Ayubi 24 - Wunta Mempori

Wineweu-Do Ue Ala a mosa'oa 24:1-25

¹ ”Tembio Ondae Anu Tedoa Pabawa nahi Dopatindao tempo pohukua ka ondae anu tumo'ori Ira nahi domengkitao oleo pobitaraa-Do?

² Hinao mia mompahe tida wita, anu morontu bawaano pinotuwu, ka i'amba pakambio.

³ Kalideno elu-elu ipolaisakono, ka sapi waino pine'ueno asa tuwu beine itarimao gagi pe'inia,

⁴ mia mongkokolaro iliahakono inso a nsala, mia marasai i laro inia luwuno mansa mpewuni.

⁵ Menteeano, kana kalide mo'ila i pada one dompeluarako ira mpo'angga mpo'ungke mpongkaa; pada malua mompatindaako ira kaangado ka luwuno anado.

⁶ Ondae mpo'ala kaangano pinotuwu a lere, ka mpopumpu wua anu tebinta inso a lere anggorodo mia mosa'o gaudo.

⁷ Ondae mpewongi mengkolambe-lambe hangano nahina sangkado, ka nahina hawu petutuwido i tempono morini.

⁸ Hangano usa marombo i mentorukuno ondae memobaho-baho, ka hangano nahina pe'engoa, ondae mpehidi-hidi a ntorukuno watu.

⁹ Nana'ote nahina amano inala inso a uono ineno ka nana'otedo mia mongkokolaro tinarima gagi pe'inia.

¹⁰ Mengkolambe-lambe dompelakopi hangano nahina sangkado, ka a laro mokoninggo dompontembi te'uno gandu.

¹¹ Ondae mpoweweu lana i olono orua ntia lere, ondae melolandao ponsesaa a laro mokoranga.

¹² Inso a laro ngkota teronge pompemahakido mia anu tamo ronga mate ka peraalikido mia anu pompemahaki mobela, sine Ondae Ue Ala nahi Doperioo pekakaido.

¹³ Hinao mbo'u mia anu umewaio mewine, anu nahi to'orio pesalaano ka nahi po'ia mpiha a ntelaloano.

¹⁴ Umpeda meene puu mpompepate mewangu, mepateo mia marasai ka mongkokolaro, ka i tempono wongi onae moweweu kana puu mponako.

¹⁵ Matano mia monsosabo monsikori tekamburi, pinewowolono: Si hina maupo te'asa mia kumita aku; ka i'amba mokonao borungino rupa.

¹⁶ A laro wongi-wongi ondae mporongka raha, tempono meene ondae mpewuni; nahi doponto'ori mewine,

¹⁷ hangano wongi-wongia atuu ondae mpemo'oruo, ka domeleleoakonomo mongkokongirino wongi-wongia.

¹⁸ Ondae memolomo a wawo uwoi, tiado tetotonaa i tolino; ondae nahi domelako mbo'u a lere anggoro.

¹⁹ Motu'i-tu'i ka mokula mokopingkoo uwoino seru baku, kanatuu koa mbo'u po'iangado mia mate ndi ondae anu mpoweweu hala.

²⁰ Pe'anakaa kumolupeo, wingo mpemo'ahio, onae nahi rinambe mbo'u; molengkua pinudu kana pu'uno keu.

²¹ Onae mompokonsii beine bita, anu nahi pe'ana, ka nahi poweweu moiko a asa tuwu beine.

²² Sine Ondae Ue Ala saru roso-Do wawa ira mia memosia; maupo moleo tuwuno nahi manasa.

²³ Ondae Ue Ala moweeakono rodoa anu gagi pomperorohiano, ka dumagaio luwuno pesalaano.

²⁴ Butu sarai dompompelangka-langkai ka i'amba nami hina mbo'u; ondae meronta ka do'amba ntengkuru kana luwuakoano, ondae mentinotopi kana pu'uno tonggino gandu.

²⁵ Tewala nahi kanatuu, isema mosia umewai aku ka humapuo pinauku?”