Ayubi 15 - Wunta Mempori

Pohaweno i Elipasi nine mia mosa'o gauno ta mate 15:1-35

¹ Ka i'amba i Elipasi, to Temani, sumangki,

² ”Hinaoke mia anu monto'ori sumangkio ponto'ori nahina pengkonaano, ka pinewowolono umihiakono angi?

³ Hinaoke mia mengengeako pau anu nahi mentudu, ka saru pau anu nahina pengkonaano?

⁴ Ka omue mbo'u tumadio doitoa ka mokomakurao pompelangkai ndi Ondae Ue Ala.

⁵ Salamumo anu paguruo ngangamu, ka paudo mia melelengkupi ubinikio.

⁶ Ngangamu isa'a anu mokonsalako, komba ongkue; wiwimu isa'a mesakosii umewaiko.

⁷ Nde omueke pine'anaako gagi mia amba-ambano, ke pinokogagi se'eluno luwuno pongku wita?

⁸ Nde metondakoke momperorongeako a nteriso-Do Ue Ala ka mohawe ponto'ori butu tiano koroimu?

⁹ Hapake anu tino'orimu, anu nahi kimento'orio? Hapa anu pinokonto'orimu, anu nahi mengkaa ndi omami?

¹⁰ I olomami mbo'u hinao mia me'uwa ka tende ntinuwu, anu mota'uopo tinuwuno sekonopo amamu.

¹¹ Upemakuraoke pontarero-Do Ue Ala, ka pau molusa-lusa ndi omue?

¹² Tembio ka ipolomoko pohaweno aroamu ka tembio matamu itensila,

¹³ ranta ka ulimbao tekudamu ndi Ondae Ue Ala, ka ngangamu moluarako pau kanatuu?

¹⁴ Isemake mia ranta ka imempori, anu pine'anaako inso a beine ranta ka imentee?

¹⁵ Menteeano, mia mempori-Do nahi Dope'ala-alao, maupo asa wawo langi nahi mempori a pongkita-Do;

¹⁶ tamoako mbo'u mia anu mokoburu ka mosa'o gauno, anu montele molengkua kana uwoi.

¹⁷ Ineheku mokomengkaao asa rupa ndi omue, ronge akumo, ka ineheku tumutuluakomu hapa anu kukitaomo,

¹⁸ anu tinutuluno mia anu mponto'ori, ka nahi dompewuniakono uempu'udo,

¹⁹ anu butu ndi ondae ipineweengako wita atuu, ka nahina maupo te'asa mia hawe ntelalo i tonga-tongado.

²⁰ Mia mosa'o gauno mondidi-ndidi asa ntinuwuno, kanatuu koa mbo'u mia lambaha a laro luwuno ta'u anu ipinatindaako.

²¹ Uni anu mongkokongiri hawe a birino, i tempono manangai mehawe ira puu mponsolangi ndi onae.

²² Nahi pe'ala-alao nine onae ta mekule inso a wongi-wongia; onae pinakosiomo ka imateako ponai.

²³ Onae melakopi ta mo'ungke kaanga, ba isuamo koa. Ito'orio nine oleo wongi-wongia tetinda sumikorio.

²⁴ Onae ipokodoitoo masukaraa ka pompema'iso, anu pabawaio kana mokole anu tetinda monsapoi.

²⁵ Hangano itandeomo kaeno umewai Ira Ue Ala ka mosia umewai Ira Anu Tedoa Pabawa.

²⁶ A mpo'eheno aroano onae melulu umaropiako Ira kanta me'apii mokapa.

²⁷ Rupano itutuwiakonomo taba, ka apiino taba ipokonao a ntongano;

²⁸ onae rodo mo'ia a luwuno kota anu terawo-rawoomo, a luwuno raha anu nahi dompokompo'iangario mia, anu tinantui ka igagi mpiha howuno anu terawo.

²⁹ Onae nahi ta gagi mompoli ka arataano nahi ta mo'ia mpiha, maupo pine'ueno nahi ta tetiangi i tolino.

³⁰ Onae nahi ta tola inso a wongi-wongia, tumbano ta moleuako langano api, ka onae ta pinokotampulaako penaano nganga-Do Ue Ala.

³¹ Siimo ipe'ala-alao anu nahina tuduno ranta ka itepopo'oo, hangano anu nahina tuduno ta gagi hukuno.

³² Napi sompo tempono, mateano ta hawe ka sampano mbo'u nahi molowulu.

³³ Onae kana keu anggoro anu ronta wuano ka kana keu saitu anu tedonta sisino.

³⁴ Hangano bawaano mia mosa'o gaudo nahi ta hina inuleno, ka pingko ikaano api luwuno kemano mia anu mongkaa pompowee nahi pototono.

³⁵ Ondae mentiaako masusaa ka mpe'anaako wineweu mosa'o, ka aroado mpompewowolo pompopo'oo.”