Ayubi 27 - Wunta Mempori

Nahina pomperorohino mia mosa'o gauno

¹ I Ayubi motilaloakono mbo'u luwuno pau potundaano,

² ”A nee-Do Ue Ala anu tuwu, anu nahi pompowee moleoa ka nee-Do Anu Tedoa Pabawa anu mokomasusao aroaku,

³ ba da kongko penaaku ndi ongkue, ba da kongko penaa-Do Ue Ala a laro engeku,

⁴ wiwiku nahi ta mompau pegaupi, ka eloku nahi ta moluarako pegaupi.

⁵ Naahi ntu'u aku mokomentee komiu! Maupo ranta mate aku kongko komorahakono nine nahina salaku.

⁶ Menteeku ku'inio moroso ka nahi kupotolao; aroaku nahi tetewehi aku maupo te'asa oleo inso a ntinuwuku.

⁷ Po'ineeomo iwaliku gagi kana mia mosa'o gauno, ka mia anu umewai aku kana mia anu molengku.

⁸ Hangano, hapake pomperorohiano mia umewa, tewala Dopokotampulao Ue Ala, tewala Do'alao penaano?

⁹ Nde Ondae Ue Ala Ira rumongeoke peboolino tewala ma'isoa umaluo?

¹⁰ Polioke onae mesana-sanaa hangano Anu Tedoa Pabawa ka mebooli ndi Ondae Ue Ala sompo tempo?

¹¹ Aku paguruakomiu mongkona kae-Do Ue Ala, tinoo-Do Anu Tedoa Pabawa nahi aku wunio.

¹² Menteeano, luwumiu imengkitaomo liomiu; tembio ka impepau anu nahina pengkonaano?

¹³ Ndiomo tiano mia mosa'o gaudo anu Dopakosio Ue Ala ka tia pusakano mia lambaha anu tinarimado inso ndi Ondae Anu Tedoa Pabawa:

¹⁴ tewala anano tetiangi hadio ira megagi kaangano ponai, ka inuleno nahi ta sompo kaangado;

¹⁵ isema anu tola inso ndi onae, ta kinaburu hangano haki lele, ka nahi dompengesei ira tuwu beinedo.

¹⁶ Tewala onae mopumpu doi kana pampawu hadiono, ka mohowu sangka kana wita pulu,

¹⁷ maupo onae anu humowuo, sine mia mentee anu ta pakeo, ka doi atuu ira mpetia-tiao mia anu nahina salano.

¹⁸ Raha anu winanguno kana inenano kaangga, kana laika anu wineweuno puu mpodagai.

¹⁹ Kana mia mompoli ipomboleo koroino, sine nahi ta wali weweuo: mansano wileo matano, luwuno nami hina mbo'u.

²⁰ Mongkokongiria lumuluo kana lolowi, tempono wongi ipeneeakono angi mokora.

²¹ Angi i sabaano oleo tumandeo ka onae moliuomo, onae pinetadiako inso a mpo'iangano.

²² Onae pinepasiako nahina pompehohawa, onae asalakono mompari-pari mepotola inso a ngkae-Do.

²³ Mia montopa hangano onae, ka mpomansu-mansu hangano onae inso a mpo'iangano.”