Ayubi 22 - Wunta Mempori

Po'emano i Elipasi ka itepidi i Ayubi 22:1-30

¹ Ka i'amba i Elipasi, to Temani, sumangki,

² ”Nde mentuduke mia ndi Ondae Ue Ala? Naahi, mia anu molino pinewowolono butu mentudu a ngkoroino onaeno.

³ Nde hinaoke tuduno ndi Ondae Anu Tedoa Pabawa, tewala omue mentee, ke urano, tewala omue tuwu moleo?

⁴ Nde hangano doitomuke ndi Ondae Ue Ala, onaemo ka Dohukuko, ka wawako a mpebitaraa?

⁵ Kombake langkai wineweumu anu mosa'o ka sala mpelelumu nahina pokotompaano?

⁶ Hangano, po'ehemumo koa montarima pogade inso a mpepaekompomu, ka morontu sangkado mia mongkokolaro;

⁷ mia anu mokoranga nahi upopo'inuakono uwoi, ka mia anu mokoninggo nahi upakao.

⁸ Tendeano mia anu moroso anu mpope'ue wita, ka mia anu inondaha anu mpetorokio.

⁹ Mia tuwu beine utena ira melako mooa ngkae, ka tokiano elu-elu upiregoo.

¹⁰ Onaemo pu'uno ka ilimbuko pompete'umala, ka mongkokongiria mepobingko modengkeko.

¹¹ Wongi-wongia weweuko nahi upokompongkita ka mowo sumampuko.

¹² Kombake Ondae Ue Ala i langi anu mantande? Kita iramo anano wula anu lalu mantande, mantande ntu'u!

¹³ Sine upewowoloo: Hapa tino'ori-Do Ue Ala? Ira polioke mompau kara-kara inso i asambalino seru anu wongi-wongi?

¹⁴ Seru mokapa tumutuwi Ira, ranta nahi Dopokompongkita; Ondae melempa-lempa tumondao longkuno langi!

¹⁵ Nde inehemuke kongko tumondao sala nse'elu, anu tinondado mia mosa'u gaudo?

¹⁶ Ondae atuu mia anu mempinongko'ala iramo napi tempono, anu empehino ipolomoo korono.

¹⁷ Ondae atuu mpepau ndi Ondae Ue Ala, ”Olaimo inso ndi omami!” ka ”Anu Tedoa Pabawa mokompoweweu hapa ndi omami?”

¹⁸ Kahinaano Ondaemo anu mokobukeakono rahado luwuno anu moiko, sine tinoodo mia mosa'o gaudo olai inso ndi ongkue.

¹⁹ Mia mentee kumitao mongkona atuu ka mo'unde; mia anu nahina salano pasinggiri ira:

²⁰ Mentee ntu'u, anu umewai kami pinokotampulaomo, ka binintado pingkoomo ikaano api.

²¹ Pesintuwuako Iramo ka urodo; ba kanatuu komohawe me'uraa.

²² Tarimaomo hapa anu ipaguruakomu nganga-Do, ka naaomo pau-Do i laro aroamu.

²³ Tewala tepidiko ndi Ondae Anu Tedoa Pabawa ka me'urumako; tewala upoko'olaio molengkua inso a ngkemamu,

²⁴ tumadio labano wulaa a laro pampawu, wulaa Opiri a olo watu ngkorono,

²⁵ ka i'amba Ondae Anu Tedoa Pabawa gagi wulaamu, ka howuno salakamu,

²⁶ ka menteeano komesana-sanaa hangano Ondae Anu Tedoa Pabawa, ka komentombu ndi Ondae Ue Ala.

²⁷ Tewala mekakaiko ndi Ondae, Ira Uminduo pekakaimu, ka omue ko'umowahio pontangamu.

²⁸ Tewala upakosiomo hinao ta wineweumu, asalakono mehasili, ka mewine wantahio luwuno pesalaamu.

²⁹ Hangano Ondae Ue Ala mokongkodeio mia anu mompelangka-langkai, sine kumaduduio mia anu mauru!

³⁰ Mia anu nahina salano Dopotolao: omue kotola hangano nahi mokoburu kaemu.”