Ayubi 29 - Wunta Mempori

Marambaa anu i ndi'ipua ka marasaia anu kanandio-andio 29:1-25

¹ I Ayubi motilaloakono pau potundaano,

² ”Ha, po'ineeomo ka kukana a wula anu lalo, kana a oleo tempono Dodagai aku Ue Ala,

³ tempono hulu-Do mewanta a wawo uluku, ka i totono mewine-Do kupelempa a laro wongi-wongi.

⁴ Kana tempono kupembasaio pompoliku, tempono Ondae Ue Ala meronga saru ongkue a laro ngkemaku;

⁵ Tempono da Dokongkomi aku Anu Tedoa Pabawa, ka luwuno anaku mekongko i horiku;

⁶ tempono luwuno pelempaku medoloako susu baku, ka torukuno watu mowaao korono lana umpeda ndi ongkue.

⁷ Tempono kupeluarako a mpewowa langkaino kota, ka mo'ala mpentoroaku a ntanalapa,

⁸ luwuno mia mongura kumita aku ka do'amba mposuka ka luwuno mia anu tende ntinuwu iramo ronga mpentade;

⁹ anu langkai potorodo mpenaa-naa mpepau, metompoakono kae ngangado;

¹⁰ suarado mia pinemota'u tetadi, ka elodo metako a langirado.

¹¹ Tewala biri moronge mongkona ongkue, ipauo ongkue me'ura; ka tewala mata mongkita, onae gagi sakosiiku.

¹² Hangano ongkue mongkadudui mia marasai anu mebooli mepetulungi, ka nana'ote nahina amano anu nahina tumulungio.

¹³ Ongkue mohawe pau poronso inso a mia anu ilawu mate, ka aroano asa tuwu beine kupokowawongkoo.

¹⁴ Ongkue mesangkaako menteea ka moleoa kupokonao kana lemba meloe ka peboo ulu.

¹⁵ Ongkue gagi matano mia morawu, ka karuno mia pungku.

¹⁶ Ongkue gagi amano mia mongkokolaro, ka kara-karado mia anu nahi kuto'orio, kupepenteeo.

¹⁷ Aseno mia molengku kupuroo, ka rumontuo rinakono inso a ngisino.

¹⁸ Kupewowoloo: Aku mate a nsenoku, ka mokohadio oleo tumuwuku kana one.

¹⁹ Hakaku mohawe uwoi, ka tontoru mewongi i wawono luwuo sampaku.

²⁰ Marambaku wo'ohu mpiha ndi ongkue, ka panaku wali moroso a ngkaeku.

²¹ Mia mpesisikori ira mperorongeakune, ondae mperodo-rodo mperorongeakono patuduku.

²² Umariku mepau nahina mbo'u maupo te'asa mia mepau, ka pauku te'iti ndi ondae.

²³ Mia mensikori aku kana monsikori usa, ka mentineo ngangado kana montine usa a poko'ariano tempo.

²⁴ Kukomoo-mooako ira tempono nahina pompe'osaiado, ka wantano rupaku nahi dompokowurao.

²⁵ Ongkue tumantuio salado ka mentoro gagi petewawa; ongkue mentoro a ngkadera poparentaa kana mokole i tonga-tongano puu mpetea, kana asa mia tumarero ira anu mpo'inombo.”