Ayubi 31 - Wunta Mempori

I Ayubi mekorahako nine nahina salano 31:1-40

¹ ”Moweweu akumo dandi a mataku, kana'umpe ka aku mompekokoongako ana beine?

² Ka i'amba hapa tia anu tinantui-Do Ue Ala inso i wawono, hapa tia pusaka anu pinakosi-Do Anu Tedoa Pabawa inso a mpo'ianga anu mantande?

³ Kombake matea tiano mia anu molengku ka urasa'o tiano mia anu moweweu mosa'o?

⁴ Kombake Ondae Ue Ala anu kumitao pesalaaku ka dumoao luwuno pelempaku?

⁵ Tewala ongkue mewowaliako anu nahi mentee, ke karuku dumaduo pompopo'oo,

⁶ po'ineeomo kutinimba a mpotimbaa anu mentee, ka Ira tumo'orio Ue Ala nine nahina salaku.

⁷ Tewala pelempaku pansia inso a mpesalaaku, ka aroaku tumondao pongkitano mataku, saru mokoburu anu metako a ngkaeku,

⁸ ka po'ineeomo hapa anu rinawoku, ikaano mia susua, ka hapa anu tuwu tiaku po'ineeomo itebuta.

⁹ Tewala aroaku ineheno a beine, ka ongkue montowoki a mpewowano pe'asa miaku,

¹⁰ ka po'ineeomo kombiaku mogiliakono mia susua, ka po'ineeomo mia susua mewowaliakono.

¹¹ Hangano anu kanatuu onaemo poweweu mokoburu, tendeano wineweu mosa'o anu tekona domehukuo puu mpobitara.

¹² Menteeano, onaemo atuu api anu montunu ka ipingko, ka mokomo'aio luwuno hasiliku.

¹³ Tewala nahi kuweeako ira tiado ataku tama ke beine, tempono dompekara-kara saru ongkue,

¹⁴ hapa anu ta wineweuku, tewala mentade Ira Ue Ala; tewala moweweu Ira pomparesaa, hapake sangkiku ndi Ondae?

¹⁵ Komba Ondaeke, anu weweu aku a laro mpe'anakaa, weweuo mbo'u mia atuu? Komba asa koa mbo'uke anu weweu kami a laro mpe'anakaa?

¹⁶ Tewala horio nahi kutondao po'ehedo mia mongkokolaro, ka weweuo matano asa tuwu beine gagi mo'au-au,

¹⁷ ke kaangaku kukaano asa-asaku, sekono nana'ote nahina amano nahi petonda kumaano,

¹⁸ kahinaano mompu'u imongura kupokolangkaio kana aasa ama, ka mompu'u a mpe'anakaano ineno kutaateo,

¹⁹ tewala kukitao mia mate hangano nahina sangkano, ke mia mongkokolaro anu nahina hawu petutuwino,

²⁰ ka anu aroa nahi po'emaakune ronso, hangano koroino nahi pesangkaako wulu bimbaku;

²¹ tewala kutaangakono kaeku umewaio nana'ote nahina amano, hangano a mpewowa langkai kukitao hinao anu mokowali aku,

²² ka po'ineeomo wuku bose-boseku tepotola inso a oweaku, ka kaeku pinudu inso a lindu-linduno.

²³ Hangano Ondae Ue Ala wela mokodoito aku, ka nahina rosoku a maramba-Do.

²⁴ Tewala kunaao pompe'ala-alaku a wulaa, ka mepau a wulaa: Omuemo pine'ala-alaku;

²⁵ tewala kupo'undeakono langkaino pompoliku ka hangano kaeku mohawe arataa anu hadio ntu'u;

²⁶ tewala hori aku kumitao mata'oleo tempono ipewanta, ka tekosino pelempano wula,

²⁷ ranta mo'ia-ia tepopandei aroaku, ka mompohawe pewoo-woo ngkae ndi onae,

²⁸ ka mongkona atuu gagi mbo'u wineweu mosa'o anu tekona domehukuo puu mpobitara, hangano uhapu Iramo Ue Ala anu i wawono,

²⁹ Nde mo'unde akuke hangano urasa'ono anu umo'aliaakune, ka meboo mo'unde tewala i aluo masolaa?

³⁰ Oo, nahi aku mo'ineeo wiwiku moweweu hala, ka penaano tinuntuako mompau sumpa!

³¹ Tewala mia a ngkemaku nahi dohori mpotae: Isema anu nahi mowohiako pe'inahuno?

³² Maupo mia mehawe nahi dohori mpewongi i bungkuno, pewowaku ku'ungkahiako ira mia mpelakopi.

³³ Tewala kututuwio salaku kana mia susua onaemo wunio salaku i laro aroaku,

³⁴ hangano doitoku a mia hadio ka pontetewehido pe'etu mokontededengke aku, onaemo ka kupenoro-noro ka nahi kupeluarako inso a mpewowa!

³⁵ Ha, bakanaano ka ihina anu merorongeakune! Ndiomo tondoni ngkaeku! Po'ineeomo Anu Tedoa Pabawa sumangki aku! Bakanaano ka ihina wunta pontuluri anu binurino ewaiku!

³⁶ Mentee ntu'u, wunta atuu aku tumembio, ka aku pakeo kana ramba-ramba ulu.

³⁷ Sompo pelempaku aku pauako Ira, gagi mia pinemota'u aku me'aro ndi Ondae.

³⁸ Tewala lereku mebooli hangano ongkue ka pesalaano padekoku mpengese mperonga-ronga,

³⁹ tewala hasilino pingko kukaano ka nahi ku'owahio, ka mokomasusa ira ueno,

⁴⁰ ka po'ineeomo komba gandu anu tuwu, sine ewo rui, ka komba jelai, sine ewo lee.” Tompa i ndi'ai luwuno pauno i Ayubi.