Ayubi 32 - Wunta Mempori

LAMORO 32–37 LUWUNO PAUNO I ELIHU I Elihu mompau pohaweno 32:1-22

¹ Otolu ira mia atuu mpenaa-naaakono pe'ewado ndi Ayubi, hangano potaeno onae mentee.

² Ka i'amba tekudaomo i Elihu, anano i Barake'eli, to Busi, inso a nsuku Rami. Onae tekuda ndi Ayubi anu motae onae menteeopo sekono Ondae Ue Ala.

³ Onae tekudaako ira koa mbo'u sambe'eno otolu ira atuu hangano dompokosalao i Ayubi, maupo nahi domempolio mpoweeakono pe'ewa.

⁴ I Elihu nahi potilaloakono pepauno saru i Ayubi hangano ondae memota'u irapo sekono onae.

⁵ Sine mansano kumitao nine wiwido mia otolu ira atuu nami dompopau mbo'u pe'ewado, onaemo ka itekuda.

⁶ Ka i'amba i Bilihu, anano i Barake'eli, to Busi atuu, motae, ”Ongkue da mongura ka omiu mota'u komiumo; onaemo pu'uno mokoko'iiku ka doito mompau pohaweku ndi omiu.

⁷ Pinewowoloku: Po'ineeomo anu tende ntinuwu mepau, ka anu tehineomo ituwu mompopau ponto'ori.

⁸ Sine penaa anu i larono mia, ka penaa-Do Anu Tedoa Pabawa, onaemo anu moweeakono ponto'ori.

⁹ Komba butu mia anu tende tinuwuno anu hinao ponto'ori, komba butu mia anu mota'uomo anu monto'ori moleoa.

¹⁰ Onaemo pu'uno ka kupotae: Ronge akumo, ongkue mbo'u aku mompau pohaweku.

¹¹ To'oriomo, kusikoriomo paumiu, kupenootio pompewowolomu, ranta ka impohawe pau anu kona ntu'u.

¹² Ndi omiumo kupomperorohi, sine menteeano, nahina maupo te'asa mia anu mohawe tondonino nine i Ayubi sala, nahina maupo te'asa mia i olomiu anu umewaio pinauno.

¹³ Si mpotae: Mpohawe kamimo ponto'ori; butu Ondae Ue Ala anu mokonangio, komba mia.

¹⁴ Pauno komba te'aro ndi ongkue, ka nahi aku sumangkiakono pinaumiu.

¹⁵ Mebulalingo ira, nahi dompoko'ewaio mbo'u pinauno, nahi dompokompepau mbo'u.

¹⁶ Nde asalakono aku mesikori hangano nahi dompepau, hangano ondae mpentade i ra'ai ka nahi dome'ewaio mbo'u pinauno?

¹⁷ Ongkue mbo'u aku mompau pe'ewaku a tempo kuwineeako, ongkue mbo'u aku pauo pohaweku.

¹⁸ Hangano ongkue bukeako pau, roso anu kongko a ngkoroiku dumadai aku.

¹⁹ Menteeano, laro aroaku kana anggoro anu inonso, kana kadu kuli wo'ohu anu lumpa.

²⁰ Asalakono aku mepau ka isanaa aroaku, asalakono aku mepau ka umewaio pinauno.

²¹ Nahi aku me'alaako maupo ndi sema ka nahi aku umunde-undeo maupo isema,

²² hangano nahi kuponto'ori mo'unde-unde; tewala kanatuu, asalakono penaaku Ira ronga butao Anu Weweu aku.”