Ayubi 17 - Wunta Mempori

¹ Rosoku tepudu, tinuwuku pingko, ka pekaburuaku tetinda.

² Menteeano, ongkue gagi pasinggiria; mataku merokuhi sumakosiio pe'ewado.

³ Po'ineeomo Omiu gagi pe'iniaku ndi Omiu! Isema mbo'u anu polio moweweuakune tepo'asaa mpau?

⁴ Hangano Ipokomoteao aroado onaemo kanahi dompokonto'orio; onaemo pu'uno nahi Komiu mo'inee ira mponangi.

⁵ Isema anu kumalakio sambe'eno ta mo'ungke ponangia, matado anano ta gagi morawu.

⁶ Gagi akumo pasinggiria i olodo tongku, ka ongkue gagi mia anu inonui rupano.

⁷ Mataku gagi mowewu hangano mahaki aroa, asa ngkoroiku kana eo-eo.

⁸ Mia memoleo mengkohali-hali hangano mongkona atuu, ka mia anu nahina salano tesingka tekuda a mia mosa'o gauno.

⁹ Maupo kanatuu mia mentee kongko a nsalano, ka mia anu nahi poweweu mosa'o tekense moroso.

¹⁰ Sine luwumiu, wali ime'aropi aku! Te'asa mia anu monto'ori nahi kupohawe i olomiu!

¹¹ Tinuwuku laloomo, nahina anu gagi luwuno tinooku, po'eheno aroaku.

¹² Wongi ira mpokogagio meene; dompotae, ”wanta ronga me'umbaako inso a wongi-wongi.”

¹³ Tewala kuperorohio po'iangado mia mate gagi rahaku, mompatinda poturiaku a laro wongi-wongia,

¹⁴ ka motae a ngkaburu kineke: Omue amaku, a wingo: Ineku ka pepaekompoku beine,

¹⁵ ka isuaomoke pomperorohiku? Isemake kumitao pomperorohiku?

¹⁶ Luwuno pomperorohi ta tondu i totono po'iangado mia mate, tewala meronga kami metii a laro pampawu.