Ayubi 20 - Wunta Mempori

Pohaweno i Sopari mongkona urano mia mosa'o gauno 20:1-29

¹ I Sopari, to Na'ama, sumangki,

² ”Onaemo pu'uno luwuno pinewowoloku mokomosia aku sumangki, hangano aroaku nahi sabara mbo'u.

³ Kurongeo pekuahako anu tumetewehi aku, sine penaa anu mompowee ponto'ori moweeakune sangkino.

⁴ Napi uto'orioke mongkona andio mompu'u i ndi'ipua, mompu'u ininaa mia i tolino,

⁵ nine maroano mpeboolido mia mosa'o gaudo butu sarai, ka mawongkodo mia bunto butu asa mpiniro?

⁶ Maupo pompelangka-langkaino mewuatako i langi ka uluno modanggi seru,

⁷ sine kana ta'ino ta mate ranta nahina tampulaano; isema anu hori kumitao, mesikeno: Isua onae?

⁸ Kana mo'ipi ipenee tetadi, nahina hangano, moliu kana pongkita tempono wongi,

⁹ Onae nahi tengkita mbo'u a matado anu mengkitao, ka po'iangano nahi kitao mbo'u.

¹⁰ Luwuno anano asalakono mpo'ungke pompehohawado mia mongkokolaro, ka asalakono kaeno onaeno mokuleo pompolino.

¹¹ Luwuno wukuno moiko ibuke rosono mia mongura, sine roso mbo'u atuu ta mepombole saru onae a laro pampawu.

¹² Maupo ipenamio wineweu mosa'o mo'ahi a laro ngangano, maupo iwunio a ntoto elono,

¹³ memo'ahio saru nahi potolao, ka inaao a langirano,

¹⁴ sine kaanga a laro kompono ta bali, gagi ipono ule mo'ito i larono.

¹⁵ Arataa iteleo, sine iluao mbo'u; Ondae Ue Ala lumuarakono inso a laro kompono.

¹⁶ Ipono ule mo'ito ta umosoo, elono ule ta mepateo.

¹⁷ Onae nahi moiko ikita ira pesalaano uwoi ka luwuno korono anu mompowaa siu hoani ka susu baku.

¹⁸ Onae asalakono mokuleo hapa anu hinaweno maupo nahi penamio; onae nahi perapio pompolino hasili pebalu-baluno.

¹⁹ Hangano ipokonsii iramo mia mongkokolaro, ka binta ira nahina po'iangado; irontuo raha anu komba winanguno.

²⁰ Menteeano, onae nahi ponto'ori rodoa i laro aroano, ka onae nahi ta tekaduduiako arataano.

²¹ Nahina anu tola inso a ngkinaano, onaemo pu'uno urano nahi ta mo'ia mpiha.

²² A laro mare'eno anu tedoa hadio i'aluo marasai; onae i'aluo masusaa anu mongkokongiri ntu'u.

²³ Ta umihiio kompono, Ondae Ue Ala mompotola tekuda-Do ndi onae anu tensila, ka weweuo atuu kana usa ndi onae gagi kaangano.

²⁴ Onae ta mokotola inso a mparewa mpetea labu, sine pana mala lumompahio.

²⁵ Ana mpana atuu tebuta ka meluarako inso a bungkuno, mata mpana anu mangkilo atuu meluarako inso a upeuno: onae gagi mongkokongiri.

²⁶ Wongi-wongia butu tepatinda tiano, onae ikaano api anu nahi pinuuri ka pingkoo hapa anu tebinta a laro kemano.

²⁷ Langi mosabao salano, ka tolino mentade umewaio.

²⁸ Hasilino inanggano anu kongko a rahano winawa, luwuno pingko a oleo tekuda-Do.

²⁹ Onaemo pohuku-Do Ue Ala a mia anu mosa'o gauno, tia pusaka anu dinandi-Do Ue Ala ndi onae.”