Ayubi 30 - Wunta Mempori

Pontetewehi ka marasai anu pinembasaino i Ayubi 30:1-31

¹ ”Sine kanandio-andio dompengingisiakune, anu tinuwuno monguraopo sekono ongkue, anu amano nahi kutarimao tendeano ka ininaa saru dahu podagai bawaano bembe bimbaku.

² Ka mbo'u, hapa tuduno rosono kaedo ndi ongkue? Pingkoomo rosodo.

³ Memarasai ira hangano memakuraa ka mokoninggoa, kumarasio wita anu motu'i, a laro wongi-wongia i pada one anu londa.

⁴ Ondae mpo'opu mala-mala ntahi inso i olono laro ewo, ka hakano keu arari gagi kaangado.

⁵ Ondae mensinaari inso i tonga-tongado palili, ka mia mpebooliako ira kana mompebooliako puu mponako.

⁶ Ondae asalakono mpo'ia a lembo-lembono anu mongkokongiri, a laro aano wita ka olo-olono torukuno watu.

⁷ A ntonga ngkura domperaaliki, ondae mpebawaa a ntoto ewo rui.

⁸ Ondaemo atuu mia mpe'ulu watu anu nahi tino'ori, anu mensinaari inso a wita.

⁹ Sine, kanandio-andio ongkue gagi powadi pasinggiri ka popodeu-deuado.

¹⁰ Domemokoburuakune ka me'olaiakune, nahi dompokompeteao koroido ka dome'onuio rupaku.

¹¹ Hangano kolorono panaku pinotolaomo ka Dopokongkodei aku, ondae mbo'u mpoweweu po'ehedo i aroku.

¹² I koanaku mpe'umbaako gerombola, domengkaio karuku, ka dompese'elungio sala mateaku;

¹³ domebetao salaku ka me'ungkeakono tedontaaku, nahi dompongkere anu tumulungi ira.

¹⁴ Kana molalo rere watu anu tebansi malua domposapoi, hawe nahi domperonga i tonga-tongano tehoaa.

¹⁵ Mongkokongiria ku'inaluako, marambaku pinepaneeako kana pinuurino angi, ka tekaduduiaku tetadi kana seru.

¹⁶ Onaemo pu'uno sumangaku tampula a ngkoroiku; tempo marasaia mokodoito aku.

¹⁷ I tempono wongi luwuno wukuku kana kinarasi, ka pompemahaki anu meduhu nahi hori menaa-naa.

¹⁸ Saru roso anu mongkokongiri Dosintakio sangkaku ka Do'ini aku moroso a we'uno lemba meloeku.

¹⁹ Dopepasiakunemo a laro rege, ka kana akumo pampawu ka awu.

²⁰ Mebooli aku mepetulungi ndi Omiu sine nahina sangki-Miu; mentade aku mesikori sine nahi Iperio aku.

²¹ Omiu gagi lambaha ndi ongkue, Isapoiakune rosono kae-Miu.

²² Itande aku a wawo angi, tumadi aku ka mokotampula aku a laro angi mokora.

²³ Oo, kuto'orio: Iwawa aku a matea, te'aro a mpo'ianga anu tinantui luwuno anu tuwu.

²⁴ Menteeano, menteeke mia nahi ta motiio kaeno a anu tebangku, tewala onae mebooli mepetulungi a laro urasa'ono?

²⁵ Kombake pengeseku tiano mia anu membasaio oleo masukaraa? Kombake aroaku mompemasusa hangano mia mongkokolaro?

²⁶ Sine, tempono kupomperorohi anu moiko, mosa'oa anu hawe; tempono kuponsikori mewine, wongi-wongia anu hawe.

²⁷ Laro aroaku mondende ka nahi hori rodo, luwuno oleo marasaia konaomo a ngkoroiku.

²⁸ A laro pompemasusa, nahina mokulano mata'oleo, ongkue melakopi; mentade aku i tonga-tongano bawaa saru mebooli mepetulungi.

²⁹ Gagi akumo pepaekompodo serigala, ka walido manu-manu unta.

³⁰ Kuliku gagi mo'ito ka tekulisi, luwuno wukuku mokari hangano mokula.

³¹ Unino katapiku gagi ponsabangi, ka puurino siloliku kana suarano mia mengese.”