Ayubi 3 - Wunta Mempori

Pinemasusano i Ayubi 3:1-26

¹ Umarino atuu i Ayubi mepau ka itotonaao oleo hinaano.

² Motae i Ayubi,

³ ”Po'ineeomo ka nami teto'ori oleo hinaaku ka wongi anu pauo: Asa ana ntama hinaomo a laro mpe'anakaa.

⁴ Po'ineeomo oleo atuu gagi wongi-wongia, siimo Doperioo Ue Ala anu i wawono, ka siimo ipansario wantano mewine.

⁵ Po'ineeomo wongi-wongia ka wongi mpusu tumuntuo oleo atuu, seru mpe'api-api borungio, ka wongi ntonga'oleo mokontededengkeo.

⁶ Wongi atuu, po'ineeomo ipabawaio wongi-wongia; siimo imawongko a luwuno oleo i larono asa nta'u; siimo itewinso a doano luwuno wula.

⁷ Oo, po'ineeomo ia wongi atuu nahina anu me'ana, ka nahina teronge mawongkoa.

⁸ Po'ineeomo dometutundalio puu pontotonaa oleo, ondae anu mempande mpokotesingkao tekudano i Lewiata.

⁹ Po'ineeomo luwuno anano wula umpeda meene gagi wongi-wongi; po'ineeomo iponsikori mewine anu nahi hori hawe, siimo ipongkita tebosino towea,

¹⁰ hangano nahi tondoo pewowano pe'anakaano ineku, ka nahi winuni masusaa inso a mataku.

¹¹ Tembio nahi kumate tempono kupine'anaako, ke mate tempono kupeluarako inso a mpe'anakaa?

¹² Tembio ka itarima aku pe'awia, tembio ka ihina uo, ranta ka kupokompo'uo?

¹³ Tewala naahi, ongkue kanandio-andio mepombole ka rodo; ongkue tekoturi ka menaa-naa

¹⁴ saru luwuno mokole ka puu mpompatudu i tolino, anu wali montadeo howuno anu terawo tiano koroino;

¹⁵ ke saru anu langkai potorodo anu hinao wulaano, anu rahano ibuketiakono salaka.

¹⁶ Ke tembio ongkue nahi kana anadalo te'onini, anu winuni, kana nana'ote kodei anu nahi pongkita mewine?

¹⁷ I ra'aimo mia mosa'o gauno ipenaa-naa moweweu marisua, i ra'aimo dompenaa-naa mia anu pingko rosodo.

¹⁸ Luwuno anu mentinawa mperonga-ronga gagi rodo, nahi domporonge mbo'u pau pompokonsii.

¹⁹ Mia kodei ka mia langkai kongko i ra'ai, ka ata tolaomo inso a ueno.

²⁰ Tembio mewine ka domewineeako anu mpe'isei, ka tuwu a anu mahaki aroa,

²¹ anu monsikori matea anu nahi hori hawe, anu lumuluo laluaopo sekono arataa anu tetano;

²² anu mpo'unde a laro mpo'unde-undea, mawongko tewala mpohawe ira kaburu.

²³ Tembio tuwu ka iwineeako tama anu salano tewuni, anu Dokaduo Ue Ala?

²⁴ Hangano euno rotiku onaemo pinemasusa, ka masusaku te'uwu kana uwoi.

²⁵ Menteeano, anu kudoitoakono umalu aku, ka anu kusalalaroakono humawe aku.

²⁶ Nahi kupohawe rodoa; nahi kupokompo'ia-ia, sine salalaro anu saaba.”