Ayubi 26 - Wunta Mempori

Sangkino i Ayubi ndi Bilidadi 26:1-4

¹ Ka i'amba sumangki i Ayubi,

² ”Tedoa moiko petulungimu a mia anu nahina rosono, ka pontulungimu a ntokia anu nahi moroso!

³ Tedoa moiko patudumu a mia anu nahina ponto'orino, ka ponto'ori anu upaguruako ira a hadio mia!

⁴ A mpetenano isemake upauo pau atuu, ka pohaweno isemake anu pinokomengkaamu?

Isema mokonto'orio langkaino pabawa-Do Ue Ala 26:5-14

⁵ Onitudo mia mate mpondidi-ndidi i totono, kanatuu koa mbo'u uwoi ka ihino.

⁶ Po'iangado mia mate te'ungkahi i aro-Do Ue Ala, po'ianga matea mbo'u nahina ulono.

⁷ Ondae Ue Ala wileo langi utara i wawono anu mooa, ka ndumoeo tolino nahina ihino.

⁸ Uwoi Dotongoo a laro nseru-Do, sine seru atuu nahi teberi itotono mobeano.

⁹ Pansarino wulantii Dotutuwio, tumutuwiakono seru-Do.

¹⁰ A wawo uwoi Dopegaresi gagi tida olono mewine ka wongi-wongi;

¹¹ karuno langi mpelelu, ntekokodohoako tekuda-Do.

¹² Hangano pabawa-Do i Ue tahi temonto ka hangano pande-Do i Rahabi pinirego.

¹³ Penaa-Do mokogagio langi mewanta, kae-Do lumompahio ule anu malempi.

¹⁴ Menteeano, luwuno atuu butu tompano sala-Do; me'ara-arai ntu'u metanga anu rinongeto inso ndi Ondae! Isema mokonto'orio runduno pabawa-Do?”