndi ongkue, tembia anu aku weeakomu nahi ta mobea.

⁸ Sine mepaukomo umpeda a biriku, ka luwuno pinaumu kurongeomo:

⁹ Ongkue morina, nahina sala wineweuku, ongkue mempori, nahina salaku.

¹⁰ Sine mohawe Ira pepu'uano umewai aku, Dotuluri aku gagi iwali-Do.

¹¹ Karuku Dowinsoo a laro mpanga, luwuno pesalaaku Dodagaio.

¹² Menteeano, a laro mongkona atuu omue nahi mentee, kanatuumo ku'ewaio paumu, hangano Ondae Ue Ala atuu lumaloio mia.

¹³ Tembio ka utuntu Ira, nine nahi Dosangkio luwuno pauno mia?

¹⁴ Hangano Ondae Ue Ala asa orua rupa pepau-Do, sine nahi dompekokoongakono mia.

¹⁵ A laro mo'ipi, a laro pongkita tempono wongi, tempono mia moturi rodo, mepombole a mpoturia.

¹⁶ I tempomo atuu Do'ungkahio birino mia ka mokomponde-ndeako ira luwuno pongkuahako,

¹⁷ ka dompepokule mia inso a wineweudo, ka mokotampulao pompelangka-lakaino mia,

¹⁸ ka ikorahakono penaano inso a ngkaburu kineke, ka tuwuno inso a mateako pando.

¹⁹ Onae kinuahakoako marasaia a mpoturiano, ka tepangkuno wukuno nahi penaa-naa;

²⁰ kompono te'osaako kaanga, po'eheno mongkaa kaanga anu mo'ahi tetadi;

²¹ ihino tenono ranta nahi tengkita mbo'u, wukuno anu se'eluno nahi tengkita, lansiomo,

²² penaano mbo'u rumangkuhio kaburu kineke, ka tuwuno umpedaako ira anu mpowawa matea.

²³ Tewala i horino hinao mala'eka, asa i olono asa nsowu, gagi pompohawe anu mokomengkaao a mia sala anu mentee,

²⁴ ka Ira mehohawao saru mepau: Potolao, kasi petii a ngkaburu kineke; doi pontolosi Kuhaweomo.

²⁵ Koroino madoopo sekono mia mongura, mepokule kana tempono imongura.

²⁶ Onae mekakai ndi Ondae Ue Ala, ka Ondae Ue Ala memoikoo tumarimao; ikitao rupa-Do saru mebooli mawongko, ka menteea Dopokuleo Ue Ala a mia.

²⁷ Onae ta menani i arodo mia: Moweweu akumo hala ka mokomolengkuo anu moleo, sine mongkona atuu nahi Dosuloakune.

²⁸ Dopotolaomo penaaku inso a nsala lumako a ngkaburu kineke, ka tuwuku ta mongkita mewine.

²⁹ Menteeano, luwuno andio Doweweuo Ue Ala pendua, tendeano pentolu a mia:

³⁰ mokuleo penaano inso a ngkekeno kaburu, ranta ka ipokomewineo wanta tuwu.

³¹ Pekokoongakono, hei Ayubi, ronge akumo, penoro-noromo, ongkuemo anu mepau,

³² Tewala hinao anu mingki pinaumu, sangki akumo; pepaumo, hangano ineheku mokomenteeko.

³³ Tewala naahi, laluopo perorongeakune; penoro-noromo, aku paguruakomu ponto'ori.”