Ayubi 21 - Wunta Mempori

Pohaweno i Ayubi mongkona urano mia mosa'o gauno 21:1-34

¹ Sine sumangki i Ayubi,

² ”Perorongeakono temoiko pauku ka po'ineeomo atuu gagi tareromu.

³ Imensabaramo saru ongkue, aku mepau; umariku mepau moikoomo impopasinggiri.

⁴ Nde a miake te'aroano pompemasusaku? Tembio ka nahi moiko kutekuda?

⁵ Impepokulemo ndi ongkue, asalakono komiu mengkohali-hali, ka ngangamiu imetompoakonomo kae!

⁶ Tewala kupewowoloo, gagi aku doito, ka mondidi-ndidiomo koroiku.

⁷ Tembio mia mosa'o gauno ka ikongko tuwu, gagi mota'u, tendeano tepahe moroso?

⁸ Inuledo kongko saru ondae, ka ana'ue dompekakaako ira.

⁹ Luwuno rahado nahina mososanggoli, ka nahina doitoa, pontunduhi-Do Ue Ala nahi alu ira.

¹⁰ Sapido anu lakino mpomalii moiko, sapido anu waino mpe'ana ka nahi tewunsuli.

¹¹ Anado mempino'inee mpeluarako kana bawaano bembe bimba, anado mpelonso-lonso.

¹² Ondae mpenani-nani tinondaako rebana ka katapi, ka memawongko montonda unino siloli.

¹³ Domepingkoo tempodo a laro manangaia, ka rodo aroado mpetii a mpo'iangado mia mate.

¹⁴ Sine dompotae ndi Ondae Ue Ala: Olaimo inso ndi omami! Nahi kimebehe mento'ori ira pesalaa-Miu.

¹⁵ Isemake Anu Tedoa Pabawa atuu ranta omami asalakono mpesomba ndi Ondae, ka hapa tuduno ndi omami, tewala kami mpo'ema ndi Ondae?

¹⁶ Mentee ntu'u, manangaido komba a ngkaedo ondaedo! Tinoodo mia mosa'o gaudo olai inso ndi ongkue.

¹⁷ Mararu ntu'u ipinepate huludo mia mosa'o gaudo, urasa'o umalu ira, ka pompemahaki Dotiaako ira Ue Ala a laro ntekuda-Do!

¹⁸ Ondae megagi kana seami i arono angi, kana ota anu ipaneeo angi mokora.

¹⁹ Dompotae mia, ’Salano Donaao Ue Ala tiado anano.’ Sine po'ineeomo onaeno mia atuu anu Dohukuo Ue Ala, ka itelike.

²⁰ Po'ineeomo matano onaeno kumitao mateano, ka onaeno uminuo tekuda-Do Anu Tedoa Pabawa!

²¹ Hangano pombiono merioo somborino umarino mate, tewala pingkoomo tempono?

²² Polioke mia paguruako Ira Ue Ala ponto'ori, ndi Ondae anu bitara ira a po'ianga-Do mantande?

²³ Anu asa mia mate da bukeako roso, saru rodo ka nahina masusaa;

²⁴ tongano bukeako taba, ka unto wukuno napi moboo.

²⁵ Anu susua mateako mahaki aroa, nahi hori mompembasai anu moiko.

²⁶ Sine ondae meronga-ronga tepombole a laro pampawu, ka wingo mpehowu i wawodo.

²⁷ Menteeano, kuto'orio pinewowolomiu, ka akala anu tinoomiu ndi ongkue.

²⁸ Impotae: Isua rahano anu pabawa? Isua kema po'iangado mia mosa'o gaudo?

²⁹ Napi horike mpesikeno a mia anu mentelalo a nsala? Komiu mpokohapuoke luwuno pontisodo,

³⁰ nine mia lambaha tepekaria a oleo matea, ka kinadudui a oleo tekuda-Do Ue Ala?

³¹ Isema anu ta tetutu tumuntuo peleluno, ka humukuo wineweuno?

³² Onae winawa a ngkaburu, ka kaburuno domedagaio mia.

³³ Batu-batuno wita i lembono mokorodoo; sompo mia tumondao, ka anu mese'elungio nahi pinokopau hadiono.

³⁴ Nahina ntu'u pengkonaano pontareromu ndi ongkue! Luwuno sangkimu pe'akala mpena!”