Ayubi 18 - Wunta Mempori

Pohaweno i Bilidadi mongkona mia mosa'o gauno

¹ Ka i'amba i Bilidadi, to Suahi, sumangki,

² ”Te'ipiake umari upepau? Telikemo, ka ki'amba mpepau.

³ Tembio ka kimempinotaeako kondehora? Tembio ka kimebenge-benge a pongkitamu?

⁴ Omuemu anu beri-berio koroimu a laro ntekuda, nde butu hangano omueke ka imansa pino'inee tolino, ka torukuno watu mepahe inso a mpo'iangano?

⁵ Maupo kana'umpe mewineno mia mosa'o gauno ta mate mewineno, ka langano apino nahi mewanta mpiha.

⁶ Mewine a laro ngkemano gagi wongi-wongi, ka hulu i wawono mate.

⁷ Pelempano anu mokora te'onsoi, ka tinoono onaeno dumontaio.

⁸ Hangano karuno onaeno tekaiakono a buani, ka onae melempa a wawo ulono pompete'umala.

⁹ Tundono ipokorakoo pompete'umala, ka onae te'ontoako oho.

¹⁰ Koloro nahi kitao a laro wita, pompete'umala tina'oako a nsala anu telaoano.

¹¹ Mongkokongirino matea mokodoitoo isua-suamo koa, ka lumuluo isuamo koa i pelempa.

¹² Masolaa mangidaakono, matea mepatinda i horino.

¹³ Kuli ngkoroino ikaano haki, maupo asa ngkoroino ikaano haki mobea.

¹⁴ Onae rinende inso a ngkemano, po'iangano ka irodo, ka winawa a mokole matea.

¹⁵ A laro ngkemano mo'ia hapa anu komba pine'ueno mbo'u, i wawono po'iangano rinawoako walira.

¹⁶ I totono mokariomo luwuno hakano, ka i wawono moleuomo sampano.

¹⁷ Rorambeano tampula inso i tolino, neeno nahi pinau mbo'u a luwuno sala kodei.

¹⁸ Onae sinaari inso a mewineano a laro wongi-wongia, ka onae pinokotampula inso i wawontolino.

¹⁹ Onae nahi ta hina ana ke ana'ue ka ana'ue ntukono i olono tongkuno, ka nahina maupo te'asa mia anu kongko tuwu a mpo'iangano.

²⁰ A oleo mateado mia i Sumooano oleo ira mengkohali-hali, ka mia i Sabaano oleo ta umalu ira doitoa.

²¹ Mentee ntu'u, kanatuumo po'iangano mia anu molengku, kanatuumo po'iangano mia anu nahi to'ori Ira Ue Ala.”