Ayubi 28 - Wunta Mempori

Mia nahi domehaweo ponto'ori

¹ ”Mentee ntu'u, hinao po'iangado mia mpo'ala salaka ka po'iangado mia mompuehi wulaa;

² labu kineke inso a laro wita, ka mala pinokolono inso a watu.

³ Mia umariakono wongi-wongia, ka watu iparesao hawe a ondaloano ntu'u, a laro wongi mpusu.

⁴ Mia mpokeke po'alaa hasilino wita olai inso a mpo'ianga, ondae domengkolupe ira mia anu mpelempa i wawono, ondae ntendoe-ndoe ka tesoe-soe olai inso a mia.

⁵ Wita anu mehasiliako kaanga, rinongka-rongka i totono kana kinaano api.

⁶ Watuno onaemo pohawea lasuradi anu i larono hinao wulaa urai.

⁷ Sala lumako iraane nahina tumo'orio maupo te'asa manu-manu mpongkaa bau, ka nahi kitao matano singko.

⁸ Kondehora lambaha nahi pelandaakono karuno i ra'ai ka nahi telaloio singa.

⁹ Mia umanggaakono kae watu anu motea, irongka-rongka ira torukuno hawe a luwuno hakano.

¹⁰ A laro ntorukuno watu ikekeo bolo, ka matano kumitao luwuno anu masuli olino.

¹¹ Uwoi a ngkorono anu meluarako ibuntoo, ka hapa anu tewuni iwawao a mewineano.

¹² Sine isua pohawea ponto'ori, isua po'iangano pinewowolo molino?

¹³ Sala lumako iraane nahi domento'orio mia, ka nahi hinawe a witado mia mentuwu.

¹⁴ Ipotae tahi malua: Onae komba i laroku, ka tahi motae: Onae nahi kongko ndi ongkue.

¹⁵ Gagi euno nahi petoto butu wineeako wulaa mpena, ka olino nahi pinokotimbaako salaka.

¹⁶ Onae nahi pinokorekeako wulaa Opiri, ke maupo saru paramata kerisopara anu masuli olino ke saru paramata lasuaradi;

¹⁷ olino masuliopo sekono wulaa ka tami, ke maupo tinobosiako peramba-ramba inso a wulaa motu'a.

¹⁸ Moiko kerabu maupo kerisita, nahi tewinso mbo'u a mporekea; mompekaria ponto'ori moikoopo sekonopo mutiara.

¹⁹ Paramata kerisoli Etiopia nahi polio mengkenaakono, onae nahi pinokorekeako wulaa ntu'u.

²⁰ Ponto'ori atuu, isuake insoano, ka pinewowolo molino, isuake po'iangano?

²¹ Onae tetutuwi inso a matado luwuno anu tuwu, tamoako tewuni a manu-manu i laro meene.

²² Tampulaa ka matea motae: Butu lele nahi manasa anu hawe a birimami.

²³ Ondae Ue Ala tumo'orio sala lumako i ra'ai, Ondae koa mbo'u tumo'orio po'iangano.

²⁴ Hangano Ondae mengkita hawe a luwuno tompano tolino, ka kumitao luwuakoano anu hina i totono langi.

²⁵ Tempono Dopakosio mokorano angi, ka umatorao hadiono uwoi,

²⁶ tempono Doweweuo pakosino mongkona usa, ka pesalaano koliki ka rundu,

²⁷ i tempomo atuu Dokitao ponto'ori ka paleleo. Ondae mbo'u pakosio, maupo paresao.

²⁸ Sine a mia mepau Ira: Menteeano, doitoako Ira i Ue, onaemo ponto'ori, ka olaiakono wineweu mosa'o onaemo pinewowolo molino.”