Ayubi 23 - Wunta Mempori

Pepokomenteeno i Ayubi i aro-Do Ue Ala 23:1-17

¹ Sine sumangki i Ayubi,

² ”Kanandio-andio pompemasusaku gagi pe'ewa, kae-Do mobea dumanso aku ranta ka kupepetulungi.

³ Ha, ande-andeno kuto'orio isua kuhawe Ira, ka moiko ku'aiwa a mpo'ianga-Do.

⁴ Aku pauo luwu teweweuku i aro-Do, ka ngangaku aku buketiakono pau pepokomentee.

⁵ Aku tumo'orio luwuno sangki-Do ndi ongkue ka aku mokonto'orio hapa anu pinau-Do ndi ongkue.

⁶ Nde Ira mekara-karaakune a laro tedoa pabawa-Do? Naahi, menteeano Ira mekakaakune.

⁷ I ra'ai mia moleo ira mpokomenteeo koroido i aro-Do, ka aku tola inso a mpuu mpobitaraku ranta nahina tampulaano.

⁸ Menteeano, ba kupelempa lumako i sabaano oleo, komba i ra'ai Ira; ke i sumooano oleo, nahi kuhawe Ira;

⁹ i utara ku'ungke Ira, nahi Dotengkita, mepokule aku i selata, nahi kukita Ira.

¹⁰ Hangano Doto'orio sala ntumuwuku; ande-andeno Do'arahako aku, aku meluarako kana wulaa.

¹¹ Karuku tumondao mpiha hanga ngkaru-Do, aku tumondao pesalaa-Do ka nahi kupansia.

¹² Parenta inso a wiwi-Do nahi kulimpaio, i laro aroaku kunaao pinau-Do.

¹³ Sine nahi Dohori bali, isema moko'onsoi Ira? Hapa anu inehe-Do Doweweuo.

¹⁴ Menteeano, Ira moko'umario hapa anu Dopakosio ndi ongkue, ka hadio mbo'u mongkona anu kanatuu kongko ndi Ondae.

¹⁵ Onaemo pu'uno ka kupondidi-ndidi umaropi Ira, tewala kupewowoloo luwuno atuu, kudoitoako Ira.

¹⁶ Doweweuomo Ue Ala aroaku doito, Doweweu akumo Anu Tedoa Pabawa mondidi-ndidi.

¹⁷ Menteeano, kumate komba hangano wongi-wongia, komba mbo'u hangano rupaku itutuwio wongi mpusu.”