Ayubi 19 - Wunta Mempori

Pompe'ala-alano i Ayubi mongkona pe'alaako-Do Ue Ala ndi onae 19:1-29

¹ Ka i'amba sumangki i Ayubi,

² ”Hawe te'ipia mbo'u impokomahakiakune aroaku, ka bobarasaiakune pau?

³ Kanandio-andio pempulumo imentata aku, nahi mokoko'iimiu bobarasai aku.

⁴ Tewala mentee ntu'u tesaa aku, ongkueku anu tumembio tesaaku atuu.

⁵ Tewala mentee ntu'u moiko komiupo sekono ongkue, ka pakeo tataaku gagi tondonino a ngkoroiku,

⁶ to'oriomo nine Ondae Ue Ala moweweu Iramo nahi moleo ndi ongkue, ka metendeakono buani-Do ndi ongkue.

⁷ Menteeano, mebooli aku: Lambaha! Sine nahina anu sumangki. Mebooli aku mepetulungi, sine nahina moleoa.

⁸ Pesalaaku Do'onsoiakono rere watu, ranta nahi kupokontelaloio, ka luwuno pesalaaku atuu Doweweuo wongi-wongi.

⁹ Marambaku Dolohuomo ka rumontuo ramba-ramba a uluku.

¹⁰ Dorongka aku tiku-tiku, ranta ka kulako, ka pomperorohiku Dobutao kana keu.

¹¹ Tekuda-Do tensila ndi ongkue, ka Doreke aku kana ewai-Do.

¹² Puu mpetea-Do mperonga domelako, sala dome'onsoio umewai aku, ka do'amba mengkaduo kemaku.

¹³ Pepaekompoku Dopoko'olai ira inso ndi ongkue, luwuno tepoto'oriku nami domento'ori aku.

¹⁴ Pe'etuku mpeliahako, ka luwuno wali-waliku mengkolupe aku.

¹⁵ Ondae anu mpo'ia i rahaku ka ataku beine mereke aku mia anu nahi domento'orio, domengkita aku kana mia susua.

¹⁶ Tewala kupoboio ataku, onae nahi sangki; asalakono kupopandeio mepauakono.

¹⁷ Penaaku imokoburuakono kombiaku, ka ongkue mokokowueredo pepaekompoku.

¹⁸ Maupo nana'ote mbo'u mentetewehi aku, tewala mentade aku, domempasinggiri aku.

¹⁹ Luwuno pewali-wali morosoku mokokowueredo ndi ongkue; ka ondae anu pinehohawaku mpewolili umewai aku.

²⁰ Wukuku metako a ngkuli ka ihiku, ka langirakumo koa anu tebinta ndi ongkue.

²¹ Impehohawa akumo, impehohawa akumo, hei luwuno sambe'eku, hangano i'alu akumo kae-Do Ue Ala.

²² Tembio ka imelampui aku kana-kana Ondae Ue Ala, ka nahi memowohiakono ihiku?

²³ Ha, po'ineeomo ka ibinuri pauku, binuri a wunta,

²⁴ tepa'oako labu ponggori ka tima a ntorukuno watu ranta nahina tampulaano!

²⁵ Sine kuto'orio Puu Pontolosiku Tuwu Ira, ka poko'ariano Ira mewangu inso a wawo pampawu.

²⁶ Ka umarino masola kuliku, maupo nahina ihiku aku kumita Ira Ue Ala.

²⁷ Ongkueku kumita Ira me'alaako ndi ongkue; mataku isa'a sumakosii Ira ka komba mia susua. Aroaku masusa hangano tekewoi.

²⁸ Tewala mpotae komiu: Kami metuntuo ka mehaweo ndi onae hangano kara-karano,

²⁹ ka imedoitoakono ponai, hangano tekuda mohaweako pohuku ponai, ka imento'orio nine hinao puu mpobitara.”